TITU 3 - Bisã Bible 2005

Ò laakari dɔ yãmanakɛnaaa

¹ Ǹ dɔ n gbɛ̃nɔgu ò mì natɛ gbãnadenɔnɛ kũ ikodenɔo, ò ń yã ma, ògɔ̃ kú kũ yãmanakɛna sĩnda pínki soruo.

² Òsun gbɛ̃ke tɔ́ vãni síro. Ògɔ̃ de nɛ̀sɛdode yãketesaridenɔ ũ kũ ò busana gbɛ̃ sĩnda pínkinɛ.

³ Zaakũ ókɔ̃nɔ se, ó faya vĩ yãro, ludayãdarisarinɔn ó ũ. O sãtɛ, ó de pɔnnakɛna kũ dà vãni sĩnda pínkio zɔ̀nɔ ũ. Odìgɔ̃ kú nɛ̀sɛ vãnio kũ nɛ̀sɛgɔ̃bao. Ó de bɛgirinɔ ũ, o zãkɔ̃gu.

⁴ Bee kũ abireo kũ Luda ó Surabari gbɛ̃kɛ kũ a yenyĩo bò gupuraa,

⁵ akũ à ó sura bà. Adi kɛ ó yãmanakɛna yãinlo, kũ à ó wɛ̃nda dɔ̃̀ yãimɛ. À ó zú ò à ó í dufu, à tò o gɔ̃ gbɛ̃ dufunɔ ũ kũ a Nini

⁶ kũ à pìsiwá gbãnao Yesu Kirisi ó Surabarii gãi,

⁷ Abire yãi yã bò kũoo nna a gbɛ̃kɛ yãi, o gɔ̃ túbiblerinɔ ũ, ó wɛ́ dɔ wɛ̃̀ndi kũ àdi lákaroi.

⁸ Yã pì bi yãpuramɛ. Má ye ǹ gã na yã pìnɔ onaaa manamana, de ludanaanikɛrinɔ le ò mɛ̀ kpá yãmanakɛnaaa. Abirekũ mana, à karana vĩ gbɛ̃nɔnɛ.

⁹ Ǹ pã mìsariyã yãgaganaanɛ kũ dizinɔ tɔ́ kɔ̃nɔwɛnaao kũ fìtiio kũ lɛ́kpakɔ̃ana Musa doka yã musuo, zaakũ yã pãnɔmɛ, ò karana vĩro.

¹⁰ Ǹ kpãkɛ̃ gbɛ̃ kũ àdi tó ò kɛ̃kɔ̃aai bee gɛ̃̀n pla, gbasa ǹ pɛ́a.

¹¹ Ǹgɔ̃ dɔ̃ kũ gbɛ̃ bire taka sã̀tɛ. Durunnakɛriimɛ, à a zĩda bɔ̀bɔ.

Lɛ́zammanaa

¹² Tó ma Atema ke Tikiku zĩ̀mma, ǹ zɛ́ wɛtɛ ǹ su ǹ ma le Nikɔpɔli, zaakũ ma zɛo mà bunsirɛ láka gwe.

¹³ Ǹ ania kɛ ǹ zàna kɛ bùsu dokadɔ̃ri Zenasinɛ kũ Apoloo de pɔ́ke sún kĩaḿmaro ń tá gũn.

¹⁴ À mana ó gbɛ̃nɔ yãmanakɛnaa dada ò ń zĩda kpáa, ò yã kũ à kɔ̃ sìonɔ bɔkɔtɛ de òsungɔ̃ kun pãro.

¹⁵ Gbɛ̃ kũ ó kú lɛɛlɛnɔ fɔ kpàmma ń pínki. Ǹ fɔ kpá gbɛ̃ kũ ò yewái Yesu zɛ́ gũnnɔa. Luda gbɛ̃kɛ kɛárɛ á pínki.