Esetere 7 - Bibilia Buk na Ŋun nagon koti luŋu a

Aman a ko kegga mwön a kölumbö a lepeŋ lo toloni

¹ A kirut mor ko Aman iti i rorweko mor Esetere yu.

² A i lor tomurek lonyit, nagon se möji binyo nu, a mor nyöggi pija Esetere adi, Do yöŋö nyo pon mor Esetere? Nan de bubulö tiŋdu do. Do ’dek nyo? Nan de bubulö rukökiŋdyö do ma ’di swöt lo tumatyan nio.

³ A mor Esetere ruŋge adi, Ko ködyö nan a ryeju ’busan konut i metet pon mor, ko ködyö gwoso i ’deket na mor, böŋö ti ru nio se ko ru na ŋutu kwe ’burukine nan gwoso na yöŋöri nan ko na ’deggi nan na.

⁴ Kogwon nan se ko ŋutu kwe kilo aje tugwöröki i tatua, ko i tukara, ko i toliki asut. Ko nan ködyö a den adi yi lyan ko wate a tugwörö a ’dupi kana, a nan ködyö tine bulö jambu nene ŋo kwöŋ, kogwon ko sona delya nikaŋ ti bulö köŋu kita na mor.

⁵ A kirut mor Akasuwero pipije Esetere adi, Nye ŋona a ŋa, ko lepeŋ liya logon a bu ’ya mugun i koŋdya na ŋo gwoso kine?

⁶ A Esetere nyobbi adi, ŋilo Aman loron lo logon a kapisanit ko a miriku likaŋ! A Aman iŋge rigwökö ko kujönö duma parik ko mor se ko narakwan nanyit i komor.

⁷ A kirut mor ŋine ki ko woran i ŋilu rorwe a luŋöni kaŋo a iti i melesen na mede nanyit na gwon ko köturön na; ama a Aman karaki nyu anyen mamaŋdu ko mor Esetere i rukökiŋdyö na lepeŋ i gwon jörun, kogwon nye aje den adi mor yeyeju konakiŋdya lepeŋ ŋo naron.

⁸ A mor yitwene yitwe i melesen na mede nanyit nagon gwon ko köturön na, a poŋdi i pirit nagon se dika möji binyo na, a ko meddi Aman aje ’doro i nu si ’daet na piriki ’e Esetere nu; a mor kulyani adi, Nye köti de yeyeju lubbö narakwan nio köyö i komor ko köyö i kadi lukata le? A nagon kulyaet a ko nyuŋ ’baka kanyit i kutuk nu, a köliŋönök kanyit muŋge komor na Aman.

⁹ A kirut Karbona logon a kona a ’baŋ ko a köliŋönit lo mor lo kulyani adi, Kölumbö kaden kata lo teten Aman a tolesi ti Mordekai logon kulyaet lonyit a lwöggu mor i twan lo, kilu gwogwo ’dan ko Aman mede, tojolan nase a lokiliŋan merya mukanat.

¹⁰ a kirut mor kulyani adi, Tole ta lepeŋ nyu. A se to ’yi Aman i kilu kaden logon nye a tetenakin Mordekai kulu. A kirut woran na mor iŋge yukörö.