Online Bible

NARONAA 24 - Bisã Bible 2005

¹ Kũ Balamu è sa mana ona Isarailanɔnɛ kà Dikirigu, adi gɛ́ màso kɛ lán yã bà doro, akũ à arɛ dɔ̀ gbárannaa.

² Kũ à wɛ́ zù, akũ à Isarailanɔ è katɛna ń buria. Luda Nini kìpaa,

³ akũ à yã kũ à èe ò à pì: Bɛɔ nɛ́ Balamu yãn dí, makũ kũ ma wɛ́ kɛ̃na yãn dí.

⁴ Makũ kũ madì Luda yã ma yãn dí. Ma Gbãnasĩndapinkide wɛ́gupu è, ma wutɛ nɛ̀sɛlɛ kutɛna, ma wɛ́ wɛ̃na.

⁵ Yakubu burinɔ bùrakatɛna mana fá! Isaraila bizakutanɔn mana!

⁶ Ò katɛna lán guvutɛ dàkonɔ bà, lán swa dɔ̀rɔ kara búnɔ bà. Ò de lán zà lí kũ Dikiri bànɔ bà, lán sida lí kũ ò kú í sarɛnɔ bà.

⁷ Í ni ń orozãnɔ pa yɛ́rɛrɛ, ń pɔ́tɔ̃nanɔ ni í le manamana. Ń kína gbãna nigɔ̃ de Agaga pɔ́la, ń kpata ni tɔ́ bo.

⁸ Luda ń bɔ́tɛ Misila, ò gbãna vĩ lán zùsɛ̃ntɛ bà. Òdi zĩ̀ ble buri kũ ò ibɛrɛɛ kpà kũńwonɔa, òdi ń wánɔ wíwi òdi ń pápa kũ kàao.

⁹ Òdi sɔ̃pɛtɛ ò wútɛ lán músuu bà, dí mɛ́ ani fɔ̃ à ń futɛɛ? Luda arubarika da gbɛ̃ kũ oni sa mana ońnɛnɔgu, à gbɛ̃ kũ oni sa vãni ońnɛnɔ ká.

¹⁰ Balaki pɔ fɛ̃̀ Balamui à ɔnɛ dɔ̀a à pì: Ma ibɛrɛnɔ kana yãin ma n sisi, akũ n sa mana òńnɛ gɛ̃̀n aakɔ̃ yá?

¹¹ Ǹ tá n bɛa gɔ̃̀nɔ. Ma pì mani gba kɛnnɛmɛ yã, akũsɔ̃ Dikiri gìnnɛ ǹ láada le.

¹² Balamu pìnɛ: Mádi o gbɛ̃ kũ n ń zĩmanɔnɛroo!

¹³ Ma pì bee tó n ma gba n bɛ kũ à pana kũ andurufuuo kũ wuraao, mani bo Dikiri yã kpɛ mà yã kɛ kũ ma zĩda pɔyeinaaoro, a mana ke a vãni. Yã kũ Dikiri pì mà on mani o.

¹⁴ Matɛn tá ma gbɛ̃nɔ kĩnaa sà. Ǹ mɔ́ mà onnɛ lákũ gbɛ̃ pìnɔ ni kɛ n gbɛ̃nɔnɛ nà zia.

Balamu yã siikɔ̃de kũ à è onaa

¹⁵ Akũ Balamu yã kũ à èe ò à pì: Bɛɔ nɛ́ Balamu yãn dí, makũ kũ ma wɛ́ kɛ̃na yãn dí.

¹⁶ Makũ kũ madì Luda yã ma yãn dí. Má Luda Musude nɛ̀sɛgũnyã dɔ̃. Ma Gbãnasĩndapinkide wɛ́gupu è, ma wutɛ nɛ̀sɛlɛ kutɛna, ma wɛ́ wɛ̃na.

¹⁷ Matɛn Isarailanɔ e, adi kɛ teranlo, matɛni ń gwa, a gɔrɔ dí ká gĩaro. Susunɛ ni bo Yakubu burinɔ tɛ́, kpatableri ni bo Isarailanɔ tɛ́, ani Mɔabunɔ mì wíwi, ani zukakari pìnɔ mìtoko fɔ̃fɔ̃.

¹⁸ Ɛdɔmu bùsu ni gɔ̃ a pɔ́ ũ, a ibɛrɛ Sei bùsu ni gɔ̃ a pɔ́ ũ, Isarailanɔ gbãna nigɔ̃ karamɛ.

¹⁹ Yakubu buri ke ni kí bleḿma, ani gbɛ̃ kpara kũ ò gɔ̃̀nɔ kakatɛ.

²⁰ Balamu Amalɛki burinɔ è, akũ à yã kũ à èe ò à pì: Amalɛki burinɔ bi burinɔ mìdemɛ, ama oni kakatɛ zã.

²¹ Kũ Balamu Keninɔ è, akũ à yã kũ à èe ò à pì: Á kúki gbãna gíngin, á sà kú gbɛ̀ musu.

²² Bee kũ abireo oni á kakatɛmɛ, Asirianɔ ni á kũkũ zĩ̀zɔnɔ ũ.

²³ Balamu yã kũ à èe ò dɔ à pì: O'o, tó Luda kɛ̀ lɛ, dí mɛ́ ani boo?

²⁴ Gó'itɛnɔ ni bo Sipiru bùsun, oni zĩ̀ ble Asirianɔ kũ Eberunɔa, ama mɔ́kɔ̃nɔ ni kakatɛmɛ se.

²⁵ Balamu fùtɛ à tà a bɛa, akũ Balaki dà zɛ́n se.

« Předchozí

další »

Následuj nás:

Sponzorované odkazy

Reklamy