Amosa 9 - Bibilia Buk na Ŋun nagon koti luŋu a

ŋutu mo ti bulo rwösöddu na ’duŋge MATAT putesi kase nu

¹ A nan iŋge met MATAT gwo ’dan nyona ko pirit ’yuret na rubaŋgajin, a Lepeŋ kulyani adi, Gwute togwi ’diesi i kusik tojo lo ’dek a böböŋdu, gwagwalakaki se ka ’de ka ’de i kusik ti ŋutu liŋ; a nan mo tatuje ŋutu kase lo pituŋdyö kulo ko baŋdu, a lele lose gwe ’bayin logon mo wökön kaŋo, köti a lele lo rwörwösöddu gwe ’bayin kwöŋ.

² Ma ’di nagon Lepeŋat a ’bokaddu ’börik kak i pirit na mulökö, nan mo ’du ’dumun lepeŋat nyu ko könin liŋ; ma ’di nagon Lepeŋat a kiyaddu ki i ’diko, a nan mo joŋdi lepeŋat kak nyu.

³ Ma ’di ködyö se a ’de ’ya ’börik i mere Karmela loki, a nan mo galuŋdye se kaŋo nyu a morgi se; ma ’di se a ’dana i togulu na tör an nan met se, a nan mo takiŋdye Munu anyen toggu Lepeŋat nyu.

⁴ Ma ’di ködyö merok kase a joŋ se a ’dupi, a nan mo sarakiŋdye Lepeŋat i tatua ko baŋdujin nyu; a nan mo meddi Lepeŋat i kona-kiŋdya na se ŋo narok ti gwon a ŋo na ’but.

⁵ MATAT ŊUN lo kurumi a nye lo ’bo ’yu kak a kak lusököni lusökö, a ŋo liŋ na gwon i lukata nanyit kune delyani delya, a kak ’bukuluŋ burökuŋdye ki gwoso Supiri, a köti rorokara rorokara gwoso Supiri Ejipeto yu.

⁶ Lepeŋ a nye lo ’duggö koŋiloreki kanyit i ’dikolo, a ’bilikiŋdye ’diko gwoso lo ’dek i kak; a nye luŋgi pioŋ ti tör duma na ’balaŋ a ’bukökiŋdye se i kak— karin kanyit a MATAT.

⁷ Nan MATAT lo pija adi, Ta ŋutu ti Yisaraele, ta ŋona ’bayin gwoso ŋutu ti Etiopia köyö le? Nan ŋona a ko joŋdya ta ŋutu ti Yisaraele kaŋo i jur lo Ejipeto, a joŋdi ŋutu ti Pelesete Kapetor yu se ko ŋutu ti Suria Kir yu le?

⁸ Dene ta den adi nan MATAT ŋ un gwon i meddya na ŋina tumatyan naron, a nan mo tukaŋi nye i kak ni, ake kötumit na Yakobo nagon nan mo ti tukar asut. Kilo a kulyaesi kwe ti MATAT.

⁹ Kogwon nan mo tiŋdu saret, a kötumit na Yisaraele mo gwö-gwönyöni gwögwönyö i kiden na jurön liŋ gwoso ŋuto na ŋoŋoja ko kalaogira, ama a turukti lo ’dit mo gwe ’bayin lo ’doro kak,

¹⁰ A ŋutu kwe liŋ logon a kato-ronyak mo tatuani ko baŋdujin, kweja adi kilo a ŋutu lo kulya adi, ŋo naron mo ti mok yi kode ryö yi.

¹¹ A i ŋilu lor a nan mo ’bilikiŋdye tumatyan na Dawidi ki nagon gwoso morogo nagon a ’doro kak na, a nyöggi teteŋdya piriton kanyit na tutulujo, a ’bilikiŋdye murwo nanyit ki a nyöggi ’duggö nye gwoso na ’beron koju nu,

¹² anyen ŋutu kanyit böŋö ruddya pitono ti ŋo nagon a pituŋdyö Edom yu kunu, se ko juron liŋ logon luŋu ko karin kwe. Kilo a kulyaesi kwe ti MATAT; nan kökon kine ŋo.

ŋutu ti Yisaraele molu nyokwe bot kase i jur anyen gwon ’bura

¹³ Nan MATAT lo kulya adi, Perok kilo popo logon kakuruk mo ’demeji mukok na kaŋerak ti kinyojin, a karyokak ti ludweki ti binyo ’demeji mukok na kaweyak ti nyomot; a binyo luduko mo ’bukuŋdye kaŋo i merya, a lurwat liŋ mo ’doke a se.

¹⁴ A nan mo nyokuŋdye ŋutu kwe Yisaraele kaŋo i to ’dupien, a lepeŋat mo nyoggi ’duggö köjinö nagon a murwöki a si ’dani kata; a se mo ’yuddi kaden ti binyo a möji binyo kase, a se mo kuŋi meleseno a nyesi ludweki kase.

¹⁵ A nan mo nyöggi ’yuddu lepepat kase i jur, a lepepat mo köti tine gwunye kaŋo kwön i jur logon nan aje tikin lepeŋat lo. Kilo a kulyaesi kwe ti MATAT Ŋun losu.