Esetere 9 - Bibilia Buk na Ŋun nagon koti luŋu a

Yudayaki a tatuja merok kase

¹ A saret lo mor lo wurö lo ködyö kokona i perok puök wot musala ti yapa topuök wot murek logon a yapa Adar. A i ŋilu lor gwak logon merok ti Yudayaki ga ’yi te ’ya lepeŋat lu, kölumbö a gwe a lor logon Yudayaki te ’yi merok kase.

² A Yudayaki momori ’börik i köjinö kase i mödöriajin liŋ ti mor Akasuwero anyen tatuja kilu ŋutu logon ködyö ga ’yu köŋu se kulo. A lele gwe ’bayin lo jujukin mörö ko lepeŋat, kogwon gweyajin liŋ ti ŋutu kukujönö se parik.

³ A kimak liŋ ti mödöriajin dumalak, ko mödirön se ko mödirön lo ’di ’dik, ko temejik liŋ ti miri na mor köti parakiŋdye Yudayaki, kogwon se kukujönö Mordekai parik.

⁴ Kogwon Mordekai gwe a ŋuto duma ko mor midi, a todumalan nanyit aje kuörö i mödöriajin liŋ; kogwon riŋit na Mordekai ŋdine a duma bia parik.

⁵ A kirut Yudayaki möröni mörö ko merok kase ko baŋdujin, a tatuje ko a tukaŋi se, a konakiŋdye kamanak kase gwoso i ’deket nase.

⁶ A Yudayaki iŋge tatuja ko a tukaŋu ŋutu miajin mukanat yu Susa i mariŋ nago lukata,

⁷ a se köti iŋge tatuja Parsanadata, ko Dalapon, ko Asepata,

⁸ ko Porata, ko Adalia, ko Aridata,

⁹ ko Paramasata, ko Arisai, ko Aridai, ko Wayijata,

¹⁰ kilo a ŋwajik puök ti Aman ŋuro lo Amedata miriku lo Yudayaki. Ama se a ko ’bulukiŋdyö könisi kase i toro ’bo.

¹¹ Nyena i ŋilu lor gwak a kenet na ŋutu lo tatua Susa i mariŋ nago lukata kulu iŋge jaki mor.

¹² A nye kulyani ko mor Esetere adi, Ni Susa i mariŋ nago lukata ka ’de Yudayaki a tatuja ŋutu miajin mukanat se ko ŋwajik puök ti Aman. Ama i kunie mödöriajin kwe se ŋona a tatuja ŋutu muda? Nyena do yöŋö nyo? Nan de bubulö tiŋdu do. Do ’dek nyo köti? Nan de bubulö rukökiŋdyö do.

¹³ A Esetere ruŋge adi, Ko ködyö do nyanyar pon mor, ko ’bure ti Yudayaki logon kata ni Susa kulo ’burukine köti i koŋdya gwoso i saret lo ŋilo lor lo. Ko ti öpuö ti ŋwajik puök ti Aman leleyoni i kaden ki.

¹⁴ Nyena a mor tiŋdi saret anyen kine kulya kokona; a ŋilo salet iŋge laiki Susa lukata, a öpuö ti ŋwajik puök ti Aman iŋge leleyo i kaden ki.

¹⁵ A Yudayaki lo gwon Susa kulo köti momori momora i perok puök wot iŋwan ti yapa Adar; a lepeŋat iŋge tatuja ŋutu miajin musala Susa nyu, ama a lepeŋat gwe a ko ’bo ’yu toro ’bo kase.

Rorwe lo Purim

¹⁶ A kulye Yudayaki logon kata i mödöriajin ti mor köti momori momora anyen gaju ’börik, a se lwöggi ’börik i merok kase a iŋge tatuja ŋutu aliŋan merya buryo wot mukanat ti kilu logon maman se kulu; ama nagon lepeŋat gwe a ko ’bo ’yu toro ’bo ti merok kase.

¹⁷ Kine po a kona i perok puök wot musala ti yapa Adar, a i perok puök wot iŋwan a lepeŋat yuke yukan, a koŋdi ŋilu lor a lo rorwe ko a lo lyöpön.

