Online Bible

YUHANA 1 - Bisã Bible 2005

Yesu Kirisi suna andunia gũn

¹ Zaa káaku Yã kun, Yã pì kú kũ Ludao, Yã pìimɛ Luda ũ.

² À kú kũ Ludao zaa káaku.

³ Luda pɔ́ sĩnda pínki kɛ̀ a gãimɛ, pɔ́ke kun kũ à kɛ̀ a sariro.

⁴ A gũnn wɛ̃̀ndi kún, akũ wɛ̃̀ndii pì de gupura ũ gbɛ̃nɔnɛ.

⁵ Gupura pìi dì pu gusiran, akũ gusira pì ni le à daalaro.

⁶ Luda gbɛ̃ke zĩ̀ a tɔ́n Yahaya.

⁷ À sù gupura pìi sèedade ũmɛ, à gupura pì yã ò gbɛ̃nɔnɛ, de baadi a náani kɛ a gãi.

⁸ Àkũmɛ gupura pì ũro, à sù gupura pìi sèedade ũmɛ.

⁹ Gupura yãpurade kũ àdi gu pu gbɛ̃ sĩnda pínkinɛ mɛ́ àtɛn su andunia gũn.

¹⁰ Yã pì kú andunia gũn. Bee kũ Luda andunia kɛ̀ a gãi, andunia dí a dɔ̃ro.

¹¹ À sù a bɛa, akũ a gbɛ̃nɔ dí a síro.

¹² Gbɛ̃ kũ ò zɛ̀ kãao ò a náani kɛ̀nɔ sɔ̃, à ń gbá zɛ́ ò gɔ̃̀ Luda nɛ́nɔ ũ.

¹³ Ń inaa pì dí bo gbɛ̃ke aru gũnlo, adi bo mɛ̀futɛna ke gɔ̃gbɛ̃ pɔyeina kĩnaaro, Luda mɛ́ à ń í.

¹⁴ Yã pìi gɔ̃̀ bisãsiri ũ, à gɔrɔ pla kɛ̀ kũoo, akũ o a gakuri è, De Luda Nɛ́ mɛ̀n do légelege gakurimɛ, a gbɛ̃kɛ kũ yãpurao pɛkɛrɛana.

¹⁵ Yahaya a sèedaa kɛ̀ à pũ̀tã à pì: Gbɛ̃ kũ ma a yã òon dí, ma pì gbɛ̃ kũ àtɛn su ma gbɛra demala kũ à kun ma ã yãi.

¹⁶ Gbɛ̃kɛ pɛkɛrɛanaa gũn à gbɛ̃kɛ kɛ̀ ó baadinɛ, akũ o arubarikaa lè didikɔ̃ana.

¹⁷ Luda a doka kpàwá Musa gãi, à gbɛ̃kɛ kũ yãpurao kɛ̀wɛrɛ Yesu Kirisi gãimɛ.

¹⁸ Gbɛ̃ke dí wɛ́ si Ludalɛ zikiro. Luda Nɛ́ mɛ̀n do légelege kũ à kú a De kuru pì mɛ́ à tò ò a dɔ̃.

Yahaya Da'itɛkɛri Yesu sèedakɛnaa
( Mat 3:1-12 ; Maa 1:1-8 ; Luk 3:1-18 )

¹⁹ Yuda gbãnade kũ ò kú Yurusalɛmunɔ sa'ori kenɔ kũ Levi buri kenɔ zĩ̀ Yahayaa, akũ ò a là ò pì: Dímɛ n ũu? Yã kũ à òńnɛn dí.

²⁰ À òńnɛ súsu, adi yãke utɛńnɛro à pì: Arumasihun ma ũro.

²¹ Akũ ò a là ò pì: Dímɛ n ũ sɛ́ɛ? Iliasumɛn ũ yá? À wèḿma à pì: Oi! Akũ ò ɛ̀ra ò a là dɔ: Annabi zɔ̃kɔ̃ɔmɛ n ũ yá? À wèḿma à pì: Oi!

²² Akũ ò pìnɛ dɔ: Dimɛ n ũ sɔ̃ɔ? Ǹ owɛrɛ de ò gɛ́ ò o gbɛ̃ kũ ò ó zĩnɔnɛ. Deran ntɛn o nà n zĩda yã musuu?

²³ Akũ à pì lákũ annabi Isaya ò nà: Gbɛ̃ kũ a kòto dɔ gbárannammɛ ma ũ, kũ àtɛn pi ò zɛ́ poro Dikirinɛ.

²⁴ Gbɛ̃ kũ ò ń zĩ pìnɔ sɔ̃, ò bò Farisinɔ kĩnaamɛ.

²⁵ Akũ ò a là ò pì: Zaakũ Arumasihumɛ n ũro ke Iliasu ke annabi zɔ̃kɔ̃ɔ, bɔ́yãi ntɛni gbɛ̃nɔ da'itɛ kɛɛ?

²⁶ Yahaya wèḿma à pì: Madì gbɛ̃nɔ da'itɛ kɛ, ama gbɛ̃ke kú á tɛ́, á a dɔ̃ro.

²⁷ Àkũ mɛ́ ani su ma gbɛra, mádi ká mà a kyate bobonɛro.

²⁸ Yã pìnɔ kɛ̀ Bɛtani kũ à kú Yoda bara diremɛ, gu kũ Yahaya tɛn gbɛ̃nɔ da'itɛ kɛn.

