Online Bible

MATIU 5 - Bisã Bible 2005

Arubarikadenɔmɛ Yesu ìbanɔ ũ
( Luk 6:20-23 )

¹ Kũ Yesu pari pìnɔ è, à dìdi sĩ̀sĩia. Kũ à vùtɛ, a ìbanɔ sù a kĩnaa,

² akũ à nà yãdannɛnaaa à pì:

³ Arubarikadenɔmɛ gbɛ̃ kũ ò ń kĩana dɔ̃nɔ ũ, zaakũ kpata kũ à bò Luda kĩnaa de ń pɔ́ ũ.

⁴ Arubarikadenɔmɛ pɔsiradenɔ ũ, zaakũ Luda ni ń laakari kpátɛńnɛ.

⁵ Arubarikadenɔmɛ zĩdabusarinɔ ũ, zaakũ mɔ́kɔ̃nɔ mɛ́ onigɔ̃ andunia vĩ.

⁶ Arubarikadenɔmɛ yãzɛde nidɛrinɔ ũ, zaakũ mɔ́kɔ̃nɔ mɛ́ oni kã.

⁷ Arubarikadenɔmɛ wɛ̃ndadɔ̃nnɛrinɔ ũ, zaakũ Luda ni ń wɛ̃nda dɔ̃.

⁸ Arubarikadenɔmɛ nɛ̀sɛpuradenɔ ũ, zaakũ mɔ́kɔ̃nɔ mɛ́ oni wɛ́ si Ludalɛ.

⁹ Arubarikadenɔmɛ ibɛrɛmidɛrinɔ ũ, zaakũ oni ń sísi Luda nɛ́nɔ.

¹⁰ Arubarikadenɔmɛ gbɛ̃ kũ òdi wari dɔḿma ń yãmanakɛna yãinɔ ũ, zaakũ kpata kũ à bò Luda kĩnaa de ń pɔ́ ũ.

¹¹ Arubarikadenɔmɛ á ũ, tó ò á sɔ̃sɔ̃, tó ò wari dɔ̀áwa, tó ò yã vãni sĩnda pínki dìáwa ma yãi.

¹² À pɔnna kɛ à yáa dɔ, zaakũ á láada zɔ̃kɔ̃ ludambɛ. Lɛn ò wari dɔ̀ annabi kũ ò kú á ãnɔa lɛ.

Yesu ìbanɔmɛ wisi ũ kũ gupurao
( Maa 9:50 ; Luk 14:34-35 )

¹³ Ákɔ̃nɔ mɛ́ á wisi ũ andunianɛ. Tó wisi i nna tà, deran oni kɛ nà à gɔ̃ wisi ũ dɔɔ? À àre ke vĩ doro, séde ò kɔ́tɛ gbɛ̃nɔ táa oa.

¹⁴ Ákɔ̃nɔ mɛ́ á gupura ũ andunianɛ. Wɛ̃tɛ kũ ò kàtɛ sĩ̀sĩi musu dì fɔ̃ àgɔ̃ utɛnaro.

¹⁵ Òdi fitila na ò gbaka kútɛaro. Òdi a di a dibɔɔ musumɛ, de à gu pu gbɛ̃ kũ ò kú ɔnnnɔnɛ.

¹⁶ À gu pu gbɛ̃nɔnɛ lɛ, de ò á yãmanakɛnanɔ e ò á De kũ à kú musu tɔ́ kpá.

Musa doka bɔkɔtɛnaa

¹⁷ Àsungɔ̃ da ma su Musa doka kũ annabinɔ yãnɔ gboronlo. Mádi su gbororo, ma su de mà papamɛ.

¹⁸ Yãpuran matɛn oárɛ, ludambɛ kũ zĩtɛo ni gɛ̃tɛ, ama doka pì wãnzãn fítinle ke a pɔ́ kete ke ni gɛ̃tɛro, yã sĩnda pínki ni kɛ.

¹⁹ Abire yãi tó gbɛ̃ gì yã kũ ò dìtɛ pìnɔ dokei, bee a kũ à kĩ̀ańyĩ, tó àdi da gbɛ̃nɔnɛ ò kɛ lɛ, ade nigɔ̃ kĩańyĩ kpata kũ à bò Luda kĩnaa gbɛ̃nɔ tɛ́mɛ. Tó gbɛ̃ kũna, tó àdi dańnɛ lɛ sɔ̃, ade nigɔ̃ zɔ̃kɔ̃ kpata kũ à bò Luda kĩnaa gbɛ̃nɔ tɛ́.

²⁰ Matɛn oárɛ, tó á yãmanakɛna de ludayãdannɛrinɔ kũ Farisinɔ pɔ́laro, áni gɛ̃ kpata kũ à bò Luda kĩnaa gũnlo.

Pɔfɛ̃naa

²¹ A mà ò pì yãdenɔnɛ òsun gbɛ̃ dɛro. Gbɛ̃ kũ à gbɛ̃ dɛ̀ɛ, oni yãkpatɛ kɛ kãao.

²² Makũ sɔ̃, matɛn oárɛ, gbɛ̃ kũ à pɔ fɛ̃̀ a gbɛ̃dakeii kà ò yãkpatɛ kɛ kãao. Gbɛ̃ kũ à a gbɛ̃dake sɔ̃̀sɔ̃ɔ kà ò gɛ́ kãao gbãnadenɔ kĩnaa. Gbɛ̃ kũ à pì a gbɛ̃dakenɛ mìsaride sɔ̃ kà à gɛ̃ tɛ́n gyãwãnn.

