MATIU 3 - Bisã Bible 2005

Yahaya Da'itɛkɛri waazikɛnaa

¹ Abire gbɛra Yahaya Da'itɛkɛrii sù Yudea gbárannan, àtɛn waazi kɛ

² à pì: À nɛ̀sɛ litɛ, kpata kũ à bò Luda kĩnaa kà kãni.

³ A yãn annabi Isaya ò yã à pì: À baarukparii kòto ma dɔ gbárannan, àtɛn pi à zɛ́ kɛkɛ Dikirinɛ, à zɛ́ térerenɔ poronɛ súsu.

⁴ Yahaya dìgɔ̃ pɔ́kasa kũ ò tã̀ kũ lakumi kãonɔ dana, àdi bára asa dɔ a pi. Kwa kũ zɔ́'iomɛ a pɔ́ble ũ.

⁵ Òdigɔ̃ bɔtɛ Yurusalɛmu kũ Yudea bùsu gu sĩnda pínkio kũ Yoda dɔ̀rɔɔiio ògɔ̃ su a kĩnaa.

⁶ Òdi ń durunnanɔ o gupuraa, akũ àdi ń da'itɛ kɛ Yodan.

⁷ Kũ Yahaya è Farisinɔ kũ Sadusinɔ tɛn su a kĩnaa dasi ò da'itɛ kɛ, akũ à pìńnɛ: Bisãsiri pitikonɔ! Dí mɛ́ à lɛ́ dàáwa à bàa sí pɔfɛ̃ kũ Luda ni kipaḿmanɛɛ?

⁸ À nɛ̀sɛlitɛna yã kɛ, onigɔ̃ dɔ̃ kũ a litɛ.

⁹ Kũ Ibrahĩ de á dizi ũ, àsungɔ̃ da kũ abirekũ mɛ́ ani á boro. Matɛn oárɛ, Luda ni fɔ̃ à gbɛ̀ dínɔ kɛ Ibrahĩ burinɔ ũ.

¹⁰ Kpása ditɛna línɔi kɔ̀. Luda ni lí kũ àdi nɛ́ mana iro zɔ̃ à zu tɛ́ gũn.

¹¹ Matɛni á da'itɛ kɛ á nɛ̀sɛlitɛna sèeda ũmɛ, ama gbɛ̃ke ni su ma gbɛra a gbãna demala, mádi ká mà a kyate sɛ́tɛnɛro. Àkũ mɛ́ ani á da'itɛ kɛ kũ Luda Ninio kũ tɛ́o.

¹² À gbaka kũna a ɔĩ ésegbɛ̃kia. Tó à fã̀, ani a pɔ́blewɛ ká a dɔ̃̀n, ani a sàko ká tɛ́ kũ àdi garo gũn.

Yesu da'itɛkɛnaa

¹³ Akũ Yesu bò Galili bùsun, à sù Yahaya kĩnaa Yodai de à a da'itɛ kɛ.

¹⁴ Yahaya ye à gí à pì: Makũ kũ má de ǹ ma da'itɛ kɛn n su ma kĩnaa yá?

¹⁵ Akũ Yesu wèa à pì: Àgɔ̃ de lɛ gĩa, zaakũ à kɔ̃ sì kũoo lɛ yã sĩnda pínki kɛna a zɛ́a yãi. Akũ à wè.

¹⁶ Kũ Yesu da'itɛ kɛ̀, à bikũ̀ gɔ̃̀nɔ. Zĩ birea ludambɛ wɛ̃̀kɔ̃a, akũ à è Luda Nini tɛn su lán potɛ̃nɛ bà à dìawa.

¹⁷ Akũ ò kòtoo mà bona ludambɛ à pì: Ma nɛ́ mɛ̀n do légelege yenyĩden dí, kũ ma pɔ nnaa manamana.