Online Bible

ROMUDENƆ 3 - Bisã Bible 2005

¹ Karana kpaten dena Yuda ũ vĩi? Àre kpaten tɔ̃̀zɔ̃na vĩi?

² À karana vĩ zɔ̃kɔ̃ yã sĩnda pínki gũn. Káaku gĩa Luda a yã nàńnɛ ń ɔĩmɛ.

³ Kũ ń gbɛ̃kenɔ náani vĩro, bɔ́n abirekũ vĩi? Ń kunna náani sari ni Luda náani gboro yá?

⁴ Oi! Lɛnlo! À tó Luda gɔ̃ yãpura vĩ, bee kũ gbɛ̃ sĩnda pínki bi ɛ́kɛdemɛ, lákũ ò kɛ̃̀ Luda yãn nà ò pì: Tó n yã ò, n yã nigɔ̃ zɛ́ vĩ, tó n yãkpatɛ kɛ̀ kũńwo, n yã ni ble.

⁵ Tó ó vãnikɛ dì Luda manakɛ bo gupuraa, bɔ́ yãn óni oo? Óni pi Luda vãni kũ àdi pɔfɛ̃ kipawá yãin yá? Matɛn o lán bisãsiri onaa bàmɛ.

⁶ Oi! Lɛnlo! Tó Luda yãzɛ vĩro, à kɛ̀ dera ani fɔ̃ à yãkpatɛ kɛ kũ anduniaoo?

⁷ Gbɛ̃ke ni pi, tó a ɛ́kɛkɛ tɛn Luda náani kara, akũsɔ̃ àtɛni a tɔ́ bo, bɔ́yãi ani yã daala lán durunnakɛrii bàa?

⁸ Tó n ò lɛ ntɛni pi ò yã vãni kɛ, yã mana ni bon. Gbɛ̃kenɔ ma tɔ́ vãni sì ò pì lɛn madì o lɛ. Luda yãdanlana kɔ̃ sì kũńwo.

Gbɛ̃ke manaro

⁹ Tɔ̀! Ókɔ̃nɔ Yudanɔ ó sã̀nan yá? Lɛnlo fá! Zaakũ ma Yudanɔ kũ buri pãndenɔ bòbo ń dàn ń pínki kɔ̀, ń pínki bi durunna zɔ̀nɔmɛ.

¹⁰ Ò kɛ̃̀ Luda yãn ò pì: Gbɛ̃ke manaro, bee mɛ̀n do.

¹¹ Laakaride ke kunlo, Luda ki wɛtɛri ke kunlo.

¹² Ò sã̀sã ń pínki ò gɔ̃̀ dɔ̀rɔɔ sari, yãmanakɛri ke kunlo, bee mɛ̀n do.

¹³ Ń kòto de lán mira wɛ̃naa bàmɛ. Òdi lɛ́nna kɛńnɛ, ń lɛ́gbɛ bi pitiko sɛwɛmɛ,

¹⁴ yã ĩni kũ gbɛ̃kanaao ń lɛ́ pà.

¹⁵ Ò wãna kũ gbɛ̃dɛnaao,

¹⁶ òdi suńyĩ kũ kisirao kũ wɛ́tãmmao,

¹⁷ ò aafia zɛ́ dɔ̃ro,

¹⁸ ń wɛ́ dìgɔ̃ Luda wé'i vĩro.

¹⁹ Ó dɔ̃ kũ Luda doka pínki de gbɛ̃ kũ ò na doka pì ɔĩnɔ pɔ́ ũmɛ, de gbɛ̃ sĩnda pínki lɛ́ gɔ̃ nakɔ̃ana, andunia gbɛ̃ sĩnda pínki gɔ̃ taaride ũ Luda kĩnaa.

²⁰ Zaakũ gbɛ̃ke ni bo mana Luda kĩnaa doka pì kũna yãiro. Luda doka mɛ́ àdi tó ò durunna dɔ̃.

Deran Luda dì tó yã bo kũńwo nna nà

²¹ Deran Luda dì tó yã bo kũńwo nna nà bò gupuraa sà, lákũ a yã kɛ̃na Musa doka kũ annabinɔ takadanɔ gũn nà. Adi kɛ a doka kũna yãnlo.

²² Luda dì tó yã bo kũńwo nna Yesu Kirisi náanikɛna yãimɛ. Gbɛ̃ kũ àtɛni a náani kɛ sĩnda pínki pɔ́mɛ. Gbɛ̃ke bona adoro,

²³ zaakũ baadi durunna kɛ̀, ò kĩ̀a Luda gakurii.

²⁴ Luda dì tó yã bo kũńwo nna gba ũ a gbɛ̃kɛ yãi kũ Kirisi Yesu kũ à ń bó gbãnao.

²⁵ Àkũmɛ Luda kpà durunna kútɛkɛbɔ ũ gbɛ̃ kũ òtɛni a aru náani kɛnɔnɛ, de à mɔ́ baadi pínkinɛ kũ adì yã kɛ a zɛ́aamɛ. À mɛna yã, adi durunna zĩnɔ yã daro,

²⁶ akũ à mɔ̀ńnɛ tera kũ adì yã kɛ a zɛ́a. Deran Luda dì yã kɛ a zɛ́a nàn gwe, akũsɔ̃ àdi tó yã bo kũ Yesu náanikɛrinɔo nna.

²⁷ Bisãsirinɔ ni fɔ̃ ò ĩa dã dɔ yá? Abirekũ ni sí kɛro. Bɔ́yãii? Zaakũ à de zĩkɛna dokaa yã ũro, Yesu naanikɛna yãmɛ.

²⁸ Zaakũ ma è yã dì bo kũ gbɛ̃o nna Yesu náanikɛna yãimɛ, zĩkɛna dokaa baasi.

²⁹ Luda bi Yudanɔ Ludamɛ ńtɛ̃nɛ yá? Buri pãndenɔ Ludan seroo? Ee, buri pãndenɔ Ludamɛ dɔ.

³⁰ Zaakũ Luda mɛ̀n domɛ. Ani tó yã bo kũ gbɛ̃ kũ à tɔ̃̀ɔ zɔ̃̀ɔo nna a náani kũ àtɛn kɛ yãimɛ, akũsɔ̃ ani tó yã bo kũ gyɔfɔrɔdeo nna a náani dokɔ̃nɔ pìi musu.

³¹ Ótɛn doka da pɔ́ke ũro ludanaanikɛna yãin yá? Lɛnlo, ótɛn gbãna kpáaamɛ.

« Předchozí

další »

Následuj nás:

Sponzorované odkazy

Reklamy