Online Bible

NƐƐMAYA 6 - Bisã Bible 2005

Nɛɛmaya ibɛrɛnɔ zɛ́wɛtɛna ò ɔ̃ndɔ̃ kɛnɛ

¹ Ma bĩni bò ma làka a foro kú gukea doro, ama mádi a bĩnilɛ gbànɔ pɛ́tɛpɛtɛ gĩaro. Kũ Sambala kũ Tobiao kũ Larubu buri Gɛsɛmuo kũ ma ibɛrɛ kparanɔ a baaruu mà,

² Sambala kũ Gɛsɛmu pìio lɛ́gbãzã kɛ̀mɛnɛ ò pì mà mɔ́ mà dańlɛ Onɔ guvutɛ lakutu ke gũn. Yã vãnin òtɛn wɛtɛ kũmao.

³ Ma gbɛ̃nɔ zĩ̀ḿma ma pì: Matɛn zĩ zɔ̃kɔ̃ kɛmɛ, mani le mà suro. Mani le mà zĩ pì tón mà su á kĩnaaro.

⁴ Ò lɛ́gbãzã pìi kɛ̀mɛnɛ gɛ̃̀n siikɔ̃, akũ ma yã mɛ̀n do pìi sìńla.

⁵ A gɛ̃̀n sɔɔrode Sambala a ìba ke zĩ̀ma. À takada kũ òdi kãni'ɔ naaro kũna.

⁶ Ò kɛ̃̀ takada pìi gũn ò pì: O yãke mà burinɔ kĩnaa, akũ Gɛsɛmu pì yãpuramɛ. À pì mɔkɔ̃n kũ Yuda kparanɔ a zɛo à bo kína yã kpɛmɛ. Abire yãin átɛn bĩni pì bo. Ò pì dɔ ń ye ǹ gɔ̃ Yudanɔ kína ũmɛ,

⁷ akũ n annabinɔ dìtɛ ò o Yurusalɛmu, mɔkɔ̃mmɛ ń kína ũ. Kína ni yã pì ma. A yã mɛ́ à tò ǹ mɔ́ ò lɛ́ kpákũsũ.

⁸ Akũ ma lɛ́gbãzã kɛ̀nɛ ma pì: Yã kũ ntɛn o kunlo. Mɔkɔ̃mmɛ n yã pìi ò n zĩdaa.

⁹ Ń pínki ò ye vĩna ma kũ ò pì, ó ɔ ni gɔ̃ dɔwáimɛ, óni le ò zĩ pì lákaro. Ma Luda, ǹ ma ɔ gba gbãna.

¹⁰ Ma gɛ Delaya nɛ́ Semaya, Mɛtabɛli daikore bɛa, zaakũ à a zĩda yĩ̀ a kpɛ́n. À pì: Ò dakarɛ Luda kpɛ́n ò a gbà taólɛ, zaakũ gbɛ̃nɔ tɛn su n dɛmɛ. Oni su ò n dɛ gwãanimɛ.

¹¹ Akũ ma pì: Ma taka dì bàa sí yá? Ma taka ni fɔ̃ à gɛ́ utɛ Luda kpɛ́n ma zĩda surabana yãi yá? Mani gɛ́ro.

¹² Má dɔ̃ ma zĩdaa a yã pì dí bo Luda kĩnaaro. À annabikɛyã pìi ò ma yã musu kũ Tobia kũ Sambalao fĩnaa bònɛ yãimɛ.

¹³ À fĩnaa bònɛ de vĩna le à ma kũ mà durunna kɛ mà gɛ́ gwe, gbasa ò ma tɔ́ yaka ò ma sɔ̃sɔ̃.

¹⁴ Ma Luda, Tobia kũ Sambalao yãkɛnaa pì gɔ̃ dɔngu. Nɔgbɛ̃ annabi Nɔadia yã gɔ̃ dɔngu dɔ kũ annabi kpara kũ ò ye vĩna ma kũnɔ.

Yurusalɛmu bĩni lakanaa

¹⁵ Gɔrɔ bupla akuri awɛɛpla gbɛra ò bĩni pìi làka Ɛlulu mɔ gɔrɔ baraasɔɔrodea.

¹⁶ Kũ ó ibɛrɛnɔ a baaruu mà akũsɔ̃ buri kũ ò likanawáinɔ wɛ́ sìalɛ, ń kã gà ò dɔ̃̀ sà kũ o zĩ pìi kɛ̀ kũ ó Luda gbãnao.

¹⁷ Gɔrɔ birea Yudanɔ kínɛnɔ tɛn takada kpãzã Tobianɛ dasi, akũsɔ̃ Tobia pì tɛn kpãzãńnɛ.

¹⁸ Yudanɔ yã yĩ̀ kãao dasi, zaakũ Ara nɛ́ Sɛkaniamɛ a anzure ũ akũsɔ̃ Bɛrɛkia nɛ́ Mɛsulamu mɛ́ à Tobia nɛ́ Yoanana anzure ũ.

¹⁹ Òdi a sáabu kpá ma wára dɔ, akũ òdi ɛra ò ma yã babanɛ. Tobia pì takadanɔ kpã̀zãmɛnɛ dɔ de vĩna le à ma kũ.

« Předchozí

další »

Následuj nás:

Sponzorované odkazy

Reklamy