NƐƐMAYA 9 - Bisã Bible 2005

Isarailanɔ ń durunnanɔ ona Ludanɛ

¹ Mɔ dokɔ̃nɔ pì gɔrɔ baro awɛɛsiikɔ̃dea Isarailanɔ kɔ̃ kàkara kũ lɛ́yĩnaao kũ uta kasanɔ dadana, bùsu ká ń mìn.

² Ò ń zĩda kɛ̃̀ buri pãndenɔa akũ ò zɛna, òtɛni ń durunnanɔ kũ ń dizinɔ yãvãnikɛnanɔ o.

³ Ò gɔ̃̀ zɛna gu kũ ò kún, akũ ò Dikiri ń Luda doka takada kyó kɛ̀ńnɛ awa aakɔ̃, akũ ò ń durunnanɔ ò ò donyĩ kɛ̀ Dikiri ń Ludanɛ awa aakɔ̃.

⁴ Levi kenɔ zɛna tìntin kũ ò kɛ̀ńnɛ musu, ò lɛ́ zù Dikiri ń Ludai gbãngbãn. Ń tɔ́nɔn dí: Yesua, Bani, Kadamiɛli, Sebania, Buni, Serebia, Bani kũ Kenanio.

⁵ Levinɔ Yesua kũ Kadamiɛlio kũ Banio kũ Asabaniao kũ Serebiao kũ Odiao kũ Sebaniao kũ Petayao pì: À futɛ à Dikiri á Luda táaki lɛ́! À kun zaa káaku ari gɔrɔ sĩnda pínki. Ò n tɔ́ gakuride bo, à de gbɛ̃ tɔ́kpana kũ táakiola pínki.

⁶ Mɔkɔ̃mmɛ Dikiri ũ ndo. N sarapura kɛ̀ kũ n bɛ kũ à kú musuo kũ pɔ́ kũ ò kú gwenɔ pínki. N andunia kɛ̀ kũ pɔ́ kũ ò kúnnɔ. N ísira kɛ̀ kũ pɔ́ kũ ò kú a gũnnɔ. Ndì wɛ̃̀ndi kpá ń pínkia, n bɛ malaika dasinɔ dì donyĩ kɛnnɛ.

⁷ Mɔkɔ̃mmɛ Dikiri Luda kũ à Abramu sɛ̀ ũ, n bo kãao Uru, Kaladia bùsun, n a tɔ́ lìtɛnɛ Ibrahĩ.

⁸ N è à n náani vĩ a swɛ̃̀ɛ gũn, akũ n pì n bàka nigɔ̃ kú kãao, ĩni Kanaanɔ bùsu kpáa kũ a burinɔ, bùsu kũ Itinɔ kũ Amɔrinɔn kún kũ Pɛrizinɔ kũ Yebusinɔ kũ Gigasinɔ. Akũ n lɛ́ kũ ń gbɛ̃̀nɛɛ pìi pàpa, kũ ń mana yãi.

⁹ N wari kũ ó dizinɔ kɛ̀ Misila è, n wiki kũ ò lɛ̀ Isira Tɛ̃raii mà.

¹⁰ N sèedanɔ kũ daboyãnɔ kɛ̀ Firi'aunanɛ, n sunyĩ kpài kũ a ìbanɔ kũ a bùsudenɔ ń pínki, zaakũ ń dɔ̃ lákũ ò ania pãsĩ kɛ̀ kũ ó dizinɔ nà. N tɔ́ bò lákũ à kun ari kũ a gbãrao nà.

¹¹ N ísira zɔ̃̀kɔ̃rɛńnɛ, akũ ò táa ò gukoria ò bikũ̀. N gbɛ̃ kũ ò pɛ̀tɛńyĩnɔ zù í lòkoton, n ń zú lán gbɛ̀ɛ bà í zɔ̃kɔ̃ɔ pìi gũn.

¹² N do n gbɛ̃nɔnɛ arɛ tɛ́luku gũn fãnantɛ̃, gwãani sɔ̃ tɛ́ gũn. N zɛ́ kũ à de ò sɛ́ pùńnɛ.

¹³ N kipa Sinai kpi musu, n yã òńnɛ zaa musu. N doka zɛ́de yãpurade kpàḿma kũ yã mana kũ n dìtɛnɔ.

