ROMUDENƆ 5 - Bisã Bible 2005

Kɛna nna kũ Ludao

¹ Lákũ Luda tò yã bò kũoo nna nà a náani kũ ótɛn kɛ yãi, ó nna kãao sà ó Dikiri Yesu Kirisi gãi.

² A náanikɛnaa gũn o zɛ́ lè a gãi o gɛ̃ Luda gbɛ̃kɛ kũ ó kúoo pìi gũn, akũ ótɛn pɔnna kɛ kũ Luda gakuri kũ ó wɛ́ dɔiio.

³ Adi kɛ abiren adoro, ótɛn pɔnna kɛ kũ ó warikɛnaao dɔ, zaakũ ó dɔ̃ kũ wari dì su kũ mɛnao,

⁴ mɛna dì su kũ dà manao, dà mana dì su kũ tãmaaao,

⁵ tãmaa sɔ̃ àdi ó nɛ́ro, zaakũ Luda a yenyĩ dà ó nɛ̀sɛn a Nini kũ à ó gbá gãi.

⁶ Ó gbãnasarikɛ gũn Kirisi gà ókɔ̃nɔ yãvãnikɛrinɔ gɛ̃nɛ ũ gɔrɔ kũ Luda dìtɛa.

⁷ Gana gbɛ̃ mana gɛ̃nɛ ũ aragaro. Ke gbɛ̃ke ni we à ga gbɛ̃ mana gɛ̃nɛ ũ gwɛɛ,

⁸ akũ Luda mɔ̀wɛrɛ deran á yewái nà, zaakũ ó durunnadekɛ gũnn Kirisi gà ó gɛ̃nɛ ũ.

⁹ Lákũ yã bò kũoo nna nà sà a aru yãi, a ó sina Luda pɔfɛ̃a a gãi sika vĩ dɔ yá?

¹⁰ Yã ó ĩni kũ Ludaomɛ, akũ o kɛ kãao nna a Nɛ́ gana yãi. Lákũ o kɛ kãao nna nà sà, ó surabana a kunna wɛ̃̀ndiio yãi sika vĩ dɔ yá?

¹¹ Adi kɛ adikĩnamɛ adoro, ótɛn pɔnna kɛ kũ Ludao dɔ ó Dikiri Yesu Kirisi kũ à tò o kɛ kãao nna gãi.

Kirisi yã lɛkɔ̃ana kũ Adamuo

¹² Gbɛ̃ mɛ̀n do yãin durunna gɛ̃̀ andunia gũn, akũ durunna ga ì. Lɛmɛ dɔ ga kú gbɛ̃ sĩnda pínkia, kũ gbɛ̃ sĩnda pínki durunna kɛ̀ yãi.

¹³ Durunna kú andunia gũn de Musa doka gɔ̃ gɛ́ su. Gɔrɔ kũ doka kunlo, Luda dí durunna yã daro,

¹⁴ ama sɛna zaa Adamua ari à gɛ̀ɛ pɛ́ Musaa ga kí blè gbɛ̃ sĩnda pínkia, bee gbɛ̃ kũ odi durunna kɛ lán Adamu sãtɛna bàronɔ. Adamu bi gbɛ̃ kũ ani su takamɛ.

¹⁵ Ama Luda gba ni sí lɛkɔ̃a kũ Adamu taarioro, zaakũ lákũ gbɛ̃nɔ gà dasi nà Adamu ado sãtɛna yãi, Luda gbɛ̃kɛ kũ a gbao kũ à kà gbɛ̃nɔa dasi Yesu Kirisi ado gbɛ̃kɛ yãi de abirekũla.

¹⁶ Luda gba ni sí lɛkɔ̃a kũ gbɛ̃ mɛ̀n do durunna pìioro. Taari mɛ̀n do pì mɛ́ à sù kũ yãkpatɛkɛnaao, akũ yã vùtɛ bisãsirinɔa. Taarinɔ sù kũ Luda gbao, akũ yã bò kũ gbɛ̃nɔ nna.

¹⁷ Lákũ Adamu ado taari mɛ́ à tò ga sù à kí blè nà, Yesu Kirisi ado yã kũ à sùo zɔ̃kɔ̃ de abirekũla. Abire yãi gbɛ̃ kũ Luda gbɛ̃kɛ kɛ̀ńnɛ, kũ à tò yã bò kũńwo nna gba ũnɔ ni kí ble wɛ̃̀ndii gũn.

¹⁸ Abire yãi lákũ taari mɛ̀n do pìi tò yã vùtɛ buri sĩnda pínkia nà, lɛmɛ dɔ yãmanakɛna mɛ̀n do pìi dì tó buri sĩnda pínki bo mana lɛ ò wɛ̃̀ndi le.

¹⁹ Lákũ gbɛ̃ mɛ̀n do sãgbãna mɛ́ à tò gbɛ̃nɔ gɔ̃̀ durunnadenɔ ũ dasi nà, lɛmɛ dɔ gbɛ̃ mɛ̀n do yãmana ni tó gbɛ̃nɔ bo mana dasi.

²⁰ Doka sù de taari le àgɔ̃ kara yãimɛ. Ama kũ durunna kàra, Luda gbɛ̃kɛ kàra de abirekũla.

²¹ Lákũ durunna kíblenaa sù kũ gao nà, lɛn dɔ Luda gbɛ̃kɛ kíblenaa dì tó ò bo mana lɛ, ò wɛ̃̀ndi kũ àdi lákaro le ó Dikiri Yesu Kirisi gãi.