Amosa 8 - Bibilia Buk na Ŋun nagon koti luŋu a

Ŋun kwekiŋdya nebi go toiŋwan logon a ludweki ti ja ’be

¹ A MATAT ŊUN kwekiŋdye nan nene ŋo, adi kupö lo ludweki ti diŋit na ja ’be malo.

² A nye pipije nan adi, Amosa, do a meddya nyo? A nan waddi adi, Nan a meddya kupö lo ludweki ti diŋit na ja ’be logon aje temakiŋdya i nyei. A kirut MATAT takiŋdye nan adi, Diŋit na ŋutu kwe Yisaraele aje temakiŋdya, a nan mo koti tine girara a swöt ’bak meddya toronjin kase.

³ Iŋkoi, i ŋilu lor kolisi lo yolo i kadi na MATAT kulo mo wora a luluesi, a öpuö mo gwe jore, a gubani kaŋo taliŋ i piriton liŋ. Kilo a kulyaesi kwe ti MATAT ŋun.

Yisaraele gwe nyona ko tukara

⁴ Yiŋge ta kune kulya, ta logon ryokakiŋdya ŋutu lo yöŋo ŋo kak, a tu ’baka ’yi lomerika ti lo jur,

⁵ a ta kulyani adi, Diŋit na yapa wilo mo ko ’duddyö nanu anyen yi böŋo tugwöŋu ’bolot? Sabata ko ’duddyo nanu anyen yi boŋo joŋdya ’bolot i tugwöŋu? Yi ’dek tiŋdu wuyit nagon a epa anyen temba ku ’dik, a koŋdi temet nagon a sekele anyen gwon pömöni, a koŋdi mumulugga ko mijanyan nagon tema-rikin ko ’burönö.

⁶ Yi ’dek gwöruŋdyö ŋutu lomerika ko gurut, a gwöruŋdye ŋutu lo yöŋö po kulo ko kamuka, a yi tugwöŋi duröjin ti ’bolot.

⁷ Nan MATAT logon kötumit na Yakobo aje bu ’ya mugun ko nan lo aje milyeju adi, ’Diri ’diri nan mo ti böŋö konesi kase kwöŋ ma ’di geleŋ to.

⁸ Lo jur mo böböŋdu kogwon kine kulya, a ŋutu liŋ lo si ’da kata kulo mo delyani delya, a jur liŋ mo burokuŋdye ki gwoso Supiri, a ya ’yi abur, köti a rorokara kak gwoso Supiri Ejipeto yu.

⁹ Nan MATAT ŋun lo kulya adi, I ŋilu lor nan mo toto ’doro kolor a kak nyuŋ a tuparan kiden, a nan mö tomuseji kak a kolor nyuŋ gwon ki.

¹⁰ A nan mo löpuŋge roriot kasu a delyaesi, a löpuŋge kölisi kasu liŋ a luluesi, a nan mo tiŋdi ta i dukukiŋdyö na boŋgwat terekesi kasu i muköko liŋ, ko kusik kasu liŋ a ’barinu; a nan mo tiŋdi ŋilu lor i gwon a delyaet gwoso lo delyarikin ŋuro pilili, a ’dutet nanyit mo gwe gwoso lor tomiet.

¹¹ Nan MATAT ŊUN lo kulya adi, Perok kilo popo logon nan mo sunyuŋdye dyaŋ i lo jur, ti gwon a magor lo kinyo kode a kure na piŋo, ama a magor logon yiparikin kulyaesi kwe ti MATAT.

¹² A ŋutu mo wirte abur suluja i tor tojo ko nene tör, ko i swöt lo lobot tojo ko swöt lo ’yure, a se mo wöwökine abur i ga ’yu na kulyaesi kwe ti MATAT, ama a se mo tine ryö.

¹³ A i ŋilu lor a kö ’disi nakwekwe-len se ko teton mo doddi doddya ko kure na piŋo.

¹⁴ ŋutu logon milyeju ko Asima ŋun na Samaria, kode milyeju adi, ’Diri ’diri, gwoso na gwoŋdi ŋun losu na, ta kötumit na Dan, kode milyeju adi, ’Diri ’diri, gwoso na gwoŋdi kiko lo tu Berseba na, ŋutu gwoso kilo mo ’do ’doro a mo tine ŋien köti kwöŋ.