Ezekiɛl 48 - NYANMIƐN NDƐ'N 1998

Akpasua nga be o nglo lɔ'n be asiɛ liɛ'n

¹ «Akpasua'm be nin be asiɛ'm be yɛ. Dan i asiɛ lika liɛ'n ɔ ´tran nglo lɔ atin ng'ɔ sin Ɛtlɔn b'ɔ o Amat nin Azar-Enan bé wun lɛ'n. Ɔ ´fɛ i wia afiliɛ lɔ anyialiɛ su lele fa ju Mediterane jenvie ng'ɔ o wia atɔliɛ'n su.

² Kɛ ɔ fɛ i wia afiliɛ fa ju wia atɔliɛ Azɛr i asiɛ liɛ'n ɔ mantan Dan liɛ'n,

³ Nɛftali i asiɛ lika liɛ'n ɔ mantan Azɛr liɛ'n,

⁴ Manase i asiɛ lika liɛ'n ɔ mantan Nɛftali liɛ'n,

⁵ Efraim i asiɛ lika liɛ'n ɔ mantan Manase liɛ'n,

⁶ Ribɛn i asiɛ lika liɛ'n ɔ mantan Efraim liɛ'n,

⁷ Zida i asiɛ lika liɛ'n ɔ mantan Ribɛn liɛ'n.»

Anannganman i lika liɛ'n

⁸ «Zida lika liɛ i nuan'n su lɛ'n, kɛ ɔ fɛ i wia afiliɛ b'ɔ fa ju wia atɔliɛ'n, man be yaci lika kun lɛ bɔ i tɛnndɛn nun'n nin akpasua onga'm be lika liɛ be tɛnndɛn nun ɔ `sɛ, yɛ man i tɛtrɛ nun'n ɔ `yo kilo blu-nin-nnyɔn nin sin. Be `kplan Nyanmiɛn i sua'n lika sɔ'n i afiɛn sɛsɛ.

⁹ Man lika ng'ɔ ti Anannganman liɛ'n i tɛnndɛn nun'n ɔ yo kilo blu-nin-nnyɔn nin sin.

¹⁰ Lika sɔ bɔ be ´fa man Nyanmiɛn nyrun jranfuɛ mun'n, kɛ ɔ fɛ i wia afiliɛ b'ɔ ´fa ju wia atɔliɛ'n, ɔ `ju kilo blu-nin-nnyɔn nin sin. Kɛ ɔ fɛ i ngua lɔ b'ɔ ´fa ju nglo'n lɔ, ɔ `yo kilo nnun. Man be kplan Anannganman i sua'n i afiɛn sɛsɛ.

¹¹ Man lika sɔ'n ɔ yo Nyanmiɛn nyrun jranfuɛ nga be ti i liɛ klonglo bɔ be fin Zadɔk osu nun'n be liɛ. Nyanmiɛn nyrun jranfuɛ sɔ'm be niannin Anannganman i junman'n su be dili i kpa. B'a yo-man kɛ Levifuɛ bɔ blɛ bɔ Izraɛlfuɛ'm be kacili be sin be sili Nyanmiɛn'n be kusu be wanndili i'n sa.

¹² I sɔ'n ti yɛ be wa nyannin lika ng'ɔ ti kpa b'ɔ ti Nyanmiɛn liɛ klonglo nin-ɔn. Ɔ nin Levifuɛ'm be liɛ'n mantan su.

¹³ Levifuɛ'm be lika liɛ'n nin Nyanmiɛn nyrun jranfuɛ'm be liɛ'n sɛ. Man be lika nnyɔn sɔ'n be tɛnndɛn'n nun'n ɔ yo kilo blu-nin-nnyɔn nin sin. Yɛ be tɛtrɛ nun'n ɔ `yo kilo nnun.

¹⁴ Mɛn'n i lɛ lika sɔ'n ɔ ti kpa tra be kwlaa. Lɛ b'ɔ ti Anannganman i liɛ klonglo'n, be kwla fa kaci-man asiɛ uflɛ, be kwla yo-mɛn i atɛ, yɛ be kwla fa cɛ-man.»

Lika ng'ɔ ti klɔ i lika'n, yɛ wlengbi'm be lika liɛ'n

¹⁵ «Asiɛ sɔ'n su'n, be `yaci lika bɔ i tɛtrɛ nun'n ɔ ´yo kilo nnyɔn nin sin, yɛ i tɛnndɛn nun'n ɔ yo kilo blu-nin-nnyɔn nin sin. Ɔ ´yo asiɛ kun b'ɔ ti sran nga be o klɔ nun'n be kwlaa be liɛ. Be ´fa kplan be sua mun nin be gbo mun. Yɛ klɔ'n ɔ ´trɛn i afiɛn.

¹⁶ Man i bue nnan ngba sɛ, bue kun ´yo mɛtri akpi nnyɔn mɛtri ya nnyɔn mɛtri ablenun (2.250).

¹⁷ Klɔ i bue nnan'm be su'n, be `yaci lika ngbɛn b'ɔ ´ju mɛtri ya mɛtri ablaɔn-nin-nnun lɛ.

¹⁸ Kɛ ɔ fa san Nyanmiɛn i lika'n i tɛnndɛn nun'n, man be yaci lika kun bɔ i tɛnndɛn nun'n ɔ ´yo kilo nnun klɔ i wia afiliɛ lɔ. Lɛ yɛ klɔfuɛ'm be ´di fie yɛ be ´nyan be aliɛ-ɔ.

