Amosa 2 - Bibilia Buk na Ŋun nagon koti luŋu a

¹ Nan MATAT lo kulya adi, Nan mo ti lopuk riŋet, kogwon Moaba a koŋdya aka toronjin jore; kogwon ŋutu kanyit aje tonok kuyu ti mor lo Edom a kurök.

² Nyena a nan mo gubakiŋdye Moaba kimaŋ, a mo ’yuŋe kadijik ti Keriot ti tumatyan, a ŋutu ti Moaba mo tatuani tatua wowoŋorikin ko siraesi se ko kuta na toriot.

³ A nan mo tukaŋi kasaranit lose kase kiden, a mo tatuje temejik kase lio ko lepeŋ i pirit na geleŋ. Kilo a kulyaesi kwe ti MATAT.

⁴ Nan MATAT lo kulya adi, Nan mo ti lopuk riŋet, kogwon Yuda a koŋdya aka toronjin jore; kogwon ŋutu kanyit aje renya saresi kwe ti MATAT, a se tine ’debba kukuesi kwe lo wuro, ama ŋunyen kase logon a ’buronök logon merenyejin kase koju a keporo kulu aje togiŋa se.

⁵ Nyena a nan mo gubakiŋdye Yuda kimaŋ, a mo ’yuŋe kadijik ti Yerusalema ti tumatyan.

Yisaraele a ’dugoki putet

⁶ Nan MATAT lo kulya adi, Nan mo tine lopuk riŋet, kogwon Yisaraele a koŋdya aka toronjin jore; kogwon ŋutu kanyit tugwoŋi ŋutu lo rigwo ko gurut, a tugwoŋi ŋutu likiso Jin ko kamuka.

⁷ Lepeŋat ryokakiŋdya kusik ti ŋutu lomerika kak i ŋutut, a dukaddi ŋutu kana i swot, a monye se ko ŋuro dotoni ko ’diet na geleŋ, a karin kwe nake iŋge lawe.

⁸ A ŋutu ti Yisaraele pere kak i loki na boŋgwat nagon a ’dumwe a togwoesi kune nyona ko piriton ’yuresi liŋ ti rubaŋgajin, a lepeŋat moji binyo i kadi na ŋun lose ti ŋutu logon se aje garam kulo.

⁹ Kolumbo a nan tukaŋi ŋutu ti Amori ko lepeŋat i komor, kilo ŋutu a lojo gwoso kaden tika ko a iŋgo gwoso kaden logon a rinö. A nan tukaŋi se liŋ ju ludweki ko kokori.

¹⁰ Koti a nan iŋge jon ta kaŋo i jur lo Ejipeto, a nyombi ta i yobu ko kiŋajin merya iŋwan, anyen ta morga jur lo ŋutu ti Amori.

¹¹ A nan iŋge wulun kulye ŋwajik kasu a nebijin, a nan wuluŋdye kulye ŋutu kasu teton anyen gwon a Najir. Kine kulya ti gwon sona le, ta ŋutu ti Yisaraele? Kilo a kulyaesi kwe ti MATAT.

¹² Ama ta a ri ’dikiŋdya ŋutu logon a Najir i möju na binyo, a ta sarakiŋdye nebijin adi ti se gwe ti keju kwoŋ.

¹³ Mete ta, a nan mo rudakiŋdye ta kak kasu i pirit gwoso arabia logon a sopa pomoni ko kusik ti ’bolot.

¹⁴ ŋuto lo wowoki ’de ’de mo ti ryö pirit ’danaet, a ŋuto logon ko riŋit mo tolikiŋdye riŋit nanyit, ma di ŋuto wa mo ti lwok mugun;

¹⁵ a ŋuto lo morga daŋ mo tine gwo ’dan, a ŋuto logon mokosi pa ’de ’de i wokon lo mo tine Iwoggu mugun, ma ’di ŋuto lo wokon ko kusan mo ti lwok ru nanyit;

¹⁶ a i ŋilu lor a ŋuto wa logon ko toili a iŋgo mo woki kaŋo a limu kana. Kilo a kulyaesi kwe ti MATAT.