JÉSUS-CHRIST I DYASIN FE'N BO LUC KLELI'N 9 - NYANMIƐN NDƐ'N 1998

Sran blu-nin-nnyɔn bɔ Jésus sunmannin be'n

¹ Jésus flɛli i sɔnnzɔnfuɛ blu-nin-nnyɔn mun, ɔ mannin be kwlalɛ yɛ ɔ seli be kɛ ɔ jin be sin, ɔ man asiɛ usu'm be kwlaa be ´sro be, ɔ man be ´yo tukpacɛfuɛ'm be juejue.

² Kɛ ɔ nin be wieli ngaliɛ sɔ'n di'n, ɔ seli be kɛ be ko kan Nyanmiɛn sielɛ'n i ndɛ nan be `jao tukpacɛfuɛ mun.

³ Ɔ seli be ekun kɛ kɛ be ´kɔ'n, nán man be fa like fi tra nun, kpɔnman o, trɔ o, like diwa o, sika o, yɛ nán man be fa tralɛ nnyɔn-nnyɔn.

⁴ I waan awlo kwlaa nga be wlu nun'n, be tran lɛ lele san be kɔlɛ a ju.

⁵ Yɛ klɔ kwlaa nga be sɔ-man be nun su'n, kɛ be ´tu be bo lɛ'n, be `kpukpu bé ja wun ndutre'n guɛ i klɔ sɔ'n su, man ɔ yo be lalofuɛ.

⁶ Be ɔli, be wlannin klɔ'm be su, be kannin jasin fɛ'n, yɛ be yoli tukpacɛfuɛ'm be juejue lika kwlaa.

Erɔd i akunndan sannganlɛ

⁷ Erɔd b'ɔ sie nvle'n i bue'n, ɔ tili sa nga be yo'n i kwlaa, ɔ man ɔ'a wun-man akunndan kun ng'ɔ bu-ɔ, afin sran wie'm be waan, Zan yɛ ɔ'a cɛn-ɔn.

⁸ Wie'm be waan Eli yɛ ɔ'a fite-ɔ, yɛ wie'm be kusu be waan, Nyanmiɛn nuan ijɔfuɛ laa'm be nun kun yɛ ɔ'a cɛn-ɔn

⁹ Sanngɛ Erɔd seli kɛ: «N yoli man be kpɛli Zan ti'n. ?Yɛ sran nga be kɛn i ndɛ yɛ'n, wuun waan-an?» I sɔ'n ti'n, ɔ klo kɛ ɔ ´wun Jésus.

Sran akpi nnun (5.000) bɔ Jésus mannin be like be dili'n

¹⁰ Kɛ be bɔ Jésus sunmannin be'n be bali'n, be kannin like nga be yoli'n i kwlaa kleli i. Ɔ fali be nan b'a ɔ be ngunmin klɔ bɔ be flɛ i Bɛtsaida'n su.

¹¹ Kɛ sran'm be tili i kɛ ɔ'a ɔ lɔ'n, be suli i su. Ɔ sɔli be nun, ɔ kan Nyanmiɛn sielɛ ndɛ'n kleli be, yɛ ɔ yoli be nga kusu bɔ be ti-man juejue'n be juejue.

¹² Kɛ lika'n wa jɔ'n, i sɔnnzɔnfuɛ blu-nin-nnyɔn'm be bɛli i wun lɛ nan b'a se i kɛ: «Se sran mun man be wɔ klɔ nin nanmue nga be mantan wa'n be nun be ko kunndɛ sikewlɛ nin like diwa, afin kan e o wa'n ti blo.»

¹³ Jésus seli be kɛ: «An bɔbɔ an `man be like man be di.» Yɛ be waan: «Kpaun nnun nin kpatra nnyɔn yɛ ɔ o é sa nun-ɔn, wuun san e bɔbɔ e ´ko to like yɛ e fa blɛ minniɛn nga'm be ngba-a .»

¹⁴ Yasua nga be o lɛ'n, be ju bɔ akpi nnun (5.000) kun. Yɛ Jésus seli i sɔnnzɔnfuɛ'm be kɛ: «An `se be man be tran ase nyanman-nyanman ablenun-ablenun.»

¹⁵ Be ko seli be, nan b'a tran ase.

