NƐƐMAYA 5 - Bisã Bible 2005

Nɛɛmaya zɛna kũ takasidenɔ

¹ Gɔrɔ kũ̀a ó Yuda kenɔ kũ ń nanɔnɔ tɛn wiki lɛ́ ń gbɛ̃nɔa manamana.

² Ń gbɛ̃kenɔ pì: Ókɔ̃nɔ kũ ó nɛ́nɔ ó dasi. Ó ye pɔ́blewɛi ò pɔ́ ble ò le ògɔ̃ aafia.

³ Ń gbɛ̃kenɔ pì dɔ: Nà kun, akũ o ó buranɔ kũ ó geepi búnɔ kũ ó kpɛ́nɔ tɔrɔma kɛ̀ pɔ́blewɛ yãi.

⁴ Ń gbɛ̃kenɔ pì: O ɔgɔ sã̀kã de ò ó buranɔ kũ ó geepi búnɔ táfe bo kínanɛ yãi.

⁵ Bee tó ó buri dokɔ̃nɔmɛ, akũsɔ̃ ó nɛ́nɔ dokɔ̃nɔ kũ ń nɛ́nɔ, ótɛni ó nɛ́nɔ yíaḿma zɔ̀nɔ ũ tilasi. Ó nɛ́nɔgbɛ̃ kenɔ tɛn zɔ̀ ble kɔ̀ akũsɔ̃ ó gbãna dí ká ò pɔ́ke kɛ̀ro, zaakũ ó buranɔ kũ ó geepi búnɔ gɔ̃̀ ń pɔ́ ũmɛ.

⁶ Kũ ma ń wiki pìi mà kũ gbɛ̃nɔ káara kũ ò kɛ̀ɛo, ma pɔ fɛ̃̀ manamana.

⁷ Ma yã pìi laasun lɛ̀ ma swɛ̃̀ɛ gũn, akũ ma zuka dɔ̀ kínɛnɔ kũ gbãnadenɔa ma pìńnɛ: Á baadi tɛn ɔgɔ'i ká a gbɛ̃dakenɛ. Akũ ma pì ò pari kakara ń yã pì yãi.

⁸ Ma pìńnɛ: O ó gbɛ̃ Yuda kũ ò gɔ̃̀ buri pãndenɔ pɔ́ ũnɔ bò ó gbãna lɛ́n, akũ a tò á gbɛ̃nɔ tɛni ń zĩda yíawá dɔ yá? Akũ ò yĩtɛ kpɛ̃n, òdi yãke le ò òro.

⁹ Akũ ma ɛra ma pì: Yã kũ átɛn kɛ pì manaro. Àgɔ̃ ó Luda vĩna vĩ de ó ibɛrɛ buri pãndenɔ sún ó sɔ̃sɔ̃ro yãi.

¹⁰ Makũ kũ ma danɛnɔ kũ ma ìbanɔ, o ɔgɔ kũ pɔ́wɛo sã̀kãńnɛ dɔ. À ɔgɔ'ikannɛna tó sà,

¹¹ à ń buranɔ kũ ń geepi búnɔ kũ ń kùkpɛnɔ kũ ń kpɛ́nɔ sukpańnɛ kũ pɔ́ basɔɔrode kũ átɛn síḿma ɔgɔ'i ũo, ɔgɔ kũ pɔ́wɛo kũ wɛ̃o kũ nísio pínki.

¹² Akũ ò pì: Óni sukpańnɛ, óni pɔ́ke wɛtɛḿma doro. Óni kɛ lákũ n ò nà. Akũ ma sa'orinɔ sìsi ma tò gbɛ̃ pìnɔ la dàń wára lákũ ò a lɛ́ sɛ̀ nà.

¹³ Ma a uta zɔ̃kɔ̃ɔ kpùkɛ ma pì: Luda gbɛ̃ kũ adi zĩ kɛ lɛ́ kũ à gbɛ̃̀ɛ pìiaro kpukɛ lɛ à a bɛ kũ a aruzɛkɛnɔ sía. Luda a kpukɛ de à gɔ̃ kori lɛ. Pari pì: Aami! Akũ ò Dikiri sáabu kpà. Akũ gbɛ̃nɔ kɛ̀ lákũ ò a lɛ́ sɛ̀ nà.

¹⁴ Abire gbɛra zaa gɔrɔ kũ kína Atasɛsɛ ma ditɛ Yudanɔ bùsu don'arɛde ũ a kíblena wɛ̃̀ baroden ari a wɛ̃̀ baraakuri awɛɛplade gũn, à kà wɛ̃̀ kuri awɛɛpla, makũ kũ ma danɛnɔ ódi don'arɛdekɛ pɔ́ blero.

¹⁵ Don'arɛde káaku kũ à dòmɛnɛ arɛnɔ aso tìkisii tɔ̃̀ gbɛ̃nɔa, ò pɔ́ble kũ sèwɛ̃o sì baadia kũ andurufu ɔgɔ mɛ̀n buplabuplao. Ń ìbanɔ gbãna blèḿma dɔ. Makũ sɔ̃, mádi kɛ lɛro, zaakũ má Luda vĩna vĩ.

¹⁶ Ma mɛ̀ɛ kpà bĩni pì bonaaa, mádi zĩtɛ sɛ́ ma pɔ́ ũro. Ma ìbanɔ kakarana gwe zĩ pì yãi.

¹⁷ Yudanɔ dìgɔ̃ pɔ́ ble ma bɛa gbɛ̃nɔn basuppla akurikuri, gbãnadenɔ kũ gbɛ̃ kũ ò bò buri kũ ò likanawáinɔ kĩnaanɔ.

¹⁸ Lákũ gu dìgɔ̃ dɔ nà òdigɔ̃ zù kɛkɛmɛnɛ mɛ̀n dodo kũ sã mɛ̀kpananɔ mɛ̀n suddodo kũ konɔ, akũsɔ̃ òdigɔ̃ sèwɛ̃ ba zɔ̃kɔ̃zɔ̃kɔ̃ gɔrɔ kuri kũ gɔrɔ kuriio. Bee kũ abireo mádi don'arɛdekɛ pɔ́ble gbɛkaḿmaro, zaakũ zĩ kũ gbɛ̃ abirenɔ tɛn kɛ zɔ̃kɔ̃.

¹⁹ Ma Luda, yã mana kũ ma kɛ̀ gbɛ̃ dínɔnɛ pínki gɔ̃ dɔngu.