Online Bible

NƐƐMAYA 2 - Bisã Bible 2005

Kína Atasɛsɛ Nɛɛmaya zĩna Yurusalɛmu

¹ Kína Atasɛsɛ kíblena wɛ̃̀ barode mɔ kũ òdi pi Nisã gũn kína ye à wɛ̃ mi, akũ ma sɛ̀ ma kpàa. Adi ma e kũ ãnsisinaao zikiro,

² akũ à ma la à pì: Bɔ́ yã mɛ́ à tò n ãn sisinaa? Ntɛn gyã kɛro. N nɛ̀sɛ mɛ́ à yàkaa? Vĩna ma kũ manamana,

³ akũ ma pìnɛ: Luda n dɔ̃ kũ aafiaao, Zaaki! Ma ãn sisina, zaakũ wɛ̃tɛ kũ ma dizinɔ mira kun gɔ̃̀ bɛzĩ ũ. A bĩnilɛ gbànɔ tɛ́kũna.

⁴ Akũ à pìmɛnɛ: Ń ye mà kɛ deramɛɛ? Ma wɛ́ kɛ̀ Luda Musudea gĩa,

⁵ akũ ma wea ma pì: Kí, tó à kɛ̀nnɛ mana akũsɔ̃ makũ n zɔ̀bleri yã kàngu, ǹ ma zĩ Yudanɔ bùsu wɛ̃tɛ kũ ma dizinɔ mira kun pìn, de mà le mà kɛkɛ mà kátɛ.

⁶ Kína pì nanɔ vutɛna a sarɛ, akũ à ma la à pì: Ĩnigɔ̃ kú gwe ari bɔrɛmɛɛ? Bɔrɛn ĩni suu? Kũ kína wè ma gɛnaai, akũ ma gɔrɔ dìtɛnɛ.

⁷ Ma pìnɛ: Tó à kɛ̀nnɛ, ǹ takada kɛ̃ Yuflati bara dire don'arɛdenɔnɛ ǹ kpáma. Ǹ ońnɛ ò tó mà gɛ̃ ń bùsun ari mà gɛ́ káo Yudanɔ bùsun.

⁸ Ǹ takada kɛ̃ n líkpɛ dãkpãri Asafanɛ dɔ. Ǹ onɛ à ma gba lí mà zɛki gbãna kũ à kú Luda kpɛ́ sarɛ lɛ́nɔ kɛo kũ bĩnilɛnɔ kũ kpɛ́ kũ manigɔ̃ kun pɔ́o. Akũ kína pɔ́ kũ ma gbɛ̀kaawa kpàma, zaakũ ma Luda ɔ kúma.

⁹ Kína soza bàdenɔ kũ sɔ̃denɔ dàmɛnɛ ò gɛ́ kũmao. Akũ ma gɛ ma Yuflati bara dire don'arɛdenɔ lè ma kína takadanɔ kpàḿma.

¹⁰ Kũ Oronu gbɛ̃ Sambala kũ a ìba Tobia, Amɔni burio mà gbɛ̃ke sù Isarailanɔ gwena kara, à kɛ̀ńnɛ ĩni manamana.

¹¹ Kũ ma ka Yurusalɛmu, ma kámma bò gĩa gɔrɔ aakɔ̃.

¹² Akũ ma futɛ gwãani kũ gbɛ̃kenɔ, mádi yã kũ ma Luda dà ma swɛ̃̀n mà kɛ Yurusalɛmu o gbɛ̃kenɛro. Má di zaaki kpɛ, gbɛ̃ kparanɔ tɛ́ gɛ̀sɛ.

¹³ Ma bo Guvutɛ bĩnilɛn gwãani ma mìi pɛ̀ Gbɛ̃gbon lɔ̀gɔɔa kũ Tubura bĩnilɛo. Matɛn Yurusalɛmu bĩni kũ ò gbòro gwagwa kũ a bĩnilɛ tɛ́kũnanɔ.

¹⁴ Akũ ma gɛ arɛ ari Ísɛ̃boki bĩnilɛa kũ Kína íkakio. Gu ke kú gwe, ma zaaki dí fɔ̃ à gɛ̃̀nlo,

¹⁵ akũ má tɛ́ swawɛɛn gwãani, matɛn bĩni gwagwa. Akũ ma ɛra ma su ma gɛ̃ Guvutɛ bĩnilɛn.

¹⁶ Gbãnadenɔn gu kũ ma gɛn ke yã kũ ma kɛ̀ dɔ̃ro, zaakũ mádi yãke o Yudanɔnɛ gĩaro, bee sa'orinɔ ke kínɛnɔ ke gbãnadenɔ ke gbɛ̃ kpara kũ oni zĩ pì kɛnɔ.

¹⁷ Akũ ma pìńnɛ: A wari kũ à ó lé è yá? Yurusalɛmu gɔ̃̀ bɛzĩ ũ, a bĩnilɛnɔ tɛ́kũna. À tó ò ɛra ò bĩni bo dɔ de òsungɔ̃ de lalandi pɔ́ ũ doro yãi.

¹⁸ Ma pìńnɛ dɔ lákũ ma Luda ɔ kúma nà kũ yã kũ kína òmɛnɛo. Akũ ò pì: Ò futɛ ò na a bonaaa. Akũ ò nà zĩ mana pìia ɔplapla.

¹⁹ Kũ Oronu gbɛ̃ Sambala kũ a ìba Tobia, Amɔni burio kũ Larubu buri Gɛsɛmuo a baaruu mà, ò ó fobò ò ó gya bò ò pì: Bɔ́n átɛn kɛ gwee? Átɛn bo kína yã kpɛn yá?

²⁰ Akũ ma yã sìńla ma pì: Luda Musude ni tó ò sa'a kũ. Ókɔ̃nɔ a zɔ̀blerinɔ, Yurusalɛmu bĩnibonaan ótɛn naa dí. Ákɔ̃nɔ sɔ̃ á baka kunlo. Á yã kú la doro, á tɔ́ nigɔ̃ dɔ gbɛ̃kegu wɛ̃tɛ dí gũn doro.

« Předchozí

další »

Následuj nás:

Sponzorované odkazy

Reklamy