Esetere 5 - Bibilia Buk na Ŋun nagon koti luŋu a

Esetere a lupuŋdya mor ko Aman i rorwe

¹ A gwe sona i lor tomusala lonyit, a Esetere jupukiŋdye boŋgwat kanyit ti tumatyan, a gwo ’de i ’baŋ lo lukata lo kadi na mor komorga kadi nanyit. A mor aje si ’daki i si ’daet na tumatyan i kadi nanyit na mor, komorga lupet na nu kadi.

² A nye ko meddi mor Esetere gwogwo ’dan kanyit i ’baŋ a lyöŋi lyöŋön ko lepeŋ, a yuddye lepeŋ ko ture lonyit lo dakaŋ lo gwon kanyit i könin lo. A kirut Esetere miju mijun, a ’bo ’yi kwe na ŋilu ture.

³ A mor pipije lepeŋ adi, Kulya a nyo mor Esetere? Do ’dek nyo? Nan bubulö tiŋdu do ma ’di swöt lo tumatyan nio.

⁴ A Esetere waddi adi, Ko ködyö do nyanyar pon mor, a ti do mor se ko Aman poŋdi i lo lor i rorwe logon nan aje teten a lo mor lu.

⁵ A kirut mor kulyani adi, Luŋi ta Aman ’de ’de, anyen yi koŋdya gwoso nagon Esetere a ’deggi na. A mor se ko Aman iti i rorwe logon Esetere aje teteŋdya lu.

⁶ A nagon se möji binyo nu, a mor pipije Esetere adi, Do yöŋö nyo? Nan de bubulö tiŋdu do. Do ’dek nyo? Nan de bubulö rukökiŋdyö do ma ’di swöt lo tumatyan nio.

⁷ A Esetere waddi adi, Ŋo na yöŋöri nan ko na ’deggi nan makune:

⁸ ko ködyö nan a ryeju ’busan konut i metet pon mor, ko do ködyö nyanyar rukökiŋdyö nan ŋo na yöŋöri nan ko na ’deggi nan kune, a ti do mor se ko Aman yitweni ko ’bure i rorwe logon nan de tetenakin ta lo, a kirut ko ’bure nan de koŋdi gwoso nagon do mor a kulyari na.

Kaden a tetena anyen tolori Mordekai

⁹ A Aman iti kaŋo i ŋilu lor ko lyöŋön ko töili lo ’but. A Aman ko meddi Mordekai sisi ’da i kötumit na mor a ko ŋien ki a gwe a ko kujönö lepeŋ, a nye iŋge woran parik ko Mordekai a tömönik.

¹⁰ Ama a Aman böŋö iŋge suk mugun a iti mede; a lepeŋ soŋdi ŋutu i galaddu na julin kanyit se ko narakwan nanyit Jeresa.

¹¹ A Aman jamakiŋdye se todumalan na tukwörien nanyit, ko tojore na ŋwajik kanyit, ko gwoso i diŋitan liŋ nagon mor a ’dulukiŋdye lepeŋ ki na, ko tiki nanyit a kwe lo temejik se ko kakitak liŋ ti miri na mor.

¹² A Aman köti ’ya ’yi jambu adi, Ma ’di mor Esetere a ko luŋ lele ŋuto i tu se ko mor i rorwe logon nye a teten lu, ake nan ko mugun nio ka ’de lo luŋu. Ko ’bure köti nye a luŋ nan se ko mor i pirit na geleŋ.

¹³ A ma ’di kine kulya liŋ ’bulit nase ’bayin köyö nagon nan nyuŋ meddi Mordekai Yudayakityo sisi ’datu i kötumit na mor nu.

¹⁴ Nyena a narakwan nanyit Jeresa se ko julin kanyit liŋ takiŋdye lepeŋ adi, Ti kaden tolesi tetenani logon tojolan nase a lokiliŋan merya mukanat. Ko ’bure a do de tu takiŋdye mor anyen Mordekai totolo i loki nase. A kirut do de iti ko lyöŋön se ko mor i lu rorwe. A Aman iŋge lyöŋön ko kine jujuwesi, a lepeŋ sarakiŋdye kaden tolesi i tetena.