Amosa 4 - Bibilia Buk na Ŋun nagon koti luŋu a

¹ Ta kisuk ti Basan, yiŋge ta kune kulya, ta nagon si ’da i mere lo Samaria, ta nagon ru ’ya ŋutu lomerika, ta nagon ryokakiŋdya ŋutu lo yöŋö ŋo kulo kak, ta nagon kulya ko lyan kasu adi, Taki ta yi ŋo na mamata.

² MATAT ŊUN aje milyeju adi, ’Diri ’diri gwoso na gwoŋdi nan a loke na, perok mo popokin kasu ki logon merok mo joŋgi ta kaŋo a ŋwaka ko witiöt, a pitönö kasu mo jiköni ko jabadalan.

³ A ta mo lupöni kaŋo i piritön nagon aje tutulujö i gorom nagon a mariŋ, ŋutu liŋ geleŋ geleŋ tu gwo, a ta mo ratajine kaŋo i pirit na luŋu a Amon. Kilo a kulyaesi kwe ti MATAT.

ŋutu ti Yisaraele a ko löpuggö ma ’di nagon ŊUN a ririŋ se

⁴ Poŋdi ta Betele ni, ko toroŋdi ta aka; poŋdi ta Giligala, ko koŋdi ta toronjin jore aka; joŋdi ta rubaŋgajin kasu temba i ko ’bure, joŋdi ta ŋo kasu topuökisi temba i perok musala.

⁵ ’Yuŋe ta rubaŋgajin kasu lyöŋesi logon ’bak kape, layiara ta adi ti ŋutu ’doggi ’dogga ko tupalikan na töili, tokuörö ta kine kulya, kogwon ta ŋutu ti Yisaraele nya-nyar koŋdya sona! Kilo a kulyaesi kwe ti MATAT ŊUN.

⁶ Nan MATAT lo kulya adi, Nan aje tikin kutusen kasu i teteyon i köjinö kasu liŋ, ko ’bakan na kinyo i piritön kasu liŋ, ama a ta gwe a ko yitwe köyö ni.

⁷ Nan ko mugun nio köti aje tiŋikiŋdyö ta kudu i diŋit nagon yoŋgi yapala musala anyen gwon a diŋit ŋeret; a nan to ’doji kudu i nene köji a tine to ’doju i nene; a kudu ’done i nene melesen a tine ’don i nene; a melesen nagon kudu a ko ’don kata na iŋge teteyon.

⁸ Nyena a ŋutu ti köjinö murek kode musala luŋoro i nene köji i möju na pioŋ, ama a kure nase gwe a ko tolika; ama a ta gwe a ko yitwe köyö ni. Kilo a kulyaesi kwe ti MATAT.

⁹ Nan aje gwut ta ko köbunöt toliliket se ko buggi, nan a koŋu meleseno kasu ko luköbiöt kasu ti kaden ti binyo; a mayat iŋge nyö kaden kasu ti ki ’biet ko kaden kasu ti jeitun; ama a ta gwe a ko yitwe köyö ni. Kilo a kulyaesi kwe ti MATAT.

¹⁰ Nan aje sunyukin ta twanti iŋgo gwoso lo Ejipeto; a nan iŋge tatuja teton kasu ko baŋdujin; a nan joŋgi kusanjin kasu; a nan iŋge tin mon na merajin kasu i möara kasu i kumesikö; ama a ta gwe a ko yitwe köyö ni. Kilo a kulyaesi kwe ti MATAT.

¹¹ A nan ŋun iŋge sopuk kulye kasu gwoso na sopuggo ŋan Sodoma ko Gomora nu, a ta koju gwe gwoso tukuyu na jekwe kaŋo i kimaŋ; ama a ta gwe a ko yitwe köyö ni. Kilo a kulyaesi kwe ti MATAT.

¹² Nyenagon ta ŋutu ti Yisaraele, kine a ŋo nagon nan mo koko-nakin ta, nyena ta ŋutu ti Yisaraele, teteŋdi ta ’borik i törumbo ko nan ŋun losu, kogwon nan mo kokonakin ta kine kulya!

¹³ Mete ta, kagweyanit lo merya ko lo köbuŋöt, lepeŋ a kwekiŋdya ŋutu yeyeesi kanyit, a teteŋdi baŋun na kak se ko sömukö, a wöröni i ko ’dulan ti kak lo, karin kanyit a MATAT ŋun lo kurumi!