NƐƐMAYA 8 - Bisã Bible 2005

Ɛzɛra Musa doka kyókɛnaa

¹ Baadi pínki kàkara kũ lɛ́dokɔ̃nɔo batu kũ à kú Í bĩnilɛ sarɛ, akũ ò pì dannɛri Ɛzɛranɛ à bo kũ Musa doka kũ Dikiri dìtɛ Isarailanɔnɛ takadao.

² Mɔ suppla gɔrɔ káakun sa'ori Ɛzɛra bò kũ Musa dokao pari arɛ. Gɔ̃gbɛ̃nɔ kũ nɔgbɛ̃nɔ kũ gbɛ̃ kũ oni fɔ̃ ò yã manɔ ń pínki kú gwe.

³ À arɛ dɔ̀ batu kũ à kú Í bĩnilɛ pìi sarɛa, akũ àtɛn takada pì kyó kɛ zaa kɔnkɔkɔnkɔ ari ifãntɛ̃ kà mìdangura gɔ̃gbɛ̃nɔ kũ nɔgbɛ̃nɔ kũ gbɛ̃ kũ oni fɔ̃ ò manɔ wára. Gbɛ̃ sĩnda pínki sã dɔ̀ Musa doka takada pì kyókɛnaai.

⁴ Dannɛri Ɛzɛra zɛna tìntin lei kũ ò kɛ̀ kũ lío musu takada pì kyókɛna yãi. Matitia kũ Sɛmao kũ Anayao kũ Uriao kũ Ilikiao kũ Masiao kú a ɔplai. Pedaya kũ Misailio kũ Malakiao kũ Asumuo kũ Asabadanao kũ Zakario kũ Mɛsulamuo kú a ɔzɛi.

⁵ Kũ Ɛzɛra takada wɛ̃̀, gbɛ̃ sĩnda pínki è, zaakũ a zɛki lei deńla. Kũ à wɛ̃̀, gbɛ̃ sĩnda pínki fùtɛ ò zɛ̀.

⁶ Ɛzɛra Dikiri Luda zɔ̃kɔ̃de sáabu kpà, akũ gbɛ̃ sĩnda pínki ɔ sɛ̀ musu ò pì: Aami! Aami! Akũ ò mìi pɛ̀tɛ zĩtɛ ò donyĩ kɛ̀ Dikirinɛ.

⁷ Gɔrɔ kũ gbɛ̃nɔ zɛna gwe, Levi kenɔ Musa doka dàdańnɛ. Levi pìnɔ tɔ́n dí: Yesua, Bani, Serebia, Yami, Akubu, Sabetai, Odia, Masia, Kelita, Azaria, Yozabada, Anana kũ Pelayao.

⁸ Ò Luda doka takada pì kyó kɛ̀, akũ ò bɔ̀kɔtɛ ò a wɛ́ wɛ̃̀ńnɛ, de ò le ò kyó pì ma.

⁹ Akũ bùsu gbãnade Nɛɛmaya kũ dannɛri sa'ori Ɛzɛrao kũ Levi kũ òtɛn yã dada gbɛ̃nɔnɛnɔ pìńnɛ: Gɔrɔ díkĩna bi Dikiri á Luda pɔ́mɛ. Àsun wɛ̃nda kɛro àsun ɔ́ɔ dɔro. Zaakũ kũ òtɛn Musa doka yã ma, òtɛn ɔ́ɔ dɔ ń pínki.

¹⁰ Nɛɛmaya pì: À gɛ́ à pɔ́ níside ble à í nnanna mi. À li gbɛ̃ kũ ò pɔ́ke vĩronɔnɛ. Gɔrɔ díkĩna bi ó Dikiri pɔ́mɛ. Àsun wɛ̃nda ɔ́ɔ dɔro, zaakũ pɔnna kũ Dikiri dì kpáwá de á gbãnaleki ũ.

¹¹ Levinɔ gɛ̀ɛ ò gbɛ̃nɔ nɛ̀sɛɛ kpàtɛńnɛ ò pì: À yĩtɛ! Gɔrɔ díkĩna bi Luda pɔ́mɛ, àsun wɛ̃nda ɔ́ɔ dɔro.

¹² Akũ ò fùtɛ ò gɛ̀ɛ ò pɔ́ blè ò í mì, ò lìkɔ̃nɛ ò pɔnna kɛ̀ manamana, zaakũ ò yã kũ ò òńnɛ mà sà.

¹³ Mɔ pì gɔrɔ pladea ɔndenɔ kũ sa'orinɔ kũ Levinɔ kàkara dannɛri Ɛzɛrai, de ò le ò wɛ́ tɛ́ Musa dokai.

¹⁴ Akũ ò yã kũ Dikiri dìtɛ Musanɛɛ lè gwe à pì, Isarailanɔ gɔ̃ kú lá kutanɔ gũn mɔ supplade dikpɛgɔrɔa,

¹⁵ ò yã díkĩna kpàkpa kɛ ń lakutunɔ gũn kũ Yurusalɛmuo ò pi: À bɔtɛ à gɛ́ sɛ̃̀n à kù lánɔ kɛ̃ à suo kũ sãma lánɔ kũ gbɛ̃tɛ̃ lánɔ kũ domina lánɔ kũ lí urade lánɔ, de à lá kutanɔ dɔo lákũ à kú takadan nà.

¹⁶ Akũ gbɛ̃nɔ gɛ̀ɛ ò kɛ̃̀kɛ̃ ò sùo, baadi kuta dɔ̀o a kpɛ́ musu ke ɔnn ke Luda ɔnn ke Í bĩnilɛ batun ke Ɛflaimu bĩnilɛ batun.

¹⁷ Gbɛ̃ kũ ò bò zĩ̀zɔkɛn pìnɔ lá kutanɔ dɔ̀dɔ ń pínki, akũ ò kú a gũn. Zaa Nuni nɛ́ Yɔsua gɔrɔ ari gɔrɔ birea Isarailanɔ dí dikpɛ pì kɛ lɛro. Akũ ò pɔnna kɛ̀ manamana.

¹⁸ Ɛzɛra dìgɔ̃ Luda doka takada kyó kɛ lákũ gu dìgɔ̃ dɔ nà naana zaa dikpɛgɔrɔ káakua ari à gɛ̀ɛ à làkao. Ò dikpɛ pìi kɛ̀ gɔrɔ supplamɛ. A gɔrɔ sɔraakɔ̃dea ò kɔ̃kakaranaa kɛ̀ lákũ ò dìtɛ nà.