Esetere 8 - Bibilia Buk na Ŋun nagon koti luŋu a

Yudayaki a ’buruki i te ’ya na merok kase

¹ I ŋilu lor a mor Akasuwero tiŋdi mor Esetere mede na Aman, miriku lo Yudayaki. A Mordekai poŋdi ko mor i komor, kogwon Esetere a tukökin mor adi lepeŋ a medetyo lonyit.

² A mor rusuŋdye katimanti nanyit joket nagon nye a ’dumun kaŋo ko Aman na, a tiŋdi Mordekai. A Esetere tiŋdi Mordekai a kamemetanit lo mede na Aman.

³ A Esetere iti nene daŋ köti i jambu ko mor. A nye ’duruki kak ko mor i mokosi, a mamaŋdi lepeŋ ko politan anyen wuddya ŋinu yeyeet naron se ko mwönyit nagon Aman ŋuto lo Agaga a tetenakin Yudayaki kunu.

⁴ A mor yuddye Esetere ko ture lonyit lo dakaŋ,

⁵ a kirut Esetere ŋine ŋien a gwo ’de gwo ’dan ko mor i komor. A mo ’yi lepeŋ adi, Ko ködyö do nyanyar pon mor, köti ko nan ködyö a ryeju ’busan konut i metet, a ko ködyö meta a na ’but konut pon mor, ko ködyö köti nan meta a nake konut i komŋo, böŋö ti lele saret wuröni anyen löpuggö waragalan na wurö ko yeyeet na Aman ŋuto lo Agaga, ŋuro lo Amedata, anyen tukarari Yudayaki lo gwon i mödöriajin liŋ ti mor kulo.

⁶ Ada lolor nagon nan memet ŋo naron nagon mo ’dukin ko ŋutu kwe loki? Ada lolor nagon nan memet tukara na luoasirik kwe?

⁷ A kirut mor Akasuwero kulyani ko mor Esetere se ko Mordekai Yudayakityo adi, Mete ta, nan aje tiŋdu Esetere mede na Aman, köti köliŋönök kwe aje tatuja Aman i kaden tolesi, kogwon nye a ga ’yu tatuja Yudayaki.

⁸ Nyena ta bubulö wuŋö kulya ti Yudayaki gwoso i ’dekesi kasu, a ta wuŋe i karin kwe ti mor, ko joggi ta nye ko katimanti nio joket; kogwon ko saret a wurö i karin kwe ti mor a iŋge joka ko katimanti nio joket na tumatyan a nye tine bulö löpukö asut.

⁹ A kirut i ŋinu diŋit a kawurök ti mor luŋuni luŋu i perok merya murek wot musala ti yapa tomusala, logon a yapa Siwan. A saret wuröni wurö gwoso i ŋo liŋ nagon Mordekai a saŋi i kulya ti Yudayaki ko wuresi kase se ko kutuk nase.

¹⁰ Kine waragalan a wurö i karin ti mor Akasuwero a iŋge joka ko katimanti nanyit joket na tumatyan, a kinu waragalan sonyoni sonyo ko luyökie lo wörö ko kusanjin na wökön parik. Kine kusanjin a kitaesi ti kita na mor ko a keleji ko kusanjin mönikön lo ’but ti mor.

¹¹ A i waragalan na wurö kune a mor ’burukiŋdye Yudayaki logon gwon i köjinö liŋ anyen tuŋdya ’börik i pirit na geleŋ i tiju na ’börik. Köti adi se bubulö tatuja, ko tukaŋu, ko tolikiŋdyö nene teŋ na kamörök ti lele jur kode ti nene mödöria logon ga ’yu mörö ko lepeŋat se ko luŋudiet kase ko ŋutu wate kase, ko i ryaggu na toro ’bo kase.

¹² Adi ti kine kulya konani i lor geleŋ i mödöriajin liŋ ti mor Akasuwero, kweja adi i perok puök wot musala ti yapa topuök wot murek logon a yapa Adar.

¹³ A lomirakin lo kulya na wurö kune ködyö kokorakine i mödöriajin liŋ ka ’de ka ’de anyen layiki a saret i gweyajin liŋ ti ŋutu, köti ti Yudayaki gwe ajo i ŋilu lor i ropuŋdya na ’börik ko merok kase.

¹⁴ Nyena a luyökie lo wörö ko kusanjin na wökön parik nagon a kitaesi ti kita na mor kulo wöki kaŋo ’de ’de, a ’demeji ’demeja gwoso i saret lo mor. A ŋilu saret iŋge koraki Susa na gwon i mariŋ nago lukata.

¹⁵ Nyena a kirut Mordekai iti kaŋo ko moi i komor. Lepeŋ a jupu boŋgwat ti tumatyan nagon a naŋem ko nakwe, ko Iŋguya duma logon a dakaŋ kanyit i kwe, a iŋge jupukiŋdya boŋgo muit na gweya ko waratat naparere nagon a na ’bule, a köji na Susa woŋoro ki parik ko lyöŋön.

¹⁶ A töilyet ti Yudayaki gwe ŋa, a se gwe ko lyöŋön, ko nyola, ko bulet.

¹⁷ A lyöŋön ko nyola köti gwe kata i kiden na Yudayaki, a se gwe ko rorwe ko yukan i mödöriajin liŋ, ko i köjinö liŋ, i piritön liŋ nagon saret lo mor aje kenaki ŋutu kunu. A ŋutu jore ti kilu jurön liŋ löpuŋge ’börik a Yudayaki kogwon lepeŋat kukujönö Yudayaki parik.