Amosa 7 - Bibilia Buk na Ŋun nagon koti luŋu a

ŊUN a kwekin nebi ŋo musala tukaresi, kilo ŋo a mayat, ko kimaŋ, se ko witi temet na leleyo

¹ MATAT ŊUN aje kwekin nan ŋina ŋo adi, nye gwon i teteŋdya na ’diko na mayat i diŋit nagon kinyo lo mukök wiwiluŋdye. (Kogwon kinyo togeleŋ aperaki mor.)

² A nagon mayat gwe nyona ko tutuŋgo nyesu döru lo jur nu, a nan kulyani adi, Pon MATAT ŊUN, böŋö pitökiŋdye yi! Kötumit na Yakobo bubulö jorun ada? Lepeŋat ku ’dik parik.

³ A MATAT iŋge löpuggo i ŋo nagon nye a teten na, a MATAT kulyani adi, Kine ŋö mo ti pokin.

⁴ MATAT ŊUN aje kwekin nan ŋina ŋo adi, nye MATAT ŊUN gwon i luŋgu na kimaŋ anyen temba ŋutu kanyit, a kimaŋ daŋaddi ’tör duma a meloddi kak.

⁵ A nan kulyani adi, Pon MATAT ŊUN, böŋo kö ’yi koŋdya! Kötumit na Yakobö bubulö jörun ada? Lepeŋat ku ’dik parik.

⁶ A MATAT iŋge löpuggo i ŋo nagon nye a teten na, a MATAT ŊUN kulyani adi, Kine ŋo köti mö ti pokin.

⁷ A nye iŋge kwekin nan ŋina ŋo adi, nye MATAT gwon i gwo ’dan nyona ko gorom na ’dukö nagon tema ko witi na leleyo, a nye gwe ko ŋina witi temet na leleyo kanyit i könin.

⁸ A MATAT pipije nan adi, Amosa, do a meddya nyo? A nan waddi adi, Nan a meddya witi temet na leleyo i gorom. A kirut MATAT kulyani adi, Nan lo liliuŋdyo witi nio temet i kiden na ŋutu kwe Yisaraele, a nan mo koti tine girara a swot ’bak meddya toronjin kase;

⁹ a piriton ti Yisaka kwakwasesi na gwon i ko ’dulan ti merya kune mo konani a murwoki, piriton ti Yisaraele na rurwan mo kökörö, a nan mo ŋiki ki ko baŋdu i mörö ko kotumit na Yerobama.

Kulya ti Amosa ko Amajia

¹⁰ A kirut koane Amajia lo gwon Betele sunyukiŋdye Yerobama mor lo Yisaraele lore adi, Amosa ga ’yu mwon ko do i kiden na kotumit na Yisaraele; a jur tine ’bön ŋoŋga kulyaesi kanyit liŋ.

¹¹ Kogwon Amosa aje kulya adi, Yerobama mo tatatua ko baŋdu, a ŋutu ti Yisaraele agu ködyo joŋani pajo ko jur lose a ’dupi.

¹² A Amajia kulyani ko Amosa adi, Do ŋilo kame-tanit lo kulya na popo, iŋgo, woki i jur lo Yuda, tu nyesi kinyo ilot nyu, ko keŋ keju yu;

¹³ ama an do koti ko keju Betele ni kwöŋ, kogwon nye a pirit na rurwan nagon mor kwakwaddu kata, ko a kadi kwakwaset na tumatyan na jur.

¹⁴ A kirut Amosa waddi Amajia adi, Nan ’bayin a nebi, kode a ŋuro lo nebi, ama nan a kayukunit lo yidin, ko a kametanit lo kaden ki ’biet,

¹⁵ a MATAT iŋge ’dumun nan kaŋo i yuggu na yidin, a MATAT kulyani ko nan adi ti nan iti i kikiŋdyo na ŋutu kanyit Yisaraele kulya.

¹⁶ Nyenagon soŋinana yiŋge kulyaesi ti MATAT. Do kulya adi, ti nan gwe ti kikiŋdyo ŋutu ti Yisaraele ŋo narok, ti nan gwe ti tokukiŋdyo kotumit na Yisaka kulya narok.

¹⁷ Nyenagon MATAT lo kulya sona adi, Nakwan inot mo gwon a kawute i na köji, a ŋwajik kulök lulyan se ko nawate mo totokoni kak ko baŋdujin, a kak inot mo kokorakine kulye ŋutu ko pata temet, a do ko mugun inot mo twaki i jur lo paganojin, a ŋutu ti Yisaraele ’diri mo joŋani pajo ko jur lose a ’dupi.