MATIU 6 - Bisã Bible 2005

Gbadanaa

¹ À laakari kɛ á donyĩyãkɛna gupuraai. Àsun kɛ bisãsiri wɛ́ yãiro. Tó átɛn kɛ lɛ, áni láada le á De kũ à kú musu kĩnaaro.

² Tó ntɛn gba da takasidenɔnɛ, ǹsun a kpàkpa kɛ lán manafikidenɔ bàro. Òdi kɛ aduakɛkpɛnɔ gũn kũ gãnulɛanɔ de gbɛ̃nɔ ń tɔ́ nna sí yãimɛ. Yãpuran matɛn oárɛ, ò ń láada lèn gwe kɔ̀!

³ Mɔkɔ̃n, tó ntɛn gba da takasidenɔnɛ, ǹsun tó n ɔzɛ dɔ̃ lán n ɔpla tɛn kɛ nàro.

⁴ Ǹ tó n gbadana kɛ asiriyã ũ, n De kũ à asiriyã dɔ̃ ni a fĩna bonnɛ.

Aduakɛnaa

⁵ Tó átɛn adua kɛ, àsungɔ̃ de lán manafikidenɔ bàro. Òdigɔ̃ ye ò adua kɛ zɛna aduakɛkpɛn kũ zɛ́rankpakɔ̃anɔ de gbɛ̃nɔ ń e yãi. Yãpuran matɛn oárɛ, ò ń láada lèn gwe kɔ̀!

⁶ Mɔkɔ̃n, tó ntɛn adua kɛ, ǹ gɛ̃ n kpɛ́ gũn, ǹ gbà tata, ǹ wɛ́ kɛ n De kũ à kú gwe asiri gũnwa, n De kũ à asiriyã dɔ̃ ni sí kũnwo.

⁷ Tó átɛn adua kɛ, àsun yã bɔtɛ dasi lán kifirinɔ bàro. Òdigɔ̃ da ń yãbɔtɛna dasi gũn Luda ni sí kũńwo.

⁸ Àsungɔ̃ de lán ń bàro, zaakũ á De pɔ́ kũ á a ni vĩ dɔ̃ ari àgɔ̃ gɛ́ gbɛkaa.

⁹ Àgɔ̃ adua kɛ lán dí bà: Ó De kũ à kú musu, ǹ tó ògɔ̃ dɔ̃ kũ n tɔ́ adona,

¹⁰ Ǹ tó kpata kũ à bò n kĩnaa bo gupuraa, ò n pɔyenyĩna kɛ andunia gũn, lákũ òdi kɛ zaa musu nà.

¹¹ Ǹ ó gba ú kũ óni ble gbãra.

¹² Ǹ ó taarinɔ kɛ̃wá, lákũ odì kɛ̃ gbɛ̃ kũ ò taari kɛ̀wɛrɛnɔnɛ nà.

¹³ Ǹsun tó ò fu yɔ̃ogwanaaaro, ǹ ó sí a vãnia.

¹⁴ Tó a gbɛ̃nɔ taari kɛ̃̀ńnɛ, á De kũ à kú musu ni á pɔ́ kɛ̃árɛ se.

¹⁵ Tó adi gbɛ̃nɔ taarinɔ kɛ̃ńnɛ sɔ̃ro, á De ni á taarinɔ kɛ̃árɛro.

Lɛ́yĩnaa

¹⁶ Tó á lɛ́yĩna sɔ̃, àsun ãn sisi lán manafikidenɔ bàro. Òdi ń ãn yãkatɛ de gbɛ̃nɔ gɔ̃ dɔ̃ kũ ò lɛ́yĩna yãi. Yãpuran matɛn oárɛ, ò ń láada lèn gwe kɔ̀!

¹⁷ Mɔkɔ̃n, tó ń lɛ́yĩna, ǹ ãn pípi, ǹ nísi mámamma,

¹⁸ de gbɛ̃nɔ sún dɔ̃ ń lɛ́yĩnaro, sé n De kũ à kú asiri gũn baasiro. N De kũ à asiriyã dɔ̃ ni a fĩna bonnɛ.