¹⁴ N tò ò kámmabogɔrɔ dɔ̃̀ n pɔ́ ũ. N n yãditɛnanɔ kũ n ɔdɔkio kũ n dokao dà n zɔ̀bleri Musanɛ akũ à kpàḿma.

¹⁵ Kũ nà ń dɛ́, n pɔ́ble gbàrɛńnɛ zaa musu. Kũ ími ń dɛ́, n í bòńnɛ gbɛ̀sin. Bùsu kũ n a la dàńnɛ n pì ĩni kpáḿman n pìńnɛ ò gɛ́ ò sí ń pɔ́ ũ.

¹⁶ Bee kũ abireo ó dizi pìnɔ karambaani vĩ, ń sã gbãna kũ̀, òdigɔ̃ n yãditɛnanɔ kũnaro.

¹⁷ Ò gì n yã mai, daboyã kũ n kɛ̀ńnɛnɔ yã sã̀ńgu. Ń sã gbãna kũ̀ ò bò n yã kpɛ ò don'arɛde dìtɛ à ɛra à tá kũńwo zɔ̀blen. Luda, ndì gbɛ̃nɔ durunna kɛ̃ḿma, ń sùru vĩ kũ wɛ̃ndao, n pɔ dì fɛ̃ likaro, ń gbɛ̃kɛ vĩ zɔ̃kɔ̃, akũ ńdi pã kpáńyĩro.

¹⁸ Bee kũ ò mɔ̀ɔ kàsa lán zùsanɛ bɔ̀rɔɔ bà, ò pì ń dikiri kũ à ń bɔ́tɛ Misilan gwe, akũsɔ̃ ò dɔkɛ̀ kũnwo manamana,

¹⁹ ńdi pã kpáńyĩ gbárannanlo n wɛ̃nda zɔ̃kɔ̃ yãi. Tɛ́luku pìi dòńnɛ arɛ à zɛ́ mɔ̀ńnɛ fãnantɛ̃, tɛ́ pì zɛ́ kũ à de ò sɛ́ pùńnɛ gwãani, adi ń tón zikiro.

²⁰ N n Nini kpàḿma à yã dàńnɛ. Ńdi ń tɛ̃ manaro, kũ ími tɛni ń dɛ, n ń gbá í.

²¹ N ń gwá gbárannan wɛ̃̀ bupla, pɔ́ke dí kĩaḿmaro. Ń pɔ́kasanɔ dí yakaro, ń gbá dí sɛ́sɛro.

²² N burinɔ kpàḿma kũ ń bùsunɔ, n ń bùsuu pìnɔ kpàatɛtɛńnɛ míɔmiɔ. Ò Ɛsɛbɔ̃ kína Siɔ̃ bùsuu sì ń pɔ́ ũ kũ Basã kína Ogu pɔ́o.

²³ N tò ń burinɔ dasi kũ̀ lán susunɛnɔ bà, n gɛ̃ kũńwo bùsu kũ n ò ń denɔnɛ ò gɛ́ ò sí ń pɔ́ ũ gũn.

²⁴ Kũ ń nɛ́nɔ gɛ̀ɛ ò bùsuu pìi sì ń pɔ́ ũ, akũ n Kanaa kũ ò kú gwenɔ kã dɛ̀ńnɛ, n ń náńnɛ ń ɔĩ kũ ń kínanɔ ń pínki, n bùsuu pìi burinɔ kpàḿma, ò ń pɔyeinaa kɛ̀ḿma.

²⁵ Ò wɛ̃tɛ bĩnidenɔ sì kũ zĩtɛ manao, ò kpɛ́nɔ sì kũ pɔ́ mana kũ ò kunnɔ kũ lɔ̀gɔ kũ ò yɔ̃̀nɔ kũ geepi búnɔ kũ kùkpɛnɔ kũ lí kũ òdi a nɛ́ blenɔ à kɛ̀ zɔ̃kɔ̃. Ò pɔ́ blè ò kã̀ ò mɛ̀ɛ kpà, ò nnamanaa mà n arubarika zɔ̃kɔ̃ yãi.

²⁶ Bee kũ abireo ń sã gbãna kũ̀, akũ ò bò n yã kpɛ ò kpɛ lì n dokanɛ. Ò annabi kũ ò lɛ́ dàḿma de ò summanɔ dɛ̀dɛ, ò dɔkɛ̀ kũnwo manamana.

