ROMUDENƆ 2 - Bisã Bible 2005

Luda ni yãkpatɛ kɛ a zɛ́a

¹ Abire yãi mɔkɔ̃n kũ ndì gbɛ̃ pãnde taari e, ń kutɛkɛna vĩro. Tó n gbɛ̃ pãnde taari è, n n zĩda dà yãmmɛ, zaakũ mɔkɔ̃n gbɛ̃taari'eri ndì kɛ lɛ se dɔ.

² Ó dɔ̃ kũ Luda yãkpatɛkɛna kũ yã bire taka kɛ̀rinɔ kun a zɛ́amɛ.

³ Mɔkɔ̃n kũ ndì yã bire taka kɛ̀rinɔ taari e, akũ ndì kɛ se, ntɛn da ĩni bo Luda yãkpatɛkɛnan yá?

⁴ Ke ntɛn dɔkɛ kũ Luda nnakɛnnɛna zɔ̃kɔ̃ɔo kũ a mɛnao kũ a sùruuomɛ? Ń dɔ̃ kũ Luda tɛni a nna kɛnnɛ de ǹ n nɛ̀sɛ litɛ yãinloo?

⁵ N sãgbãna kɛ̀, ńdi nɛ̀sɛ litɛro, ntɛn pɔfɛ̃ kakaranyĩ ari Luda pɔfɛ̃kipammana gɔrɔ zĩ, tó Luda yãkpatɛkɛnaa kũ gbɛ̃nɔ a zɛ́a bò gupuraa.

⁶ Ani fĩna bo baadinɛ a yãkɛnaaa.

⁷ Gbɛ̃ kũ òtɛn gakuri kũ bɛ̀ɛrɛɛo kũ mɛ̀vãnasario wɛtɛ, akũsɔ̃ òtɛn yã mana kɛ kũ mɛnaonɔ ni wɛ̃̀ndi kũ àdi lákaro le.

⁸ Gbɛ̃ kũ ń zĩda pɔyeina tɛn dońnɛ arɛ ò gì yãpurai ò tɛ́ yã vãninɔ sɔ̃, Luda ni pɔfɛ̃ kũ pɛ̃tɛ̃o kipaḿma.

⁹ Wɛ́tãmma kũ wãwão ni yãvãnikɛri sĩnda pínki le, atɛ̃nsa Yudanɔ, ń gbɛra buri pãndenɔ.

¹⁰ Luda ni yãmanakɛri sĩnda pínki gba gakuri kũ bɛ̀ɛrɛɛo kũ aafiaao, atɛ̃nsa Yudanɔ, ń gbɛra buri pãndenɔ.

¹¹ Zaakũ Luda dì gbɛ̃ke wɛ́ gwaro.

¹² Gbɛ̃ kũ à durunna kɛ̀ Musa doka dɔ̃naa sari ni kakatɛ lɛ doka pìi sari. Gbɛ̃ kũ à durunna kɛ̀ nana doka pì ɔĩ sɔ̃, Luda ni yãkpatɛ kɛ kãao doka pìi musumɛ.

¹³ Adi kɛ gbɛ̃ kũ àtɛn doka ma kũ são mɛ́ à mana Ludanɛro. Gbɛ̃ kũ àtɛn zĩ kɛa mɛ́ ani bo mana.

¹⁴ Tó buri kũ ò Musa doka dɔ̃ronɔ yã kũ à kɔ̃ sìoo kɛ̀ kũ ń zĩdao, ò doka vĩ ń zĩdaaamɛ.

¹⁵ Òtɛn mɔwɛrɛ kũ yã kũ à kú doka pìi gũn kú ń nɛ̀sɛmmɛ. Ń laasun tɛni a yãpura o dɔ, zaakũ ń laasun mɛ̀n doro, a kenɔ dì ń da yãn, a kenɔ dì ń bon.

¹⁶ Lɛmɛ yãkpatɛkɛgɔrɔ zĩ Luda ni yãkpatɛ kɛ kũ bisãsirinɔ yã kũ à utɛna ń nɛ̀sɛn musu Kirisi Yesu gãi, lákũ baaru nna kũ matɛn kpá ò nà.

Yudanɔ bi dokadarisarinɔmɛ

¹⁷ Mɔkɔ̃n Yuda inaa, n zɛ kũ n Yudakɛo, ń Musa doka náani vĩ, ntɛni ĩa dã kũ Ludao.

¹⁸ Ń Luda pɔyenyĩna dɔ̃ kũ yã kɛ̃ à zɛ́ vĩo, kũ ò doka pìi dàdannɛ yãi.

¹⁹ Ntɛni da ń de vĩ̀nanɔ wɛ́de ũ, gbɛ̃ kũ ò kú gusira gũnnɔ fitila ũ,

²⁰ wɛ́siradenɔ yãdannɛri ũ, gbɛ̃ dufunɔ kyódari ũ. Ntɛni da Luda dokamɛ dɔ̃na kũ yãpurao mì ũ.

²¹ Mɔkɔ̃n kũ ndì yã da gbɛ̃ pãndenɔnɛ, bɔ́yãi ndì da n zĩdanɛroo? N pì òsun kpãni oro, mɔkɔ̃n ndì o se yá?

²² Ndì pi òsun zina kɛro, akũ ndì kɛ se yá? Ndì tãnanɔ gya bo, akũ ndì ń kpɛ́ pɔ́nɔ kpãni o se yá?

²³ Ndì ĩa dã Luda doka musu, akũ n doka pì danasari dì Luda tɔ́ yaka.

²⁴ Zaakũ á yãin buri pãndenɔ dìgɔ̃ Luda tɔ́ vãni sí lákũ ò kɛ̃̀ Luda yãn nà.

²⁵ Tó ń Luda doka kũna, akũ tɔ̃̀zɔ̃ àre vĩnnɛ. Tó ńdi a yã da sɔ̃ro, ń lɛɛlɛ kũ gyɔfɔrɔdenɔmɛ.

²⁶ Tó gyɔfɔrɔde Luda dokanɔ kũna, Luda ni gyɔfɔrɔde pì gwa lɛɛlɛ kũ gbɛ̃ kũ à tɔ̃̀ɔ zɔ̃̀ɔoroo?

²⁷ Bee tó ń doka takada pì kũna, akũsɔ̃ ń tɔ̃̀zɔ̃na, tó ńdi doka pì daro, gyɔfɔrɔde kũ à yã pì kũna ni tó yã danla.

²⁸ Kunna Yuda ũ yãpura bi mɛ̀barayãnlo, lɛmɛ tɔ̃̀zɔ̃na yãpura bi mɛ̀barayãn sero.

²⁹ Kunna Yuda ũ yãpura bi nɛ̀sɛgũnyãmɛ, lɛmɛ dɔ tɔ̃̀zɔ̃na yãpura bi nɛ̀sɛgũnyãmɛ se. Luda Nini zĩmɛ, adi kɛ doka takada yãnlo. Luda mɛ́ àdi gbɛ̃ bire taka sáabu kpá, adi kɛ bisãsirinlo.