Aruzɛkɛ yã

¹⁹ Àsun aruzɛkɛ kakaraái andunia gũn laro, gu kũ kɔ̀kɔnɔ dì pɔ́ yakan, pɔ́nɔ dì dã̀a kpán akũsɔ̃ kpãninɔ dì gu fɔ̃ ò pɔ́nɔ sɛ́tɛn.

²⁰ À á aruzɛkɛ kakara ludambɛ, gu kũ kɔ̀kɔnɔ dì pɔ́ yakanlo, pɔ́nɔ dì dã̀a kpánlo akũsɔ̃ kpãninɔ dì gu fɔ̃ ò pɔ́nɔ sɛ́tɛnlo.

²¹ Zaakũ gu kũ n aruzɛkɛ kún, gwen n laakarii dìgɔ̃ kún se.

²² Wɛ́mɛ mɛ̀ fitila ũ. Tó n wɛ́ aafia, n mɛ̀ pínki nigɔ̃ gupura ũ.

²³ Tó n wɛ́ manaro sɔ̃, n mɛ̀ pínki nigɔ̃ gusira ũ. Tó gupura kũ ń kũna de gusira ũ, gusira pì zɔ̃kɔ̃.

²⁴ Gbɛ̃ke dì fɔ̃ à zɔ̀ ble dikiri mɛ̀n planɛro, zaakũ ani zã gbɛ̃ don àgɔ̃ ye gbɛ̃ doi, kesɔ̃ ani na gbɛ̃ doa à gbɛ̃ do gya bo. Áni fɔ̃ àgɔ̃ zɔ̀ ble Ludanɛ kũ ɔgɔo lɛɛlɛro.

Ludanaanikɛnaa

²⁵ Abire yãi matɛn oárɛ, àsun á wɛ̃̀ndi damu kɛ à pi bɔ́n óni ble ke bɔ́n óni miro. Àsun mɛ̀ damu kɛ à pi bɔ́n óni daro. Wɛ̃̀ndi de pɔ́blelaroo? Mɛ̀ de pɔ́kasalaroo?

²⁶ À gwa bãnɔa. Òdi pɔ́ tɔ̃ro, òdi pɔ́ kɛ̃ro, òdi pɔ́ ká dɔ̃̀ɔ gũnlo, ama á De kũ à kú musu dì pɔ́ble kpáḿma. Á bɛ̀ɛrɛ vĩ manamana de bãnɔlaroo?

²⁷ Á tɛ́, dí mɛ́ ani fɔ̃ à a wɛ̃̀ndi gbã̀na kara, bee gɔrɔ do, a damukɛnaa gũnn?

²⁸ Bɔ́yãin adì pɔ́kasa damu kɛɛ? À lávunɔ gwa sɛ̃̀n lákũ ò de nà. Òdi zĩ kɛro, òdi buu tãro,

²⁹ ama matɛn oárɛ, bee Sulemanu kũ a aruzɛkɛo, adi uta da a mana kà ń ke ũro.

³⁰ Sɛ̃̀la kũ à kun gbãra ani tɛ́ kũ zia, lákũ Luda dì pɔ́ nai lɛ nà, ákɔ̃nɔ ludanaanikĩanadenɔ, oni á pɔ́ o dɔ yá?

³¹ Abire yãi àsun pɔ́ke damu kɛ à pi bɔ́n óni ble ke bɔ́n óni mi ke bɔ́n óni daro.

³² Kifirinɔn pɔ́ pìnɔ pínki yã dì dońnɛ arɛ. Zaakũ á De kũ à kú musu dɔ̃ kũ pɔ́ pìnɔ kɔ̃ sì kãáo,

³³ à tó kpata kũ à bò a kĩnaa kũ a yãzɛdeo doárɛ arɛ gĩa, ani á pɔ́ pìnɔ karaárɛ pínki.

³⁴ Abire yãi àsun zia damu kɛro, zaakũ zia a zĩda yã dɔ̃. Gɔrɔ sĩnda pínki yã'ũmmanaa mɔ̀a.