¹⁸ Ama Yudayaki lo gwon Susa lukata kulo a momora i mörö i perok puök wot musala ko i perok puök wot iŋwan, nyena a se yuke yukan i perok puök wot mukanat a koŋdi ŋilu lor a lo rorwe ko a lo lyöpön.

¹⁹ Nyenagon a Yudayaki ti jur logon si ’da i köjinö nagon ’bak maripan kulu, ’debbi perok puök wot iŋwan ti yapa Adar a lor lose lo lyöpön ko a lo rorwe, ko a yukaet, ko a lor logon se tosunyukin ko ’börik kinyojin lo paleleŋ.

²⁰ A Mordekai iŋge wurökin kine po kak, a soŋdi waragalan ko Yudayaki liŋ lo gwon i mödöriajin liŋ ti mor Akasuwero, logon nyona ko logon pajo.

²¹ Adi ti se ’debbi perok puök wot iŋwan ko perok puök wot mukanat ti yapa Adar temba i kiŋa,

²² kogwon kilo a perok logon Yudayaki lwökuŋdye ’börik ko merok kase. Köti adi kogwon ŋilo a yapa logon delya nase a löpuggö a lyöpön, a durwe löpuŋge a yukan. Adi ti se ’debbi kilo perok a ti rorwe ko a ti lyöpön, ko a perok logon se tounyukin ko ’börik kinyojin lo paleleŋ, ko i ’dogga na lomerika.

²³ A Yudayaki ruŋge ’debba a keri po nagon se a kon i suluwa, gwoso na wuŋe Mordekai nu.

²⁴ Kogwon Aman ŋuto lo Agaga ŋuro lo Amedata, miriku lo Yudayaki liŋ, a yeyeju mwön ko Yudayaki i tukaŋu na lepeŋat, a gumbe guralan na luŋu a Pur, anyen tolikiŋdyö ko tukaŋu se.

²⁵ Ama na pöri Esetere ko mor i komor nu, a mor tiŋdi saresi i wurö anyen yeyeet naron na Aman nagon lepeŋ yeyeji mwön ko Yudayaki na ködyö yitöki kanyit i kwe, anyen lepeŋ se ko ŋwajik kanyit ködyö totolo i kaden tolesi.

²⁶ Nyenagon a lepeŋat luŋgi kilu perok a Purim, kogwon i karin nagon a Pur. Nyena köti a Yudayaki tiŋdi saret iŋgo a kwe na ŋo liŋ nagon a wuröki i ŋina waraga, ko ŋo liŋ nagon se a met ko mugunya kase, ko ŋo nagon a ’dukin kase loki,

²⁷ adi lepeŋat ko nyakwariat kase se ko kulye ŋutu liŋ logon a mora ko lepeŋat kulu, a ruk adi se mo tine jaran i ’debba na kilu perok murek, gwoso i ŋo nagon a wurö ko i diŋit na wulwe temba i kiŋa.

²⁸ Köti adi kilu perok agu ködyö yeyeŋ ko ti ’depani tojo i nyakwariat liŋ i kötumitön kase liŋ, ko i mödöriajin ko i köjinö ka ’de ka ’de. Adi ti kilu perok logon a Purim kulu, ti Yudayaki gwe ti böŋöri se asut, anyen ’depa na kilu perok gwon ti likin ma ’di i kiden na nyakwariat kase.

²⁹ A kirut mor Esetere ŋuro na Abikayila se ko Mordekai Yudayakityo gwe ko kido i wuŋö na saret anyen togo ’yu ŋina waraga tomurek i kulya ti Purim.

³⁰ A waragalan iŋge sunyuki Yudayaki liŋ i mödöriajin mia geleŋ ko merya murek wot buryo ti tumatyan na Akasuwero. Kine waragalan nyönyöggu kulyaesi ti taliŋ ko ti to ’diri,

³¹ adi ti kilo perok logon a Purim kilu ködyö ’depani ’depa i diŋitan kase na wulwe, gwoso nagon Mordekai Yudayakityo ko mor Esetere a sarakiŋdye Yudayaki nu. Adi ködyö ’de ’depa gwoso nagon se a tetenakiŋdye ’börik se ko nyakwariat kase ŋilo saret a kwe na miŋdya se ko na delya.

³² A ŋilo saret lo mor Esetere iŋge togo kulya ti Purim, a kine kulya iŋge wuröki i buk.