Amosa 5 - Bibilia Buk na Ŋun nagon koti luŋu a

Ŋun a luggu lepeŋat i löpuggö na töilyet kase

¹ Ta kötumit na Yisaraele, yiŋge ta kulyaesi logon nan a delyari ta kulo adi.

² Kotumit na Yisaraele gwoso ŋuro ’diet nagon aje ’doro kak a tine ŋien köti, nye aje kölöki kak kanyit i jur, a ŋutu gwe ’bayin lo ’biluŋdya lepeŋ ki.

³ Kogwon MATAT ŊUN lo kulya adi, I kotumit na Yisaraele köji nagon ŋutu aliŋ a tu kaŋo i gor na, ŋutu mia geleŋ mo lo pituŋdyö, a köji nagon ŋutu mia geleŋ a tu kaŋo i gor na, a ŋutu puök mo lo pituŋdye ka ’de.

⁴ Kogwon nan MATAT lo kulya ko kötumit na Yisaraele adi, Ga ’yi ta nan anyen ta gwon jörun;

⁵ ama an ta ko ga ’yu ta paret Betele, an ta ko tu ta Giligala, an ta ko lwöpöddu ta Ber-seba, kogwon ŋutu ti Giligala mo ’diri joŋa a ’dupi, a Betele mo worani a ŋo kana.

⁶ Ga ’yi ta MATAT anyen ta gwon jörun, an lepeŋ yulöpökiŋdyö i kötumit na Yosepa gwoso kimaŋ, a ’yuŋe ’yuŋa, a ŋutu gwe ’bayin Betele logon peŋga nye.

⁷ Woidio, ta ŋutu logon löpuggö ’duŋgo na rigwo a ŋo na pötwör gwoso lo ’burtölöŋ, a gubakiŋdye loti lo rigwo kak!

⁸ Kagweyanit lo kaser Nyunyumi ko kaser lo luŋu a Kajikök, lepeŋ a löpuggö mudwe logon adi ’dii a ko ’bure, a tomudweji tuparan a tukwaje, a luŋgi pioŋ ti tör duma na ’balaŋ a ’bukökiŋdye se i kak lo, karin kanyit a MATAT.

⁹ A nye tiŋdi tukaret i yulöpökiŋdyö i ŋutu ti riŋitön, nyena a tukaret poki i pirit nago na titiyu.

¹⁰ ŋuto logon tökoŋu ’bura i pirit na putet lo mamana, a ŋuto lo jambu to ’diri lo pisarikin pisarikin.

¹¹ Nyenagon kogwon ta a ryoka-kiŋdya lomerika kak, a ri ’dikiŋdye lepeŋat i ’buggö na usur lo ’bolot.ma ’di kodyo ta a ’duggö kadijik ko ŋurupö lo tuturu, ama a ta mo tine si ’da kata; ma ’di kodyo ta aje ’yuddu lukobiot ti kaden lo ’but ti binyo, ama a ta mo tine möju binyo kase.

¹² Kogwon nan MATAT deden toronjin kasu na kona aka ko se muda, nan deden lyaŋesi kasu jore parik— ta logon sasaŋdu ŋutu logon ’bak kulya, a ta wuji ŋo nagon ropaki a Iwon, a dukaddi ŋutu lo yoŋo ŋo kulo a swot i pirit na putet.

¹³ Nyena ŋuto logon a lotolok mo yiŋa taliŋ i diŋit gwoso ŋina; kogwon ŋina a diŋit naron.

¹⁴ Ga ’yi ta kulya na ’but ti gwon a kulya narok, anyen ta boŋo gwon jorun, nyena a MATAT ŋun lo kurumi mo gwe ko ta, gwoso na kulyari ta adi lepeŋ kata na.

¹⁵ Maŋdi ta kulya narok, nyaŋi ta kulya na ’but, ’duŋge ta putesi gwogwo i piriton ti putesi; kode ŋona MATAT ŊUN lo kurumi mo wowon konyen ko ŋutu lo pituŋdyö ti kötumit na Yosepa.

¹⁶ Nyenagon nan MATAT ŋun lo kurumi kulya adi, ŋutu mo lulujö i piriton liŋ nagon a terereki; a kulye mo gwine i kikolin liŋ adi, Wöidiö, woidio! A kakuruk luŋuni i delya, a ŋutu logon a mirya ti delya kulo luŋuni i lulujö,

¹⁷ a ŋutu luluje i lukobiot ti kaden ti binyo, kogwon nan mo Iwolwöŋöddu kasu kiden. Kilo a kulyaesi kwe ti MATAT.

¹⁸ Wöidiö ta logon yöŋö adi ti lor lo MATAT poni po! Nyo nagon ta yöŋo lor lo MATAT? Nye a lor logon a mudwe ti gwon a parara.

¹⁹ A ta mo gwe gwoso ŋuto logon wökön kaŋo ko kömiru kölumbö a torumbe ko gworoŋ, kode gwoso ŋuto logon lupö kadi a tökokiŋdye könin lonyit i gorom a munu toggi lepeŋ.

²⁰ ŋona lor lo MATAT gwon a mudwe ’bayin a parara, iŋkoi, nye ŋona a lurwö a kolor tine loja le?

²¹ Nan MATAT maman ko lalaun roriot kasu, a nan tine lyöŋon ko momoresi kasu temejik.

²² Ma ’di ködyö ta a ’yurakiŋdya nan rubaŋgajin kasu ’buluŋ se ko ’bolot ’dokesi a nan mo tine ’bon se, a nan mo tine ’bon meddya toro ’bo kasu lopir logon a ti rubaŋgajin ti taliŋ.

²³ An ta ko yulukiŋdyö ta nan kölisi, nan ti ’bon yioga ta i ju ’yö na rababajin.

²⁴ Ama ti ’duŋo na putesi gwogwo konani kona parik gwoso karya lo ’bukuŋdyo kak, ko ti loti lo rigwo konani kona parik gwoso kare lo ’do ’dokon ŋupi.

²⁵ Ta kötumit na Yisaraele, ta ŋona a jakiŋdya nan rubaŋgajin se ko ’dokesi i kiŋajin merya iŋwan na gwoŋdi ta i yobu nu le?

²⁶ iŋkoi, ta mo yeyegga Sakut mor losu se ko Kaiwan kaserökoti logon a ŋun losu, kilo a nyömuejin kasu logon ta aje tetenakin ’borik anyen kwakwasa;

²⁷ nyenagon a nan mo joŋgi ta i to ’dupien i lu swöt lo Damaseke. Kilo a kulaesi kwe ti MATAT; karin kwe a ŋun lo kurumi.