¹⁶ Jésus fali kpaun nnun'n nin kpatra nnyɔn'n, ɔ mɛn i nyin su niannin nyanmiɛn su lɔ, yɛ ɔ lali Nyanmiɛn ase. Yɛ ɔ bubuli nun, ɔ fa mɛnnin i sɔnnzɔnfuɛ'm be kɛ be fa cɛ sran sɔ mun.

¹⁷ Be kwlaa be dili, be ku yili, nan b'a isɛ i onga-onga'n gbogbo blu-nin-nnyɔn.

Wafa nga Piɛr bu kɛ Jésus ti b'ɔ kannin'n

¹⁸ Le kun kɛ Jésus nin i sɔnnzɔnfuɛ'm be ngunmin be o lɛ b'ɔ ´koko yalɛ kle Nyanmiɛn'n, ɔ usali be kɛ: «?Sran'm be waan, wan yɛlɛ min?»

¹⁹ Yɛ be seli kɛ: «Sran wie'm be waan Zan batɛm yofuɛ'n yɛlɛ wɔ, wie kusu wan Eli yɛlɛ wɔ, wie'm be kusu be waan Nyanmiɛn nuan ijɔfuɛ laa'm be nun kun yɛ ɔ'a cɛn-ɔn.»

²⁰ Yɛ ɔ usali be kɛ: «?Amun kusu amun waan wan yɛlɛ min?» Piɛr seli i kɛ: « A ti Nyanmiɛn i Krist.»

Jésus i kunlɛ nin i cɛnlɛ i su bolɛ

²¹ Jésus wlali bé su nun kpa kɛ nán man be kɛn i sɔ kle sran fi.

²² Yɛ ɔ seli be ekun kɛ: «Kannzɛ ɔ yo sɛ, san m bɔ n kacili Sran'n n ´wun nyrɛnnɛn dan, kpɛnngbɛn mun nin Nyanmiɛn nyrun jranfuɛ dandan mun nin mmla klefuɛ'm be su sɔ-man min nun, be ´kun min, yɛ i le nsan su n ´cɛn.»

²³ I sin, ɔ seli be kwlaa be kɛ: «Sran nga i waan ɔ ´su n su'n, man ɔ klɛn i wun man min, yɛ ɔ `suɛ i waka'n cɛn kwlaa ɔ su n su.

²⁴ Afin sran nga i waan ɔ ´sɛsɛ i wun'n, ɔ ´kpɛ i nguan'n sin, sanngɛ sran ng'ɔ kpɛ i nguan'n sin min ti'n, sran sɔ'n ɔ sɛsɛ i nguan'n sakpa.

²⁵ ?Sɛ sran kun nyan mɛn wunmuan'n nan sɛ ɔ saci i wun annzɛ sɛ i nguan'n kpɛ sin'n, nguɛ yɛ ɔ yo ye mɛn i-ɔ?

²⁶ M bɔ n kacili Sran'n m ´ba, sran'm be ´wun kɛ min nin min Si nin min Si i anz mun e nyrun'n ti nyannyan ɔ yo sro. Sran nga bɔ min nin min ndɛ'n ti nyannzuɛn kun i'n, kɛ m ´ba sɔ'n, nyannzuɛn ɔ'a kun min sran sɔ'n ti.

²⁷ Nanwlɛ, be nga be o wa yɛ'n, nán be ngba yɛ wie'n ´kun be nan Nyanmiɛn ɔ'a yi i famiɛn'n nglo ɔ'a kle be-ɔ.»

Jésus i wunnɛn'n i kacilɛ

²⁸ Kɛ Jésus kannin ndɛ sɔ'n b'ɔ di le mɔcuɛ kun'n, ɔ fali Piɛr nin Zan, yɛ Zak, be fuli oka kun su kɛ ɔ nin Nyanmiɛn be ko koko yalɛ.

²⁹ Kɛ be ´koko yalɛ sɔ'n, i nyrun'n kacili, yɛ i tralɛ'n kacili ufue nyɛnnyɛnnyɛn.

³⁰ Kpɛkuun sran nnyɔn be nin i su ijɔ, kun yɛlɛ Moiz, yɛ kun yɛlɛ Eli.

