YƆSUA 3 - Bisã Bible 2005

Isarailanɔ bikũna Yodaa

¹ Yɔsua fùtɛ kɔnkɔkɔnkɔ kũ Isarailanɔ ń pínki. Bona Sitimu ò gɛ̀ɛ Yodai, akũ ò bùraa kàtɛ gwe ari ògɔ̃ gɛ́ bikũ.

² Gɔrɔ aakɔ̃ gbɛra Isaraila gbɛ̃ zɔ̃kɔ̃nɔ kurèkure bùraai

³ ò yã dìtɛ gbɛ̃nɔnɛ ò pì: Tó a è Levi buri sa'orinɔ Dikiri á Luda bàka kunna kũoo àkpati sɛna, à da zɛ́n àgɔ̃ tɛ́ ń kpɛ,

⁴ de à le à dɔ̃ zɛ́ kũ áni sɛ́, zaakũ ádi zɛ́ pì sɛ́ zikiro. Àgɔ̃ tɛ́ zã̀zã lán kiloo do taka bà yɔɔ! Àsun na àkpatii pìiiro.

⁵ Akũ Yɔsua pì gbɛ̃nɔnɛ: À gbã̀ bo á zĩdanɛ, zaakũ Dikiri ni yãbonsarɛ kɛ á tɛ́ zia.

⁶ Akũ à ɛ̀ra à pì sa'orinɔnɛ: À Dikiri bàka kunna kũoo àkpati sɛ́ à do gbɛ̃nɔnɛ arɛ à bikũo. Akũ ò àkpatii pìi sɛ̀ ò dòo gbɛ̃nɔnɛ arɛ.

⁷ Dikiri pì Yɔsuanɛ: Mani na n sɛna leia Isarailanɔnɛ gbãra, onigɔ̃ dɔ̃ kũ má kú kũnwo lákũ má kú kũ Musao nà.

⁸ Ǹ o sa'ori kũ ò ma bàka kunna kãáo àkpati sɛnanɔnɛ, tó ò kà Yodai, ò gɛ̃ ò zɛ a ín.

⁹ Akũ Yɔsua pì Isarailanɔnɛ: À mɔ́ la à Dikiri á Luda yã ma.

¹⁰ Akũ à ɛ̀ra à pì: Lɛn ánigɔ̃ dɔ̃ kũ Luda Wɛ̃̀ndide kú kãáo lɛ, akũsɔ̃ ani pɛ́árɛ Kanaanɔa kũ Itinɔ kũ Ivinɔ kũ Pɛrizinɔ kũ Gigasinɔ kũ Amɔrinɔ kũ Yebusinɔo.

¹¹ À gwa! Andunia sĩnda pínki Dikiri bàka kunna kũoo àkpati ni doárɛ arɛ ari Yoda ín.

¹² À gbɛ̃nɔn kuri awɛɛplanɔ sɛ́ á tɛ́, buri kũ burio gbɛ̃ mɛ̀n dodo.

¹³ Tó sa'ori kũ ò andunia sĩnda pínki Dikiri àkpati sɛnanɔ gbá pɛ̀tɛ Yoda ín, í pì ni zɔ̃kɔ̃rɛ, í kũ àtɛn bo swa musu ni kɛ bĩni ũ à gɔ̃ zɛna a gbɛ̀n.

¹⁴ Kũ gbɛ̃nɔ bùra fùtɛ ò dà zɛ́n, òtɛn gɛ́ bikũ Yodaa, sa'ori kũ ò Dikiri bàka kunna kũńwo àkpati sɛnanɔ tɛ́ ń arɛ lɛ.

¹⁵ Burapɔnɔ kɛkɛgɔrɔ sĩnda pínki swa pìi dì pa ari à dà sĩ̀sĩla, ama gɔrɔ kũ àkpatisɛrii pìnɔ kà swa pìii, kũ ò gbá pɛ̀tɛ ín,

¹⁶ akũ í kũ àtɛn bo swa pìi musu zɔ̃̀kɔ̃rɛ à bĩni kɛ̀ à gɔ̃̀ zɛna a gbɛ̀n zaa zã̀zã wɛ̃tɛ kũ òdi pi Adamu sarɛ Zarɛtã bùsun. Í kũ àtɛn ta sɛ̀bɛ wisiden zɔ̃̀kɔ̃rɛ míɔmiɔ, akũ gbɛ̃nɔ bikũ̀ arɛdɔkɔ̃ana kũ Yɛrikoo.

¹⁷ Sa'ori kũ ò Dikiri bàka kunna kũńwo àkpati sɛnanɔ gɔ̃̀ zɛna Yoda wɛ̀ɛn zĩtɛ koria gíngin, akũ Isaraila buri sĩnda pínki tɛ́ gukori pìn ari ò gɛ̀ɛ ò bikũ̀ ń pínki ò làka.