YAASINƆ 1 - Bisã Bible 2005

Yã kũ à tò òdi yáasi zu

¹ Yáasi kũ Dauda nɛ́ Sulemanu, Isarailanɔ kína zù,

² de gbɛ̃nɔ le ò ɔ̃ndɔ̃ kũ ògɔ̃ laakari vĩ, ò dɔ̃na yã dada,

³ ò gɔ̃ wɛ́zɛ̃ri laakaridenɔ ũ manakɛna kũ yãzɛdeo kũ náanio yã gũn.

⁴ Yáasi dínɔ dì nɛ̀sɛdode gba laakarii, àdi tó kɛfɛnna gɔ̃ kú a dɔ̀rɔɔa kũ dɔ̃naao.

⁵ Laakaride ni ma, a yãdadana le à kara, nɛ̀sɛde ni lɛ́damma le a gũn,

⁶ ani yáasi kũ yãlɛkɔ̃anaao mì dɔ̃ kũ ɔ̃ndɔ̃rinɔ yã'onaao kũ ń gara kutu yãnɔ.

⁷ Vĩnakɛna Dikirinɛɛmɛ dɔ̃na naana ũ, ama yɔ̃nkɔ dì ɔ̃ndɔ̃ kũ lɛ́dammao gya bo.

Laakarikɛna gbɛ̃ vãni manafikii

⁸ Ma nɛ́, ǹ n de yã'onnɛna ma, ǹsun pã kpá n da lɛ́dammairo.

⁹ Anigɔ̃ de fùra mana ũ n mìia, anigɔ̃ de mɔ̀wakarɛ ũ n wakaaa.

¹⁰ Tó durunnakɛrinɔ tɛni n laakari gátɛ, ǹsun wero, ma nɛ́.

¹¹ Òdi pi: Ǹ mɔ́ ò gɛ́ gbɛ̃nɔ dãdã ò ń dɛdɛ, ò taarisaridenɔ kpákpa ò ń kũkũ.

¹² Ò ń mɔ́mɔ bɛ̃nɛ lákũ mira dì kɛ nà, ò ń mɔ́ vãni lákũ gyãwãn dì kɛ nà,

¹³ óni pɔ́ ɔgɔde buri sĩnda pínki le, ó kpɛ́nɔ ni pa kũ pɔ́ kũ o nàkɔ̃anɔ.

¹⁴ Ǹ mɔ́ ò ó baka kakara, ó pínki ó ɔgɔsɔ̃nɔ nigɔ̃ dokɔ̃nɔ.

¹⁵ Ma nɛ́, ǹsun gɛ́ kũńworo, ǹsun zɛ́ sɛ́ kũńworo.

¹⁶ Zaakũ òdigɔ̃ lika kũ yãvãnikɛnaao, ò wãna kũ gbɛ̃dɛnaao.

¹⁷ Bàkpakpana bãnɔ wára bi yã pãmɛ.

¹⁸ Òtɛn tankutɛ kpákpa ń zĩdanɛmɛ, ń toke mɛ́ à ń para.

¹⁹ Ɔgɔvãniwɛtɛrinɔ zian gwe ń pínki, ń lukana pɔ́i mɛ́ àdi ń wɛ̃̀ndi bo.

Ɔ̃ndɔ̃ tɛni ó sisi

²⁰ Ɔ̃ndɔ̃ tɛn wiki lɛ́ gãnulɛa, a kòto dɔ zɛ́dan.

²¹ Àtɛn lɛ́ zu zɛ́ kũ òdi kɔ̃ kakaran lɛ́a, àtɛn kpàkpa kɛ wɛ̃tɛ bĩnilɛnɔ gũn à pi:

²² Ɔ̃ndɔ̃saridenɔ, ánigɔ̃ kun kũ ɔ̃ndɔ̃sarikɛo ari bɔrɛɛ? Lalandikɛrinɔ, áni ma fobona tó bɔrɛɛ? Yɔ̃nkɔnɔ, ánigɔ̃ zã dɔ̃nan ari bɔrɛɛ?

²³ Tó a ma lɛ́damma mà yã, de ma a dɔ̃naa pìsiáwa, mani tó àgɔ̃ ma laasun vĩ.

²⁴ Lákũ ma á sisi a gi sã kpái nà, ma ɔ pòroárɛ á gbɛ̃ke dí laakari kɛro,

²⁵ lákũ a ma lɛ́damma kpà sãkoto nà pínki, ádi we laakari kũ ma á gbáiro,

²⁶ tó kisira á lé, mani á yáa dɔmɛ, tó yã á lé, mani á lalandi kɛmɛ,

²⁷ bee tó yã á lé lán zàga'ĩa bà, ke tó kisira á lé lán tùtuu bà, ke tó takasi kũ yã'ũmmanaao gɛ̃̀ái.

²⁸ Zĩ birea áni lɛ́ zumai, mani we sɔ̃ro, áni ma ki wɛtɛ, áni ma e sɔ̃ro.

²⁹ Zaakũ a zã dɔ̃nan, ádi zɛ kũ vĩnakɛna Dikirinɛɛoro.

³⁰ Ádi we ma lɛ́dammairo, a laakari kũ ma á gbá gya bò.

³¹ Áni á dàa gbɛ̀ le, yã vãni kũ a zɛo ni wí á musu.

³² Kpɛlina ɔ̃ndɔ̃nɛ ni ɔ̃ndɔ̃saridenɔ dɛdɛ, laasunsari ni yɔ̃nkɔnɔ dúgu zɔ̃.

³³ Gbɛ̃ kũ à ma yã kũna sɔ̃ anigɔ̃ kun aafia, anigɔ̃ kun kũ laakariio kpatɛna vĩnakɛna vãninɛɛ sari.