²³ Tó n su ǹ Luda gba pɔ́ a gbagbakia, tó n dɔn gwe kũ n gbɛ̃dake n yã kũna,

²⁴ ǹ n gba tó sa'oki arɛ gwe, ǹ gɛ́ ǹ kútɛ kɛ n adenɛ gĩa, gbasa ǹ su ǹ sa o sà.

²⁵ Tó n ibɛrɛ tɛn gɛ́ kũnwo yãkpatɛkɛkia, ǹ kɛ likalika ǹ kɛ kãao nna zaa zɛ́n, de àsun n kpá yãkpatɛkɛriaro yãi. Tó ńdi kɛ lɛro, yãkpatɛkɛri pì ni n kpá dogariia, dogari ni n da kpɛ́siran.

²⁶ Yãpuran matɛn onnɛ, ĩni bo gwero ari ǹ gɛ́ fĩna boo pínki. Bee kɔbɔ ni gɔ̃ tɛ́nyĩro.

Zinakɛnaa

²⁷ A mà ò pì, àsun zina kɛro.

²⁸ Makũ sɔ̃, matɛn oárɛ, tó gbɛ̃ nɔgbɛ̃ gwà kũ laasun pãndeo, ade zina kɛ̀ kãaon gwe kɔ̀.

²⁹ Tó n ɔpla wɛ́ dì tó ǹ fu, ǹ a bo ǹ zukũna. N kurana n mɛ̀gu kei mana de ò n mɛ̀gu sĩnda pínki zu tɛ́nla.

³⁰ Tó n ɔpla dì tó ǹ fu, ǹ zɔ̃ ǹ zukũna. N kurana n mɛ̀gu kei mana de n mɛ̀gu sĩnda pínki tana tɛ́nla.

Yìgidɛnaa
( Mat 19:9 ; Maa 10:11-12 ; Luk 16:18 )

³¹ Ò pì dɔ, tó gbɛ̃ tɛn gí a nanɔi, à yìgidɛtakada kpáa.

³² Makũ sɔ̃, matɛn oárɛ, gbɛ̃ kũ à gì a nanɔi, tó adi kɛ à gɔ̃pose kɛ̀nlo, a zã pì mɛ́ àdi tó à gɔ̃ zinakɛri ũ. Gbɛ̃ kũ à nɔ kũ ò gìii sɛ̀ sɔ̃, à zina kɛ̀n gwe.

Ladanaa

³³ A mà ò pì yãdenɔnɛ dɔ, ò yã kũ ò sì kũ Dikirio papa, òsun fuaro.

³⁴ Makũ sɔ̃, matɛn oárɛ, àsun la da sero. Àsun la da kũ ludambɛoro, zaakũ Luda kíblegbaamɛ,

³⁵ ke andunia, zaakũ Luda tìntimmmɛ, ke Yurusalɛmu, zaakũ Kína zɔ̃kɔ̃ wɛ̃tɛmɛ.

³⁶ Ǹsun la da kũ n mìioro, zaakũ ĩni fɔ̃ ǹ n mìkã mɛ̀n do pura kũ ke ǹ a sira kũro.

³⁷ Àgɔ̃ pi ee ke oi. Yã kũ à de abirekũla bò yã vãni gũmmɛ.

Fĩnabonaa
( Luk 6:29-30 )

³⁸ A mà ò pì, ò wɛ́ fĩna bo kũ wɛ́o, saka kũ sakaao.

³⁹ Makũ sɔ̃, matɛn oárɛ, àsun fĩna bo gbɛ̃ kũ à vãni kɛ̀árɛaro. Tó gbɛ̃ n sãn kɛ̀ n ɔpla gasuua, ǹ a do dɔnɛ dɔ.

⁴⁰ Tó gbɛ̃ ye à n uta lokomma yãkpatɛ kɛ kũnwo, ǹ n uta zɔ̃kɔ̃ɔ tónɛ dɔ.

⁴¹ Tó gbɛ̃ gã nàmma ǹ aso sɛ́arɛ kiloo do, ǹ gɛ́onɛ kiloo pla.

⁴² Tó gbɛ̃ pɔ́ wɛ́ kɛ̀mma, ǹ kpáa. Ǹsun gbɛ̃ kũ à ye à pɔ sãkãmma tɛ̃ro.

Yena ibɛrɛɛi
( Luk 6:27-28 , 32-36 )

⁴³ A mà ò pì, àgɔ̃ ye á gbɛ̃dakei, à zã á ibɛrɛgu.

⁴⁴ Makũ sɔ̃, matɛn oárɛ, àgɔ̃ ye á ibɛrɛnɔi, à adua kɛ gbɛ̃ kũ òdi wɛ́ tãáwanɔnɛ,

⁴⁵ de à gɔ̃ á De kũ à kú musu nɛ́nɔ ũ yãpura. Zaakũ àdi ifãntɛ̃ bo gbɛ̃ vãninɔnɛ kũ gbɛ̃ mananɔ ń pínki, àdi legũ ma taarisaridenɔnɛ kũ taaridenɔ ń pínki.

⁴⁶ Tó gbɛ̃ kũ ò yeáinɔn á yeńyĩ, áni láada ke le Luda kĩnaa yá? Bee bɛ'ɔgɔsirinɔ dì kɛ lɛroo?

⁴⁷ Tó á gbɛ̃nɔn adì fɔ kpákpaḿma ńtɛ̃nɛ, bɔ́ á deo gbɛ̃ pãndenɔlaa? Bee kifirinɔ dì kɛ lɛroo?

⁴⁸ Abire yãi àgɔ̃ kun papana, lán á De kũ à kú musu kun papana nà.

« Předchozí

další »

Následuj nás:

Sponzorované odkazy

Reklamy