³¹ Be nyrun'n ti nyannyan ɔ yo sro. Be su kɛn i kunlɛ bɔ be su ko kun i Zerizalɛm lɔ'n i ndɛ.

³² Lafilɛ'n fali Piɛr nin i wiengu mun. Kɛ be tinngeli cɛ'n, be wunnin Jésus bɔ i nyrun'n ti nyannyan ɔ yo sro'n, ɔ nin sran nnyɔn bɔ be nin i o lɛ'n.

³³ Kɛ sran sɔ'n be yacili Jésus lɛ bɔ be ´kɔ'n, Piɛr seli Jésus kɛ: «Baba, kɛ e o wa yɛ'n ɔ ti kpa, man e kplan kpata nsan, ɔ liɛ kun, Moiz liɛ kun, yɛ Eli liɛ kun.» I wun b'ɔ bli i'n ti'n, ɔ wun-man ndɛ kun ng'ɔ kan-an.

³⁴ I nuan nian tɔ-man, kpɛkuun be ´nian-an, Nyanmiɛn ufue kun su kata bé su. Kɛ ɔ ´kata be su sɔ'n, srɛ kunnin i sɔnnzɔnfuɛ mun.

³⁵ Be tili sran kun nɛn nyanmiɛn ufue sɔ'n nun, sran sɔ'n ɔ seli kɛ: «N wa bɔ n kpɛli i'n yɛ. An `tie ndɛ ng'ɔ kan'n .»

³⁶ Kɛ be tili sran nɛn sɔ'n, be ´nian-an, Jésus kunngba cɛ yɛ ɔ o lɛ-ɔ. I sɔnnzɔnfuɛ'm b'a bo-man like nga be wunnin i'n i wie fi su a kle-man sran fi blɛ sɔ'n nun.

Gbanflɛn kaan kun bɔ asiɛ usu sacili i'n i juejue yolɛ

³⁷ Kɛ aliɛ cɛnnin'n bɔ be fin oka'n su lɔ be jrali'n, sran kpanngban kpa be ɔli Jésus atin kpalɛ.

³⁸ Kpɛkuun be nun kun kpan seli kɛ: «Nja, n ´srɛ wɔ, nian min wa yasua'n, ɔ ti ba kunngba cɛ.

³⁹ Like wie tɔ i su, ɔ kpan, ɔ tɔ, ɔ kete kafiaa, i nuan nzue'n bo nglo, ɔ fɛ dan kpa, yɛ i wun kplokplo nan like sɔ'n ɔ'a tu i su.

⁴⁰ N srɛli ɔ sɔnnzɔnfuɛ mun kɛ be tu like sɔ'n, b'a kwla tu-mɛn i.»

⁴¹ Yɛ Jésus sɛli kɛ: «?Amun ajulisufuɛ nyin keklefuɛ bɔ an lafi-man sa su'n, min nin amun ´tran lele cɛn onin? ?N ´tra min anwlɛn amún wun lele cɛn onin? Fa ɔ́ wa'n blɛ min.»

⁴² Kɛ bakan sɔ'n ɔ wa ju Jésus wun lɛ'n, like sɔ'n tɔli i su, ɔ tɛli i ase, ɔ keteli i kafiaa. Jésus ijɔli like b'ɔ saci bakan sɔ'n, ɔ yoli i juejue, nan ɔ'a fɛ i a mɛn i si.

⁴³ Ɔ man be kwlaa be wunnin kɛ Nyanmiɛn'n ti kpli sakpa. Like kwlaa nga Jésus yo'n ɔ bo sran'm bé nuan, yɛ ɔ seli i sɔnnzɔnfuɛ'm be kɛ:

Jésus boli i kunlɛ'n su ekun

⁴⁴ «Amun liɛ'n, ndɛ nga m ma kɛn i yɛ'n, an `fa sie amun klun kpa. Be wa fa m bɔ n kacili Sran'n man sran mun.»

⁴⁵ Sanngɛ i sɔnnzɔnfuɛ'm b'a wun-man ndɛ sɔ'n i wlɛ, afin ɔ ti-man weiin be nyrun. Ɔ kɛn i sɔ nan nán be wun i wlɛ. Srɛ kun be ti b'a kwla usa-man ndɛ sɔ'n nun.

