YƆSUA 4 - Bisã Bible 2005

Gbɛ̀ mɛ̀n kuri awɛɛplanɔ didikɔ̃ana sèeda ũ

¹ Kũ Isaraila buri sĩnda pínki bikũ̀ Yodaa ò làka, akũ Dikiri pì Yɔsuanɛ:

² Á buri mɛ̀n kuri awɛɛplanɔ tɛ́ à gbɛ̃nɔ sɛ́n dodo

³ ǹ ońnɛ ò gbɛ̀ sɛ́tɛ swawɛɛn mɛ̀n kuri awɛɛpla gu kũ sa'orinɔn zɛn súsu, ò bikũo ò kátɛ gu kũ áni in gwãaniala.

⁴ Akũ Yɔsua gbɛ̃nɔn kuri awɛɛplanɔ dìtɛ Isaraila burinɔ tɛ́ dodo, akũ à ń sísi

⁵ à pìńnɛ: À gɛ́ Yoda wɛ̀ɛn Dikiri á Luda àkpati arɛ, á baadi gbɛ̀ sɛ́ à di a gã̀n á Isaraila burinɔ dasi lɛ́n.

⁶ Gbɛ̀ dínɔ ni gɔ̃árɛ sèeda ũ. Tó á nɛ́nɔ á lá zia, bɔ́n gbɛ̀ dínɔ deárɛ a ũu,

⁷ à pińnɛ, kũ ò ye ò bikũ kũ Dikiri bàka kunna kũoo àkpatiio, akũ a í zɔ̃̀kɔ̃rɛ, akũ gbɛ̀ɛ pìnɔ gɔ̃̀ Isarailanɔnɛ a dɔngu pɔ́ ũ ari gɔrɔ sĩnda pínki.

⁸ Lɛn Isarailanɔ kɛ̀ lɛ lákũ Yɔsua òńnɛ nà. Ò gbɛ̀ɛ sɛ̀tɛ Yoda wɛ̀ɛn mɛ̀n kuri awɛɛpla Isaraila burinɔ dasi lɛ́n lákũ Dikiri ò Yɔsuanɛ nà. Ò bikũ̀o ò kàtɛ gu kũ ò ìn.

⁹ Gbɛ̀ mɛ̀n kuri awɛɛpla kũ ò sɛ̀tɛ swawɛɛn sa'ori kũ ò àkpati sɛnaa pìnɔ zɛkian Yɔsua dìdikɔ̃a, ò kú gwe ari kũ a gbãrao.

¹⁰ Sa'ori kũ ò àkpatii pì sɛnanɔ gɔ̃̀ zɛna swawɛɛn ari yã kũ Dikiri dìtɛ Yɔsuanɛ à ò gbɛ̃nɔnɛɛ gɛ̀ɛ à làkao pínki lákũ Musa dìtɛnɛ nà. Gbɛ̃nɔ kɛ̀ likalika ò bikũ̀.

¹¹ Kũ ò bikũ̀ ń pínki ò làka, gbasa sa'orinɔ bikũ̀ kũ Dikiri àkpatiio gbɛ̃nɔ wára.

¹² Rubɛni buri gɔ̃gbɛ̃nɔ kũ Gada buri gɔ̃gbɛ̃nɔ kũ Manasenɔ kpado gɔ̃gbɛ̃nɔ mɛ́ ò dò Isaraila buri kparanɔnɛ arɛ ò bikũ̀ lákũ Musa òńnɛ yã nà. Ò ń zĩ̀kabɔnɔ kũna.

¹³ Ń zĩ̀karinɔ kà gbɛ̃nɔn dúbu bupla taka. Ò bikũ̀ Dikiri arɛ ò gɛ̀ɛ Yɛriko gbárannan kũ zĩ̀ soruo.

¹⁴ Zĩ birean Dikiri Yɔsua sɛ̀ lei Isarailanɔnɛ ń pínki, akũ ò a yã mà ari à gɛ̀ɛ à gào lákũ ò Musa yã mà nà.

¹⁵ Akũ Dikiri pì Yɔsuanɛ:

¹⁶ Ǹ o sa'ori kũ ò doka àkpati sɛnanɔnɛ ò bo swawɛɛn.

¹⁷ Akũ Yɔsua òńnɛ ò bo swawɛɛn,

¹⁸ akũ ò bòn. Kũ ò gbá pɛ̀tɛ sĩ̀sĩia, akũ swa'i ɛ̀ra à sù a gbɛ̀n gɔ̃̀nɔ. À pà à dàgula ari à dà sĩ̀sĩla lán káakupɔ bà.

¹⁹ Mɔ káaku gɔrɔ kuride zĩn Isarailanɔ bò Yoda swawɛɛn ò gɛ̀ɛ ò bùraa kàtɛ Giligala, Yɛriko ifãboki kpa.

²⁰ Yɔsua gbɛ̀ mɛ̀n kuri awɛɛpla kũ ò sɛ̀tɛ Yoda wɛ̀ɛn pìnɔ dìdikɔ̃a Giligala gwe.

²¹ À pì gbɛ̃nɔnɛ: Tó á nɛ́nɔ sù ò ń denɔ là zia ò pì, gbɛ̀ dínɔ yáasi de deramɛɛ?

²² À pińnɛ, á bikũna Yodaa gukoria sèedaamɛ,

²³ zaakũ Dikiri á Luda a í bàbaárɛ á zɛ́n, akũ a bikũ̀ lákũ a bikũ̀ Isira Tɛ̃ra kũ à a í bàbaárɛa nà.

²⁴ Dikiri kɛ̀ lɛ, de andunia buri sĩnda pínki gɔ̃ dɔ̃ kũ à gbãna vĩ, ákɔ̃nɔ sɔ̃ àgɔ̃ Dikiri á Luda vĩna vĩ gɔrɔ sĩnda pínki.