Esetere 2 - Bibilia Buk na Ŋun nagon koti luŋu a

Esetere a kona a mor

¹ A gwe sona i mukök na kine kulya, a woran na mor Akasuwero iŋge yukörö, a lepeŋ yeyeji Baseti ko konesi kanyit se ko ’duŋet nagon a ’duŋöki lepeŋ na.

² Nyena a ŋutu ti mor logon gwon ko lepeŋ i pirit na geleŋ kulo kulyani adi, Ti mor galakine ŋwajik kö ’disi nakwekwelen.

³ Ti mor wulundye ŋutu i mödöriajin liŋ ti tumatyan nanyit anyen tunakiŋdya ŋwajik kö ’disi liŋ nakwekwelen i kadi na ŋutu wate na gwon Susa ni i mariŋ nago lukata. Ko ti se gwe ko Egai i könin, ko ti welesi tokwelenyesi ti mugunya kase tikine lepeŋat. Egai a kölipönit logon a kona a ’baŋ, logon a kamemetanit lo ŋutu wate ti mor lo.

⁴ A kirut kö ’disityo nagon a tulyöŋgu mor mo ruddye pirit na Baseti a narakwan nanyit. A mor lyöŋi lyöŋon ko kine jujuwesi, a lepeŋ iŋge koŋdya sona.

⁵ A lele Yudayakityo gwe yu Susa i mariŋ nago lukata, logon karin kanyit a Mordekai ŋuro lo Yair, ŋuro lo Simei, ŋuro lo Kisi lo kötumit na Benyamina;

⁶ ŋilu ŋuto köju a joŋa kaŋo Yerusalema se ko kulye ŋutu lo momokaji logon mor Nebukadanesar a jijo kulo i to ’dupien i diŋit na joŋgi nye Yekonia mor lo Yuda nu.

⁷ A Mordekai iŋge wowoja Adasa nagon a Esetere, tore na luŋaser monye, kogwon nye ’bak monye kode ŋote. ŋinu kö ’disityo a nake kwekwelen, a nagon ko monye ko ŋote aje twatwa nu, a Mordekai ’debbi lepeŋ gwoso ŋuro nanyit.

⁸ A gwe sona i diŋit nagon kulyaet se ko saret lo mor aje kuörö kaŋo nu, a kö ’disi jore iŋge tunaki i mariŋ nago lukata na Susa, anyen Egai lo tiju. A Esetere köti joŋani i pirit na mor a tikine ko Egai i könin. ŋilo Egai a kamemetanit lo ŋutu wate.

⁹ A Egai lyöŋi lyöŋön ko ŋinu kö ’disityo a kwekiŋdye lepeŋ ’busan, a nye tiŋdi lepeŋ ’de ’de welesi tokwelenyesi ti mugun, ko koret na kinyo, se ko kölipönök kö ’disi buryo na nyunyumwe i ’baŋ lo mor, a wulökiŋdye lepeŋ se ko kölipönök kanyit pirit na ’but i kadi na ŋutu wate.

¹⁰ Ama a Esetere gwe a ko nyuŋ tiŋdu gweyari lonyit kode kötumit nanyit i dena, kogwon Mordekai aje jujuja lepeŋ anyen nye gwon ti tuggö kulya gwoso kine.

¹¹ Temba i lor a Mordekai woroni i komor na ’baŋ lo kadi na ŋutu wate, anyen ko yiŋga kulya ti Esetere ko nye gwon ada.

¹² A perok tokwelenyesi ti ŋutu wate gwe sona adi, yapala buker ti se we ’yi ’borik ko welet na mur, ko kulye yapala buker ti se we ’yi ’borik kowelesi na mon ’bura ko kunie ŋonagon a tokwelenyesi ti ŋutu wate. A ko kö ’disi aje tutuŋgö kilo yapala puök wot murek, gwoso i saret lo ŋutu wate, a se kirut iti ko mor Akasuwero i komor a kiyukan.

¹³ Nyenagon ko ko ’disityo tu ko mor i komor sona, na lupöri nye kaŋo i kadi na ŋutu wate tojo i kadi na mor nu, lepeŋ bubulo tiki ŋo liŋ gwoso i ’deket nanyit.

¹⁴ A ko ’disityo iti ko mor i komor i tokotyaŋ, ama i ko ’bure na yitwe ’i lepeŋ nu, a nye iti i kadi tomurek na wate ti mor nagon tiyu ko Sasagaja. Sasagaja a koliponit lo mor, lepeŋ a kona a ’baŋ, a gwe a kamemetanit lo wate ti mor. A ko ’disityo tine bulo yito ko mor i komor koti ake ko mor a lyoŋon ko lepeŋ a soŋdi ŋuto i luŋgu na lepeŋ ko karin.

¹⁵ A kirut kiyuk na Esetere na ’duki. Esetere a ŋuro na Abikayila luŋaser monye Mordekai, logon a ’debba lepeŋ gwoso ŋuro nanyit. A na ’dukiŋdye kiyuk nanyit i luŋo ko mor i komor nu, a Esetere tine luŋgu nene ŋo lwolwoŋ minyo nagon Egai lo wulokiŋdyo lepeŋ kunu. Egai a koliponit lo mor, lepeŋ a kona a ’baŋ, a gwe a kamemetanit lo ŋutu wate. A ŋutu liŋ logon a met Esetere kulu lyoŋi lyoŋon ko lepeŋ.

¹⁶ A Esetere joŋani ko mor Akasuwero yu i yapa topuök logon a yapa Tebet, i kiŋa toburyo na gwoŋdi lepeŋ a mor nu.

¹⁷ A mor iŋge nyar Esetere parik lwolwoŋ kunie wate liŋ, a Esetere tulyoŋgi lepeŋ lwolwoŋ kunie kö ’disi liŋ, a kirut mor sukiŋdye Iŋguya lo tomoran ko lepeŋ i kwe anyen ruddya pirit na mor Baseti.

¹⁸ A kirut mor tetenakiŋdye rorwe duma a lo temejik se ko kakitak liŋ ti miri nanyit; ŋilo rorwe a puret lo Esetere. A nye koti tiŋdi yukan i modoriajin liŋ, a korakiŋdye ’dokesi kanyit ti mor abur ’bak temet.

Mordekai a yiŋ mwonyorikin na mor a iŋge tuggo

¹⁹ A i daŋ tomurek na tunari kö ’disi i pirit na geleŋ nu, a Mordekai aje si ’daki i kötumit lupet na mor.

²⁰ Ama a Esetere gwe a ko tiŋdu gweyari lonyit kode kötumit nanyit i dena gwoso na saŋi Mordekai lepeŋ nu; kogwon Esetere twotwo Mordekai gwoso i diŋit na wowoji nye lepeŋ nu.

²¹ A i perok logon Mordekai si ’dari i kotumit lupet na mor kulu, a koliponok murek logon a kona a ’baŋin ko a katiyuk ti kotumit na mor, logon kai i kase a ko Bigetan ko Terese kulo gwe ko ŋoma, a ga ’yi tatuja mor Akasuwero.

²² A Mordekai ko yiŋge kine kulya, a takiŋdye mor Esetere, a Esetere koti nyonyo ko kiŋdye mor i karin ti Mordekai.

²³ A kine kulya ko gelwene kaŋo a ryeni a gwak, a kilo ŋutu liŋ murek iŋge tolo ko nekenet. A kine ŋo iŋge wuro i Buk na Dekat ko mor i komor.