ROMUDENƆ 4 - Bisã Bible 2005

Yã bò kũ Ibrahĩo nna ludanaanikɛna yãi

¹ Ókɔ̃nɔ Yudanɔ, óni o deramɛ ó dizi káaku Ibrahĩ yã musuu?

² Tó Luda tò yã bò kãao nna yã kũ à kɛ̀ yãi, de à à ĩadãyã lè, ama adi fɔ̃ à dã̀ Luda arɛro.

³ Deran ò ò nà Luda yãnn? Ò pì Ibrahĩ Luda náani kɛ̀, akũ Luda tò yã bò kãao nna a náani kũ à kɛ̀ yãi.

⁴ Fĩnabona zĩkɛriinɛ bi gbɛ̃kɛkɛnnɛnaanlo, a ísimmamɛ.

⁵ Bee tó gbɛ̃ tɛn yãke kɛro, tó àtɛn Luda kũ àdi tó yã bo kũ taaridenɔ nna náani kɛ, Luda ni tó yã bo kãao nna a náani kũ àtɛn kɛ yãi.

⁶ Dauda gbɛ̃ kũ Luda tò yã bò kãao nna yãkekɛnaa sari arubarikalena yã ò à pì:

⁷ Arubarikadenɔn gbɛ̃ kũ Luda pɔ́ kù ń taarinɔla à ń durunnanɔ kɛ̃̀ḿmanɔ ũ.

⁸ Arubarikaden gbɛ̃ kũ Dikiri ni a durunna yã daro ũ.

⁹ Arubarika bire bi gbɛ̃ kũ à tɔ̃̀ɔ zɔ̃̀ pɔ́mɛ ado yá, ke gyɔfɔrɔde pɔ́mɛ dɔ? Ò pì Luda tò yã bò kũ Ibrahĩo nna, kũ à a náani kɛ̀ yãi.

¹⁰ Deran Ibrahĩ de gɔrɔ kũ Luda tò yã bò kãao nnaa? À tɔ̃̀zɔ̃na yá ke gyɔfɔrɔdemɛ? Adi tɔ̃̀ zɔ̃ro, gyɔfɔrɔdemɛ.

¹¹ Akũ à tɔ̃̀ɔ zɔ̃̀ sèeda ũ, kũ Luda tò yã bò kãao nna a gyɔfɔrɔdekɛgɔrɔ yãi. Lɛn à de gyɔfɔrɔde kũ Luda tò yã bò kũńwo nnanɔ dizi ũ lɛ ń pínki ń ludanaanikɛna yãi.

¹² À de gbɛ̃ kũ ò tɔ̃̀ɔ zɔ̃̀nɔ dizi ũmɛ dɔ. Adi kɛ ń tɔ̃̀zɔ̃na yãinlo, kũ ò tɛ́ ó dizi Ibrahĩ gɛ̀sɛgbɛɛi yãimɛ kũ à Luda náani kɛ̀ a gyɔfɔrɔdekɛgɔrɔa.

Deran Ibrahĩ Luda náani kɛ̀ nà

¹³ Luda lɛ́ sɛ̀ Ibrahĩnɛ kũ a burinɔ à pì, andunia ni gɔ̃ ń pɔ́ ũ. Adi kɛ a doka kũna yãinlo, kũ Luda tò yã bò kãao nna a náani kũ à kɛ̀ yãimɛ.

¹⁴ Tó gbɛ̃ kũ ò doka kũnanɔ mɛ́ oni kí ble, akũ ludanaanikɛnaa àre vĩro, akũsɔ̃ Luda lɛ́sɛnaa kɛ̀ pãpã,

¹⁵ zaakũ doka dì su kũ Luda pɔfɛ̃omɛ. Gu kũ doka kunlo, taari dìgɔ̃ kú gwero.

¹⁶ A yãi pɔ́ kũ Luda a lɛ́ sɛ̀ lena bi a náanikɛna yãmɛ, de àgɔ̃ de a gbɛ̃kɛ yã ũ. Lɛ́sɛnaa pì sɔ̃ bi Ibrahĩ buri pìnɔ pɔ́mɛ ń pínki, adi kɛ gbɛ̃ kũ ò Musa doka kũna ńtɛ̃nɛnɔnlo, kũ gbɛ̃ kũ òtɛn Luda náani kɛ lán Ibrahĩ bànɔmɛ dɔ. Ibrahĩ bi ó pínki dizimɛ.

¹⁷ À de ó dizi ũ Luda kĩnaa, lákũ ò kɛ̃̀ Luda yãn nà. Luda pì a a dìtɛ buri dasinɔ dizi ũ. Ibrahĩ Luda kũ àdi wɛ̃̀ndi kpá gɛ̀nɔa à tó pɔ́ kũ ò kun yãronɔ gɔ̃ kun náani kɛ̀.

¹⁸ À Luda náani kɛ̀ à wɛ́ dɔ̀ pɔ́ kũ gbɛ̃ke wɛ́ dɔiroi, akũ à gɔ̃̀ buri dasinɔ dizi ũ lákũ Luda ònɛ nà à pì, lɛmɛ a burinɔ nigɔ̃ de lɛ.

¹⁹ Ibrahĩ kà lán wɛ̃̀ basɔɔro taka bà. Bee tó à laasun lɛ̀ a gɔ̃gbɛ̃kɛbɔsaria kũ Sara nɛ́'isɔ tatanaao, a ludanaanikɛna dí busaro.

²⁰ Adi sika kɛ lɛ́ kũ Luda sɛ̀nɛɛaro, adi gí Luda náani kɛiro, akũ à gbãna lè a ludanaanikɛnaaa à Luda tɔ́ bò,

²¹ zaakũ à dɔ̃ kũ à yã futɛna vĩro, Luda ni fɔ̃ à lɛ́ kũ à sɛ̀ɛ pì kɛ.

²² Abire yãin Luda tò yã bò kãao nna.

²³ Òdi yã bona kãao nna pì kɛ̃ a yãi adoro,

²⁴ ò kɛ̃̀ ókɔ̃nɔ kũ Luda ni tó yã bo kũoo nnanɔ yãimɛ dɔ, ókɔ̃nɔ kũ ótɛn Luda kũ à ó Dikiri Yesu fùtɛ bona gan náani kɛnɔ.

²⁵ Luda a kpàḿma de à le à ó taarinɔ kɛ̃wɛrɛ yãimɛ, akũ à a fùtɛ kũ wɛ̃̀ndiio, de yã le à bo kũoo nna yãi.