Esetere 4 - Bibilia Buk na Ŋun nagon koti luŋu a

Esetere a ruk anyen mo ’yu mor kulya ti ŋutu kase

¹ A gwe sona nagon Mordekai aje yiŋ ŋo liŋ na kona kune, a lepeŋ kekereŋdi boŋgwat kanyit kune, a jupukiŋdye boŋgwat terekesi ko kurök kanyit i mugun, a lepeŋ worojine i köji lukata, luluoddu parik ko gwiet duma.

² A lepeŋ iti tojo ko lupet na kotumit na mor, kogwon lele ŋuto logon a jupu ko boŋgwat terekesi lo kodyo ti bulo luŋöri kotumit na mor.

³ A durwe koti gwe a duma parik i kiden na Yudayaki lo gwon i modoriajin liŋ ka ’de ka ’de i piriton liŋ nagon saret lo mor aje kenaki ŋutu nu, a Yudayaki miŋdye miŋdya ko politan ko delyaesi, a lojore kase pere kak i kurök ko boŋgwat terekesi.

⁴ A nagon koliponok wate se ko koliponok ti Esetere logon a kona a ’baŋin kulo ko poŋdi i takiŋdya na lepeŋ na kine kulya nu, a mor Esetere iŋge delya parik; a lepeŋ soŋdi boŋgwat anyen ko tu tojupurikin Mordekai, anyen nye kodyo rosoro boŋgwat terekesi kunu köke, ama lepeŋ a renya wuju kinu boŋgwat.

⁵ A kirut Esetere luŋgi Atak logon a kona a ’baŋ ko a köliŋönit lo mor logon mor a wulun anyen meddya lepeŋ lo, a takiŋdye nye anyen ko tu pija Mordekai ko kulya a nyo, koti ko nyo nagon nye koŋdya sona.

⁶ A Atak iti kaŋo ko Mordekai yu i pirit nagon a terere na köji i komor na kötumit na mor.

⁷ a Mordekai nyonyökokiŋdye lepeŋ kulya liŋ na kona kune, a tuŋge kenet gwak na gurusu nagon Aman a ruggö ropakiŋdya i pirit na tukwörien na mor a tukaresi ti Yudayaki.

⁸ A Mordekai köti iŋge tikin lepeŋ nene lomirakin na ŋilu saret lo wuroki kak lu logon a koraki i Susa lukata a tukaret lose, adi ti nye kweki Esetere ko ti tokuruki lepeŋ, ko ti nye saŋi lepeŋ anyen tu ko mor i komor i kwaddu ko i mo ’yu na lepeŋ i kulya ti ŋutu kanyit.

⁹ A Atak iti tu a jamakiŋdye Esetere kulya na jam Mordekai kunu.

¹⁰ A Esetere kirut kulyani ko Atak adi ti lepeŋ tu taki Mordekai adi,

¹¹ Ma ’di kakitak liŋ ti miri lo mor se ko ŋutu ti modoriajin kanyit a den adi saret geleŋ kata a lo ŋutu liŋ ma ’di ko nye a ŋuto lulalet kode nanakwan; adi ŋuto tatatua ko a luŋö ko mor i ’baŋ lo lukata lo kadi nanyit ko nye a ko luŋu. Ake ŋuto logon mor a yut ko ture lonyit lo dakaŋ lo bubulö pitöki. A nan köti gwe a ko luŋu anyen nan tu ko mor yu ko kulo perok merya musala.

¹² A lepeŋat takiŋdye Mordekai kulya na jam Esetere kune.

¹³ Nyena a Mordekai takiŋdye lepeŋat anyen nyököddu ruket na kinu kulya ko Esetere yu adi, Ko yeyeju adi kogwon do ŋina si ’da ko mor kadi, do de ŋona pipituŋdyö lwölwöŋ kulye Yudayaki liŋ.

¹⁴ Dene den adi ko do a yiŋa taliŋ gwoso i na diŋit na, a Yudayaki mo ko wuji lwökt ko yukan nagon pukun i lele swot, ama do se ko kötumit na munyi mo tolikine toliki. Kode do ŋona a wuju tumatyan anyen do bubulö lwöggu ŋutu i diŋit gwoso ŋina.

¹⁵ A kirut Esetere takiŋdye lepeŋat anyen nyönyökökiŋdyö Mordekai kine kulya adi,

¹⁶ Iti, tune Yudayaki liŋ logon kata Susa, ko miŋdye ta miŋdya i kulya kwe. An ta ko nyesu kode möju ko perok musala tukwaje ko tuparan. A nan ko köliŋönök kwe kune de köti mimiŋdya gwoso ta. A kirut nan de iti ko mor yu, ma ’di ködyö a naron i saret; a kirut ko nan tatatua a ti nan tatuani.

¹⁷ A Mordekai iti tu a koŋdi ŋo liŋ gwoso nagon Esetere a takin lepeŋ kunu.