Sãnɛ Bɔ̀rɔ kũ Luda kpàa

²⁹ Kũ gu dɔ̀, Yahaya Yesu è àtɛn su a kĩnaa, akũ à pì: Sãnɛ Bɔ̀rɔ kũ Luda kpà à andunia durunna gon dí.

³⁰ Gbɛ̃ pì yãn ma ò yã ma pì, gbɛ̃ kũ àtɛn su ma gbɛra demala, kũ à kun ma ã yãi.

³¹ Má a dɔ̃ yãro, ama ma su, matɛn gbɛ̃nɔ da'itɛ kɛ de Isarailanɔ a dɔ̃ yãimɛ.

³² Yahaya a sèedaa kɛ̀ à pì: Ma è Luda Nini bò ludambɛ lán potɛ̃nɛ bà, à sù à zɔ̃̀a.

³³ Mádi a dɔ̃ yãro. Kũ Luda ma zĩ gbɛ̃nɔ da'itɛ kɛ, à pìmɛnɛ gbɛ̃ kũ ma è a Nini sù à kìpaa, àkũ mɛ́ ani gbɛ̃nɔ da'itɛ kɛ kũ Nini pìio.

³⁴ Ma abirekũ è, akũ ma a sèedaa kɛ̀ kũ àkũmɛ Luda Nɛ́ ũ.

Yesu ìba káakunɔ

³⁵ Kũ gu dɔ̀, Yahaya ɛ̀ra à kú gwe dɔ kũ a ìba gbɛ̃nɔn planɔ.

³⁶ Kũ à Yesu è àtɛn gɛ̃tɛ, à pì: Sãnɛ Bɔ̀rɔ kũ Luda kpàan gwe!

³⁷ Kũ ìba gbɛ̃nɔn pla pìnɔ yã pìi mà, ò bò ò tɛ̀ Yesui.

³⁸ Yesu lìtɛ à è ò tɛ́ai, akũ à ń lá à pì: Bɔ́n á yeii? Ò pìnɛ: N bɛ kú mámɛɛ, Rabi? Tɔ́ pìi pì Dannɛri.

³⁹ À wèḿma à pì: À mɔ́ à gwa. Akũ ò gɛ̀ɛ ò gu kũ à kun è, akũ ò gɔ̃̀ kãao zĩ birea. Ɔkɔsi mɔ̀ siikɔ̃ taka bà.

⁴⁰ Gbɛ̃nɔn pla kũ ò Yahaya yã mà ò bò ò tɛ́ Yesui pìnɔ, ń gbɛ̃ do bi Simɔ Pita dakũna Andurumɛ.

⁴¹ À gɛ̀ɛ à a vĩ̀ni Simɔ lè gĩa, akũ à pìnɛ: O Arumasihu è. Tɔ́ pìin òdi pi dɔ Kirisi.

⁴² Akũ à gɛ̀ɛ kãao Yesu pì kĩnaa. Yesu a gwà tíii à pì: Yuhana nɛ́ Simɔmɛ n ũ. Oni pinnɛ sà Pitamɛ. Tɔ́ pìi pì gbɛ̀ɛ.

⁴³ Kũ gu dɔ̀, Yesu ye à tá Galili bùsun, akũ à dà Filipilɛ à pìnɛ: Ǹ tɛ́mai.

⁴⁴ Filipi pì bi Anduru kũ Pitao bɛ wɛ̃tɛ Bɛtɛsaida gbɛ̃mɛ.

⁴⁵ Akũ Filipi gɛ̀ɛ à Natanaɛli lè à pì: Gbɛ̃ kũ Musa a yã ò a doka gũn, akũsɔ̃ annabinɔ a yã ò dɔ, o a lè. Yusufu nɛ́ Yesumɛ. Nazɛra gbɛ̃mɛ.

⁴⁶ Natanaɛli pìnɛ: Gbɛ̃ mana ni bo Nazɛra yá? Filipi pìnɛ: Ǹ mɔ́ ǹ gwa.

⁴⁷ Kũ Yesu Natanaɛli è àtɛn su a kĩnaa, à a yã ò à pì: Isaraila yãpuraden dí, a nɛ̀sɛɛ manafiki vĩro.

⁴⁸ Akũ Natanaɛli pìnɛ: Ń ma dɔ̃ mámɛɛ? Akũ Yesu wèa à pì: Ari Filipi gɔ̃ gɛ́ n sísi, ma n e kaka lí gbáru.

⁴⁹ Akũ Natanaɛli pìnɛ: Rabi, Luda Nɛ́mɛ n ũ, Isarailanɔ kínamɛ n ũ.

⁵⁰ Yesu pìnɛ: Kũ ma ònnɛ ma n e kaka lí gbáru, akũ mɛ́ à tò n ma náani kɛ̀ yá? Ĩni yã zɔ̃kɔ̃ e de adikĩnala.

⁵¹ À ɛ̀ra à pìnɛ dɔ: Yãpuran matɛn oárɛ, áni ludambɛ e wɛ̃kɔ̃ana, Luda malaikanɔ nigɔ̃ didi Bisãsiri Nɛ́a ògɔ̃ kipaa.

« Předchozí

další »

Následuj nás:

Sponzorované odkazy

Reklamy