Esetere 6 - Bibilia Buk na Ŋun nagon koti luŋu a

Aman a ri ’diki i bu ’ya na Mordekai

¹ A i ŋilu tukwaje a konyen ti morkweline kweli, a lepeŋ saŋi saŋu anyen buk na dekat jwe kanyit ni, anyen ko kenaki lepeŋ.

² A ŋinu buk nyönyöggi kulya na jam Mordekai a kwe na kulya ti Bigetan ko Terese, kilu a köliŋönök murek logon a kona a ’baŋin ko a katiyuk ti kötumit na mor, logon köju ködyö ga ’yu tatuja mor Akasuwero.

³ A mor pipije adi, Nene bulet kode kweyet na todumalan a nyo nagon a konaki Mordekai kogwon kune ŋo? A köliŋönök kamemetak ti mor nyobbi adi, Nene ŋo ’bayin kwöŋ nagon a konaki lepeŋ.

⁴ A kirut mor pipije adi, ŋa lo gwon kata i ’baŋ nyu? Kudyakan Aman pete luŋe i ’baŋ lo kaŋo lo mede na mor anyen ko jamakiŋdya mor kulya ti tolo na Mordekai kilu kaden tolesi logon nye aje tetenakin nye kulu.

⁵ A köliŋönök ti mor takiŋdye lepeŋ adi, Aman maŋilu gwogwo ’dan i ’baŋ. A mor kulyani adi, Ti lepeŋ yepuŋdye köyö ni.

⁶ A kirut Aman yeŋaddi ko lepeŋ yu, a mor pipije lepeŋ adi, Ko nan mor ködyo nyanyar tiŋdu lele ŋuto bulet, nyo logon ködyö bubulö konaki lepeŋ? A Aman yeyeji kanyit i töili adi, Lele ŋuto ’bayin logon mor nyanyar bu ’ya lepeŋ lwölwoŋ nan.

⁷ A Aman kulyani ko mor adi, Ko ködyö pon mor, do nyanyar tiŋdu lele ŋuto bulet,

⁸ a ti boŋgwat ti tumatyan jweni nagon mora juŋ kune, se ko kusan nagon mor a wöröri nu na gwon ko Iŋguya lo tumatyan kanyit i kwe.

⁹ Ti boŋgwat kunu se ko kusan nu tikine lele lo temejik kulok lo bubula pon mor, ko ti nye tojubbi ŋilu ŋuto logon mor nyanyar tiŋdu lepeŋ bulet lo. A kirut ti lepeŋ tuworöddi nilu ŋuto i kusan loki i pirit nagon a terere na köji, ko ti nye laije laŋa kanyit i komor adi, ŋilo a ŋutu logon mor nyanyar tiŋdu lepeŋ bulet lo.

¹⁰ Nyena a mor kulyani ko Aman adi, Nyoŋgi ’de ’de, ’dumuŋdye boŋgwat se ko kusan, ko ti do konakiŋdye Mordekai Yudayakityo logon sisi ’datu köyö i kötumit lo ŋo liŋ gwoso na jambi do ŋina. An do ko böŋöri nene ŋo nagon do a jam, ma’di geleŋ to.

¹¹ A kirut Aman ’dumuŋdye boŋgwat se ko kusan, a tojubbi Mordekai, a tuworöddi lepeŋ i kusan loki i pirit nagon a terere na köji, lalaiyaddu adi, ŋilo a ŋutu lögön mor nyanyar tiŋdu lepeŋ bulet lo.

¹² A Mordekai kirut yitweni bot ko mor i kötumit. Ama a Aman kölumbö rumara kanyit mede ko kwe nanyit a mukö dedelyaji.

¹³ A Aman takiŋdye Jeresa narakwan nanyit se ko julin kanyit liŋ ŋo nagon a ’dukin ko lepeŋ ki kune. A ŋutu kajujuwak kanyit lokoŋ se ko Jeresa narakwan nanyit takiŋdye lepeŋ adi, Ko Mordekai a lo kötumit na Yudayaki, nyena ko lepeŋ aje suluja te ’ya do, a do mo tine bulö te ’ya lepeŋ, ama nagon lepeŋ mo tele te do asut.

¹⁴ A nagon se leru nyuŋ jajambu ko lepeŋ nu, a köliŋönök ti mor logon a kona a ’baŋin kulo aje ’durökin a nyömöddi Aman ’de ’de i rorwe logon Esetere a teten lu.