²⁷ N ń ná ń ibɛrɛnɔnɛ ń ɔĩ, ò gbãna sùńnɛ, akũ ò wiki lɛ̀mma ń warikɛnaa gũn. Zaa musu n ń wɛ́kɛ sì n wɛ̃nda zɔ̃kɔ̃ yãi, n surabarinɔ dìtɛńnɛ, akũ ò ń bó ń ibɛrɛɛ pìnɔ ɔĩ.

²⁸ Tó ò a yĩda lè, òdi ɛra ò yã kũ à vãninnɛ kɛmɛ, akũ n ń kpá ń ibɛrɛnɔa, ò gbãna blèḿma. Ò ɛ̀ra ò wiki lɛ̀mma, akũ zaa musu n ń wɛ́kɛ sì, n ń bó gɛ̃̀n ũgbangba n wɛ̃nda yãi.

²⁹ N lɛ́ dàḿma ò arɛ dɔ n dokaa, ama ò dɔkɛ̀ kũnwo òdigɔ̃ n yãditɛnanɔ kũnaro, yã kũ tó gbɛ̃ kũna anigɔ̃ kun a gãi. Ò zã̀ n yã pìnɔa ò kpɛ lìnnɛ, ń sã gbãna kũ̀ ò gì n yã mai.

³⁰ N mɛna kũńwo a wɛ̃̀ dasi, n Nini yã dà n annabinɔnɛ, akũ ò lɛ́ dàoḿma, ama odi sã dɔiro, akũ n ń ná buri pãndenɔnɛ ń ɔĩ.

³¹ N wɛ̃nda zɔ̃kɔ̃ɔ gũn ńdi ń lákaro, Luda sùrude wɛ̃ndadɔ̃nnɛrimɛ n ũ, ńdi pã kpáńyĩro.

³² A yã mɛ́ à tò ó Luda, ń zɔ̃kɔ̃, ń gbãna akũsɔ̃ ń naasi vĩ, lákũ n bàka dìgɔ̃ kú kũoo n gbɛ̃kɛ gũn nà, wari kũ à ó lé kũ ó kínanɔ kũ ó don'arɛdenɔ kũ ó sa'orinɔ kũ ó annabinɔ kũ ó dizinɔ kũ n gbɛ̃nɔ ń pínki zaa Asiria kínanɔ gɔrɔ ari kũ a gbãrao, ǹsun tó à kɛnnɛ fítiro.

³³ Yã kũ à ó lénɔ pínki musu ń mana, bee kũ o yã vãni kɛ̀, ń náani vĩ.

³⁴ Ó kínanɔ kũ ó don'arɛdenɔ kũ ó sa'orinɔ kũ ó dizinɔ odi zĩ kɛ n dokaaro, odi laakari dɔ n yãditɛnanɔaro ke lɛ́ kũ n dàḿmanɔ.

³⁵ Bee gɔrɔ kũ ò ń zĩda vĩ akũsɔ̃ ò pɔ́ mana dasi kũ n ń gbánɔ vĩ kũ bùsu yàasa tɔkɔtɛde kũ n kpàḿmao, odi donyĩro odi kpɛ li ń yã vãninɔnɛro.

³⁶ Ǹ gwa! Zɔ̀nɔn ó ũ gbãra. Bùsu kũ n kpà ó dizinɔa ò a línɛnɔ kũ a pɔ́ mananɔ ble, zɔ̀nɔn ó ũ a gũn.

³⁷ Kína kũ n tò ò kí blewánɔ ó búgbɛ yàasanɔ gɔ̃̀ ń pɔ́ ũ ó durunnanɔ yãi. Òdi kí blewá kũ ó pɔ́kãdenɔ lákũ ò yei nà. Ó kú wɛ́tãmma zɔ̃kɔ̃ɔ gũn.

³⁸ Yã birenɔ yãi pínki ótɛn lɛ́dokɔ̃nɔ kɛ kũnwo kũ yãpurao ótɛn kɛ̃ takada gũn. Ó don'arɛdenɔ kũ Levinɔ kũ ó sa'orinɔ tɛni ń sèeda kɛa.