Online Bible

MATIU 4 - Bisã Bible 2005

Yesu yɔ̃ogwanaa
( Maa 1:12-13 ; Luk 4:1-13 )

¹ Akũ Luda Nini gɛ̀ɛ kũ Yesuo gbárannan de Ibilisi a yɔ̃ à gwa.

² Yesu lɛ́ yĩ̀ fãnantɛ̃ kũ gwãanio ari gɔrɔ bupla. Kũ nà tɛni a dɛ,

³ akũ gbɛ̃kɛkɛrii pìi nài à pì: Tó Luda Nɛ́mɛ n ũ, ǹ pi gbɛ̀ dínɔ li burodi ũ.

⁴ Yesu wèa à pì: À kú Luda yãn ò pì: Pɔ́blen bisãsiri nigɔ̃ kúo adoro, sé yã kũ Luda tɛn o pínki.

⁵ Akũ Ibilisi a sɛ̀ à gɛ̀ɛo Luda wɛ̃tɛn, à a zɛ̀ Luda kpɛ́ mìsɔ̃ntɛa

⁶ à pì: Tó Luda Nɛ́mɛ n ũ, ǹ ɔ gbarɛ n zĩdai la, zaakũ à kɛ̃na Luda yãn ò pì: Ani n yã o a malaikanɔnɛ. Oni n sɛ́ ń ɔĩ de ǹsun gɛ̃̀ sí gbɛ̀ɛaro yãi.

⁷ Yesu wèa à pì: Ò kɛ̃̀ dɔ ò pì, ǹsun Dikiri n Luda lɛ́ ǹ gwaro.

⁸ Akũ Ibilisi a sɛ̀ à gɛ̀ɛo dɔ kpi lei manamana musu, à andunia kpatanɔ mɔ̀nɛ pínki kũ ń aruzɛkɛnɔ

⁹ à pì: Mani n gba adinɔ pínki, tó n kutɛ n donyĩ kɛmɛnɛ.

¹⁰ Akũ Yesu pìnɛ: Ǹ gomala Setan! Zaakũ ò kɛ̃̀ Luda yãn ò pì: Ǹ donyĩ kɛ Dikiri n Ludanɛ ǹgɔ̃ doi ado.

¹¹ Akũ Ibilisi a tò gwe sà, akũ malaikanɔ sù ò kpài.

Yesu nana a zĩa zaa Galili
( Maa 1:14-15 ; Luk 4:14-15 )

¹² Kũ Yesu mà ò Yahaya kũ̀ ò dà kpɛ́siran, akũ à tà Galili.

¹³ Adi vutɛ Nazɛra doro, à gɛ̀ɛ à vùtɛ sɛ̀bɛɛ sarɛ Kapɛnamu, Zɛbuluni burinɔ kũ Nafatali burinɔ bùsun,

¹⁴ de yã kũ annabi Isaya ò kɛ yãi à pì:

¹⁵ Zɛbuluni burinɔ kũ Nafatali burinɔ bùsu, zaa ísira kpa ari Yoda bara, Galili bùsu kũ buri pãndenɔ kun pìi,

¹⁶ ń gbɛ̃ kũ ò kú gusira gũnnɔ gupura zɔ̃kɔ̃ɔ è, gu dɔ̀ bùsu kũ à kú ga lɛ́i pì denɔnɛ sà.

¹⁷ Zaa gɔrɔ kũ̀a Yesu nà waazikɛnaaa à pì: À nɛ̀sɛ litɛ, kpata kũ à bò Luda kĩnaa kà kãni.

Yesu ìba káakunɔ sisinaa
( Maa 1:16-20 ; Luk 5:1-11 )

¹⁸ Kũ Yesu tɛn do Galili sɛ̀bɛɛi, à gbɛ̃nɔn planɔ è, vĩ̀ni kũ dakũnao, Simɔ kũ òdi pi Pita kũ a dakũna Anduruo. Òtɛn táaru kpá sɛ̀bɛɛ pìn, zaakũ sɔrɔkɔnɔmɛ.

¹⁹ Akũ Yesu pìńnɛ: À mɔ́ à tɛ́mai, mani á kɛ gbɛ̃wɛtɛrinɔ ũ.

²⁰ Zaa gwe gɔ̃̀nɔ ò ń táarunɔ tòn, ò bò ò tɛ̀i.

²¹ Kũ à gɛ̀ɛ arɛ, à gbɛ̃nɔn pla pãndenɔ è, vĩ̀ni kũ dakũnao dɔ, Zebedi nɛ́ Yamisi kũ a dakũna Yuhanao. Ò kú gó'itɛ gũn kũ ń de Zebedio, òtɛni ń táarunɔ kɛkɛ. Yesu ń sísi,

²² akũ ò ń de tò gó gũn gwe gɔ̃̀nɔ, ò bò ò tɛ̀i.

Yesu yãdannɛnaa
( Luk 6:17-19 )

²³ Yesu dìgɔ̃ kure Galili bùsun, àdi yã dańnɛ ń aduakɛkpɛnɔ gũn, àdi kpata kũ à bò Luda kĩnaa baaru kpá, àdi gbɛ̃nɔ kɛ̃kɔ̃a kũ gyã buri sĩnda pínkio.

²⁴ A tɔ́ dà Siria bùsula pínki, akũ òdigɔ̃ sunɛ kũ gbɛ̃ kũ òtɛn gyã buri sĩnda pínki kũ wãwão kɛnɔ kũ tãnadenɔ kũ lɛ́tɛlɛtɛgyãdenɔ kũ ɛrɛnɔ, akũ àdi ń werekɔ̃a.

²⁵ Ò bò Galili kũ Wɛ̃tɛmɛnkuri bùsuuo kũ Yurusalɛmuo kũ Yudeao kũ Yoda barao dasidasi ò tɛ̀i.

« Předchozí

další »

Následuj nás:

Sponzorované odkazy

Reklamy