¹⁹ Be kwlaa nga be tran klɔ nun'n, be akpasua kwlaa nga be fin su'n, be kwla di nun fie.

²⁰ Lika ng'ɔ ti Nyanmiɛn liɛ'n i kwlaa nin klɔ i lika liɛ'n, man i bue nnan ngba sɛ. I bue kun ´yo kilo blu-nin-nnyɔn nin sin.

²¹ Ng'ɔ ka lɛ'n, ɔ ´yo wlengbi'n i liɛ. I lika liɛ'n ɔ ´tran Nyanmiɛn i lika'n nin klɔ'm be bue kun wa yɛ ɔ ´ju be bue kun lɔ. Ɔ ´ja akpasua kun'm be asiɛ liɛ'n i tɛnndɛn nun, yɛ i tɛtrɛ nun'n ɔ ´yo kilo blu-nin-nnyɔn nin sin wia afiliɛ lika nun lɔ'n, ɔ ´fɛ i lɛ lele ´ju anyialiɛ ng'ɔ o wia atɔliɛ lɔ'n su. Yɛ wia atɔliɛ lika liɛ nun lɔ'n, ɔ ´fɛ i lɔ lele ´ju Mediterane jenvie su'n. Lika nga be fa wlali Anannganman sa nun'n nin Nyanmiɛn i sua'n be ´ka mɛn'n i lika nga be sieli i ngunmin'n nun.

²² Man Levifuɛ'm be lika'n nin klɔ'n i kplanwlɛ lika'n be kpɛ wlengbi'm be lika liɛ'n nun nnyɔn. Man wlengbi be lika sɔ'n ɔ tran Zida lika liɛ b'ɔ o nglo lɔ'n nin Bɛnzamɛn liɛ b'ɔ o ngua'n be afiɛn.»

Akpasua nga be o ngua lɔ'n be asiɛ liɛ'n

²³ «Akpasua kun'm be nin be asiɛ liɛ'm be yɛ: Bɛnzamɛn i liɛ'n ɔ kɔ lele anyialiɛ ng'ɔ o wia afiliɛ lɔ'n nin Mediterane jenvie'n b'ɔ o wia atɔliɛ lɔ'n su.

²⁴ Bɛnzamɛn liɛ'n i wun lɛ'n, kɛ ɔ fɛ i wia afiliɛ'n bɔ ´fa ju wia atɔliɛ'n, Simeɔn akpasua i lika liɛ'n yɛ ɔ o lɛ-ɔ.

²⁵ Simeɔn wun lɛ'n, Isakar liɛ'n yɛ ɔ o lɛ-ɔ.

²⁶ Isakar wun lɛ'n, Zabilɔn liɛ yɛ ɔ o lɛ-ɔ,

²⁷ Zabilɔn wun lɛ'n, Gad liɛ'n yɛ ɔ o lɛ-ɔ,

²⁸ Gad i anyialiɛ ng'ɔ o ngua'n, i yɛ ɔ ´yo mɛn sɔ'n i anyialiɛ nin-ɔn. Ɔ ´fɛ i Tamar bɔ o wia afiliɛ lɔ'n su, ɔ ´sin Kadɛs, ɔ ´ju Mɛriba i nzue bo'n su lɛ. I sin ɔ ´ko sin Ezipt nzue dan'n i wun lele ɔ ´to Mediterane jenvie'n kpɔ.

²⁹ Mɛn nga bɔ amun wa cɛcɛ nun, Izraɛl akpasua'm be afiɛn'n nin wafa nga amun ´fa cɛcɛ nun yɛ ɔ o lɛ-ɔ.» Anannganman Nyanmiɛn yɛ ɔ kan sɔ-ɔ.

Zerizalɛm i anuan blu-nin-nnyɔn mun

^30-31 E wa bobo Zerizalɛm i anuan blu-nin-nnyɔn bɔ Izraɛl akpasua'm be dunman'm be o be su sɛsɛ'n. Mɛn'n i nglo lɔ talɛ'n, bɔ i tɛnndɛn nun'n ɔ ´yo mɛtri akpi nnyɔn mɛtri ya nnyɔn mɛtri ablenun'n (2.250), i su anuan nsan'm be yɛ: Ribɛn anuan'n, Zida anuan'n, yɛ Levi anuan'n.

³² Wia afiliɛ lɔ talɛ'n ɔ ´yo mɛtri akpi nnyɔn mɛtri ya nnyɔn mɛtri ablenun (2.250). I su anuan nsan nsan'm be yɛ: Zozɛf anuan'n, Bɛnzamɛn anuan'n, yɛ Dan anuan'n.

³³ Ngua lɔ talɛ'n i tɛnndɛn nun'n i kunngba nin-ɔn. I su anuan nsan mun yɛ: Simeɔn anuan'n, Isakar anuan'n, yɛ Zabilɔn anuan'n.

³⁴ Wia atɔliɛ lɔ talɛ i tɛnndɛn nun'n, i kunngba nin-ɔn. I su anuan nsan'm be yɛ: Gad anuan'n, Azɛr anuan'n, yɛ Nɛftali anuan'n.

³⁵ Talɛ ng'ɔ sin yia klɔ'n i kwlaa i tɛnndɛn nun'n ɔ ´yo mɛtri akpi ngwlan (9.000). Kɛ ɔ fin lɛ'n, be wa flɛ klɔ'n kɛ: Anannganman'n Wo Lɛ .