Sran ng'ɔ ti dan tra be kwlaa'n

⁴⁶ Akplowa wie tɔli i sɔnnzɔnfuɛ'm be afiɛn kɛ be ´wun be nun sran ng'ɔ ti sran dan tra be kwlaa'n.

⁴⁷ Kɛ Jésus wunnin be akunndan nga be bu'n, ɔ fa ba kaan kun jrɛnnin i wun lɛ, yɛ ɔ seli be kɛ:

⁴⁸ «Sran ng'ɔ sɔ bakan nga nun n dunman nun'n, wuun m bɔbɔ min yɛ ɔ'a sɔ min nun-ɔn, yɛ sran ng'ɔ sɔ min nun'n, wuun sran b'ɔ sunmannin min'n i nun yɛ ɔ'a sɔ-ɔ. Afin sran ng'ɔ ti amun kwlaa amun nun kaan'n, i sɔfuɛ'n yɛ ɔ ti dan-an.»

Bian b'ɔ fuan asiɛ usu'n

⁴⁹ Zan seli kɛ: «Baba, e wunnin bian kun b'ɔ fa ɔ dunman'n fuan asiɛ usu, yɛ e seli i kɛ nán man ɔ fuan be kun yɛlɛ kɛ ɔ nun-man e bɔ e su wɔ su'n e nun wie.»

⁵⁰ Yɛ Jésus seli i kɛ: «Nán an se i kɛ, nán man ɔ fuan be, afin sran ng'ɔ nin amun lɛ-mɛn'n, ɔ jin amún sin.»

B'a sɔ-man Jésus nun Samari lɔ

⁵¹ Kɛ cɛn nga Nyanmiɛn wa fa Jésus kɔ nyanmiɛn su'n mantannin'n, i waan, san ɔ ´kɔ Zerizalɛm, nan ɔ'a sunman sran i nyrun lɔ.

⁵² Be fali atin'n be ɔli, be juli Samari klɔ kun su, be wluli klɔ'n nun, be waan be ´ko kunndɛ sikewlɛ man Jésus.

⁵³ Sanngɛ ɔ su kɔ Zerizalɛm ti b'a sike-mɛn i.

⁵⁴ Kɛ ɔ yoli sɔ'n, i sɔnnzɔnfuɛ Zak nin Zan be seli i kɛ: «?Nannan, e yo man sin fin nyanmiɛn su lɔ ɔ wa yra be ?»

⁵⁵ Ɔ kpɛli i nyin be wun lɔ ɔ ijɔli be kpa. (Ɔ seli be kɛ: «An si-man akunndan nga an bu'n, afin m bɔ n kacili Sran'n m'an ba-man sran'm be sacilɛ, be delɛ ti yɛ m bali-ɔ.)»

⁵⁶ Nan b'a ɔ klɔ uflɛ su.

Like nga be yo nan b'a su Jésus su'n

⁵⁷ Kɛ be fali atin'n bɔ be ´kɔ'n, sran kun seli Jésus kɛ: «Lika kwlaa nga a ´kɔ'n, min nin wɔ e ´kɔ.»

⁵⁸ Jésus seli i kɛ: «Solongbi'm be lɛ kunman la nun, yɛ anunman'm bɔ be tu sin'n, be lɛ lawlɛ, sanngɛ m bɔ n kacili Sran'n n lɛ-man lika bɔ n la nun de wunmiɛn bɔ kaan-an.»

⁵⁹ Ɔ seli kun ekun kɛ: «Su n su.» Sran sɔ'n seli Jésus kɛ: «Man min atin man n ko sie min si ka.»

⁶⁰ Yɛ Jésus seli i kɛ: «Yaci be bɔ be wu'n man be sie be sran mun, sanngɛ ɔ liɛ'n, ko kan Nyanmiɛn sielɛ'n i ndɛ'n.»

⁶¹ Yɛ kun ekun seli kɛ: «Nja, n ´su wɔ su wie, sanngɛ man min atin man n ko kale min awlofuɛ mun ka.»

⁶² Yɛ Jésus seli i kɛ: «Sran ng'ɔ tra saru nun nan ɔ niɛn i sin'n, ɔ kwla di-man Nyanmiɛn sielɛ'n i junman'n wie.»