NƐƐMAYA 4 - Bisã Bible 2005

Ibɛrɛsɛna kũ Yurusalɛmu bĩniborinɔ

¹ Kũ Sambala mà ókɔ̃nɔ Yudanɔ ótɛn Yurusalɛmu bĩni bo, a pɔ fɛ̃̀ a laakarii fùtɛ manamana, akũ àtɛni ó lalandi kɛ.

² À pì a gbɛ̃nɔ kũ Samaria zĩ̀karinɔ wára: Bɔ́n Yuda ginaa pìnɔ tɛn kɛɛ? oni fɔ̃ ò ɛra ò bĩni pì bo yá? Oni sa o ò zĩ pì nɛ́ gɔrɔ do yá? Oni fɔ̃ ò wɛ̃tɛ pì vu kũ gbɛ̀ kũ à tɛ́ kũ̀ à katɛnaa pìnɔ yá?

³ Amɔni buri Tobia kú a sarɛ, akũ à pì: Bĩni kũ òtɛn bo pìi, tó gbɛ̃gbon dìdia, a gbɛ̀nɔ gboro fá!

⁴ Akũ ma pì: Ó Luda, ǹ ó yã ma, zaakũ ò dɔkɛ̀ kũoo. Ǹ tó ó lalandi kũ òtɛn kɛ wí ń musu. Ǹ tó ò ń kũkũ ò tá kũńwo zĩ̀zɔnɔ ũ.

⁵ Ǹsun lá kú ń taarinɔlaro. Ǹsun ń durunnanɔ wararo, zaakũ ò bĩniborinɔ sɔ̃̀sɔ̃.

⁶ Lɛn o bĩni pìi bò lɛ ari à pɛ̀kɔ̃a, akũ a lei kà guragura, zaakũ gbɛ̃nɔ tɛn zĩ pì kɛ kũ nɛ̀sɛ mɛ̀n doomɛ.

⁷ Kũ Sambala kũ Tobiao kũ Larubunɔ kũ Amɔninɔ kũ Asadɔdidenɔ mà Yurusalɛmu bĩnikɛkɛna tɛn gɛ́ arɛ guforonɔ tɛn tata, ń pɔ fɛ̃̀ manamana.

⁸ Akũ ò lɛ́ kpàkũsũ ń pínki ò pì oni su lɛ́tɛ Yurusalɛmua ò yãkete likańyĩ.

⁹ Akũ o wɛ́ kɛ̀ ó Ludaa akũsɔ̃ o gudãkpãrinɔ dìtɛditɛ fãnantɛ̃ kũ gwãanio ń yãi.

¹⁰ Akũ Yudanɔ pì: Asosɛrinɔ gbãna tɛn láka. Gbɛ̀ kũ ò gbòro ò wùtɛ dasi, óni fɔ̃ ò bĩni pì bo ò a lákaro.

¹¹ Ó ibɛrɛnɔ pì, ari ògɔ̃ gɛ́ ń yã dɔ̃, oni siógu ò ó dɛdɛ, zĩ pì ni gɔ̃ kpana zɛ́n.

¹² Ó gbɛ̃ kũ ò kú ń sarɛnɔ sù ò pìwɛrɛ à kà gɛ̃̀n kuri ò pì: òtɛn bo gu sĩnda pínkia, ò ye ò su ò lɛ́tɛwá.

¹³ Akũ ma gbɛ̃nɔ dìtɛditɛ bĩni foronɔ gũn kũ a gu kũ ò kɛ̀ ɛtɛnlenɔ. Ma ń dítɛditɛ danɛdanɛ, baadi kũ a fɛ̃nɛdao kũ a sário kũ a sáo.

¹⁴ Kũ ma wɛ́ pɛ̀ gunɔi, ma futɛ ma pì kínɛnɔnɛ kũ gbãnadenɔ kũ gbɛ̃ kparanɔ: Àsun vĩna kɛńnɛro. Àgɔ̃ dɔ̃ kũ Dikiri zɔ̃kɔ̃ à naasi vĩ. À zĩ̀ ká á gbɛ̃nɔnɛ kũ á nɛ́gɔ̃gbɛ̃nɔ kũ á nɛ́nɔgbɛ̃nɔ kũ á nɔnɔ kũ á bɛnɔ.

¹⁵ Kũ ó ibɛrɛnɔ mà Luda ń fú à tò o ń lɛ́kpakũsũna asiri mà, akũ ó pínki o ɛra o na bĩnibonaaa, baadi kũ a zĩo.

¹⁶ Zaa gɔrɔ birea ma gbɛ̃nɔ kpàatɛtɛ lɛu pla. Gbɛ̃kenɔ tɛn zĩ kɛ, gbɛ̃kenɔ sári kũna kũ sɛ̃gbakoo kũ sáo kũ mɔ̀'utao dana. Gbɛ̃ zɔ̃kɔ̃nɔn zɛna gbɛ̃ kũ òtɛn bĩni bonɔ kpɛ.

¹⁷ Gbɛ̃ kũ ò aso sɛnanɔ aso kũna ɔdo, gɔ̃kɛbɔ ɔdo.

¹⁸ Bĩniborinɔ fɛ̃nɛda dɔna ń pi ń pínki. Kurupɛri dìgɔ̃ kú ma sarɛ.

¹⁹ Akũ ma pì kínɛnɔnɛ kũ gbãnadenɔ kũ gbɛ̃ kparanɔo: Zĩ dasi akũsɔ̃ bĩni pìi gbã̀na, akũ o kɔ̃ kpàatɛtɛ a lɛ́n.

²⁰ Gu kũ a mà òtɛn kuru pɛ́n, à kɔ̃ kakarawái gwe, ó Luda ni zĩ̀ káwɛrɛ.

²¹ Akũ o ɛra o na zĩa, gbɛ̃kenɔ sári kũna zaa gugurugurua ari susunɛnɔ gɛ̀ɛ ò bɔ̀tɛo.

²² Zĩ kũ̀a ma pì gbɛ̃nɔnɛ: Á baadi gɔ̃ i Yurusalɛmu la kũ a ìbanɔ, de àgɔ̃ le à gu dãkpã gwãani àgɔ̃ zĩ kɛ fãnantɛ̃.

²³ Makũ kũ ma dakũnanɔ kũ ma ìbanɔ kũ gudãkpãri kũ ò kú kũmaonɔ, odì ó pɔ́kasa boro, baadi dìgɔ̃ a gɔ̃kɛbɔ kũna a ɔplammɛ.