MATIU 28 - Bisã Bible 2005

Yesu vunaa

¹ Kámmabogɔrɔ gbɛra azumanɛnna zĩ kɔnkɔkɔnkɔ Mariama Magadalɛni kũ Mariama pãnde pìio bò ò gɛ̀ɛ mira gwa.

² Akũ zĩtɛ yĩ̀gãyĩgã gbãnagbãna, zaakũ Dikiri malaika ke bò musu, à sù à gbɛ̀ɛ pì gbigiri kɛ̀ à gò mira lɛ́a, akũ à vùtɛa.

³ A ãn de lán legũpinaa bà, a uta de pú táitai lán buu bà.

⁴ Vĩna gudãkpãrinɔ kũ̀, òtɛn lukaluka, akũ ò gɔ̃̀ sã̀ii.

⁵ Akũ malaika pìi pì nɔgbɛ̃ pìnɔnɛ: Àsun tó vĩna á kũro. Má dɔ̃ kũ Yesu kũ ò pà líaan átɛn wɛtɛ.

⁶ À kú laro, à fùtɛ lákũ à ò nà. À mɔ́ à gu kũ ò a wùtɛn gwa,

⁷ á gɛ́ à o a ìbanɔnɛ likalika à fùtɛ bona gan. Ani dońnɛ arɛ gɛna Galili. Gwen áni a en. Ma òárɛn gwe.

⁸ Akũ ò bò miran likalika kũ vĩnao, ama ń pɔ nna zɔ̃kɔ̃. Ò bàa lɛ̀ òtɛn gɛ́ a baaru kpá a ìbanɔnɛ.

⁹ Akũ Yesu dàńlɛ gɔ̃̀nɔ, à fɔ kpàḿma. Kũ ò nài, ò donyĩ kɛ̀nɛ, akũ ò ɔ nà a gɛ̀sɛkpɛa.

¹⁰ Akũ Yesu pìńnɛ: Àsun tó vĩna á kũro. À gɛ́ à o ma gbɛ̃nɔnɛ ò gɛ́ Galili. Gwen oni ma en.

Soza gudãkpãrinɔ yãgbãnnɛnaa

¹¹ Kũ nɔgbɛ̃nɔ tà, akũ soza gudãkpãri kenɔ gɛ̃̀ wɛ̃tɛ gũn, ò yã kũ ò kɛ̀nɔ ò sa'orikinɔnɛ pínki.

¹² Akũ sa'oriki pìnɔ gbɛ̃ zɔ̃kɔ̃nɔ sìsi, ò yã gɔ̃̀gɔ̃, akũ ò ɔgɔ zɔ̃kɔ̃ɔ kpà sozaa pìnɔa gusarɛ

¹³ ò pì: À pi a ìbanɔ mɛ́ ò sù gwãani, ò a gɛ̀ɛ sɛ̀ kpãni gɔrɔ kũ átɛn i o.

¹⁴ Tó bùsu gbɛ̃ zɔ̃kɔ̃ yã pìi mà, óni kútɛ kɛ́nɛ, áni bo yãketen.

¹⁵ Sozanɔ ɔgɔ pìi sì, akũ ò kɛ̀ lákũ ò dàńnɛ nà. Akũ yã pìi gɔ̃̀ Yudanɔnɛ baaru ũ ari kũ a gbãrao.

Yesu zĩ nana a ìbanɔnɛ ń ɔĩ

¹⁶ Yesu ìba gbɛ̃nɔn kuri awɛɛdonɔ gɛ̀ɛ Galili kpi kũ à a ki gɔ̃̀gɔ̃ńnɛ yã musu.

¹⁷ Kũ ò a è, ò donyĩ kɛ̀nɛ, ama ń gbɛ̃kenɔ tɛn sika kɛ.

¹⁸ Akũ Yesu nàńyĩ à pìńnɛ: Luda musu kũ zĩtɛo iko pínki kpàma.

¹⁹ Abire yãi à gɛ́ à buri sĩnda pínki kɛ ma ìbanɔ ũ, à ń da'itɛ kɛ kũ De Luda tɔ́o kũ a Nɛ́ tɔ́o kũ a Nini tɔ́o,

²⁰ à yã kũ má dìtɛárɛnɔ dańnɛ ògɔ̃ kũna pínki. À ma, manigɔ̃ kú kãáo gɔrɔ sĩnda pínki ari andunia gɛ́ lákao.