MATIU 27 - Bisã Bible 2005

Yudasi ganaa

¹ Kũ gu dɔ̀ kɔnkɔkɔnkɔ sa'orikinɔ kũ Yuda gbɛ̃ zɔ̃kɔ̃nɔ ń pínki yã gɔ̃̀gɔ̃ Yesui de ò a dɛ.

² Ò a yĩ̀, akũ ò gɛ̀ɛ ò a nà bùsu gbɛ̃ zɔ̃kɔ̃ Pilatinɛ a ɔ̃i.

³ Kũ Yudasi kũ à bò a kpɛ è yã dàala, à gɔ̃̀ díndɔ̃mɛnɛ gũn, akũ à gɛ̀ɛ andurufu ɔgɔ mɛ̀n baraakurii pì ɛra sa'orikinɔnɛ kũ gbɛ̃ zɔ̃kɔ̃nɔ

⁴ à pìńnɛ: Ma durunna kɛ̀, ma taarisaride kpà gai. Akũ ò pìnɛ: Ó bàka ũgbaa? N yãn gwe.

⁵ Akũ Yudasi ɔgɔ pìi zù Luda kpɛ́n, akũ à tà à gɛ̀ɛ à a zĩda lòko.

⁶ Akũ sa'orikinɔ ɔgɔ pìi sɛ̀tɛ ò pì: Ɔgɔ pì kana Luda kpɛ́ ɔgɔdaki gũn zɛ́ vĩro, zaakũ gbɛ̃dɛ'ɔgɔmɛ.

⁷ Kũ ò yã gɔ̃̀gɔ̃, akũ ò orobori gbĩ̀dãki lù kũ ɔgɔ pìio nibɔnɔ vĩki ũ.

⁸ Abire yãi ari kũ a gbãrao òdi pi zĩtɛ pìinɛ Zĩtɛ Arude.

⁹ Akũ yã kũ annabi Ilimia òo kɛ̀ à pì: Ò andurufu ɔgɔ mɛ̀n baraakurii pìi sɛ̀tɛ, ɔgɔ kũ Isarailanɔ zɛ̀o ò kpà a yã musu pìi,

¹⁰ akũ ò orobori gbĩ̀dãki lùo, lákũ Dikiri dìtɛmɛnɛ nà.

Pilati yãkpatɛkɛna kũ Yesuo

¹¹ Yesu zɛna bùsu gbɛ̃ zɔ̃kɔ̃ arɛ. Akũ gbɛ̃ zɔ̃kɔ̃ɔ pì a là à pì: Mɔkɔ̃n Yudanɔ kína ũ yá? Yesu wèa à pì: Lɛn n ò lɛ.

¹² Gɔrɔ kũ sa'orikinɔ kũ gbɛ̃ zɔ̃kɔ̃nɔ tɛn yã didia, adi yãke weḿmaro.

¹³ Akũ Pilati pìnɛ: Ńdi yã dasi kũ òtɛn didimma maroo?

¹⁴ Ama Yesu dí yãke o yã pìnɔ doke musuro, akũ yã pìi bò bùsu gbɛ̃ zɔ̃kɔ̃ɔ pìi sarɛ manamana.

Yãdana Yesula

¹⁵ Vĩnla dikpɛ zĩ pínki bùsu gbɛ̃ zɔ̃kɔ̃ɔ pìi dì purusunanɔ do kũ gbɛ̃nɔn yei gbarɛńnɛ.

¹⁶ Gɔrɔ kũ̀a sɔ̃ purusuna tɔ́de kú gwe òdi pi Baraba.

¹⁷ Kũ pari kàkara, akũ Pilati ń lá à pì: Dín á ye mà gbarɛárɛɛ? Baraban yá, ke Yesu kũ òdi pi Arumasihu?

¹⁸ Zaakũ à dɔ̃ kũ nɛ̀sɛgɔ̃ba vĩna kũ Yesuo yãin ò a kpàawa.

¹⁹ Gɔrɔ kũ Pilati vutɛna a gbĩ̀gbaaa, a nanɔ gbɛ̃ zĩ̀a à pì: Ǹsun yãke kɛ gbɛ̃ mana pìinɛro, zaakũ nana kũ ma ò a yã musu gĩa gwãani wari dɔ̀ma manamana.

²⁰ Sa'orikinɔ kũ gbɛ̃ zɔ̃kɔ̃nɔ nàkara gbɛ̃nɔa ò Baraba gbɛka, ò pi ò Yesu dɛ.

²¹ Akũ bùsu gbɛ̃ zɔ̃kɔ̃ɔ pìi ń lá à pì: Gbɛ̃nɔn pla pìnɔ gũn, dín á ye mà gbarɛárɛɛ? Akũ ò pì, Barabamɛ.

²² Akũ Pilati ń lá à pì: Bɔ́n mani kɛ kũ Yesu kũ òdi pi Arumasihuoo? Gbɛ̃ sĩnda pínki pì: Ǹ a pá lía.

²³ Akũ à ń lá à pì: Bɔ́ dàan à kɛ̀ɛ? Akũ ò wiki lɛ̀ ò kàra ò pì: Ǹ a pá lía.

²⁴ Kũ Pilati è áni fɔ̃ à yãke kɛro, zuka tɛn kara, akũ à í dã̀, à a ɔ pìpi gbɛ̃nɔ wára à pì: Ma ɔ bɔ̀tɛ gbɛ̃ pì gana yãn. Á yãmɛ.

²⁵ Akũ gbɛ̃ pìnɔ pì: A dɛna yã wí ó musu kũ ó nɛ́nɔ.

²⁶ Akũ à Baraba gbàrɛńnɛ, à pì ò Yesu gbɛ̃ kũ flã̀ao ò a pá lía.

Sozanɔ Yesu fobonaa

²⁷ Akũ Pilati sozanɔ gɛ̃̀ kũ Yesuo bùsu gbɛ̃ zɔ̃kɔ̃ɔ pì bɛa, akũ ò ń gã̀ kàkara pínki ò lìkai.

²⁸ Ò a pɔ́nɔ bɔ̀tɛa ò arukĩmba tɛ̃ra dànɛ,

²⁹ akũ ò lɛ̀ fùraa tã̀ ò kùnɛ, ò leba nànɛ a ɔplan gò ũ. Akũ òtɛn kútɛkutɛnɛ, òtɛni a fobo òtɛn pi: Fɔɔ, Yudanɔ kína!

³⁰ Ò lɛ́'i sùa, ò leba pìi sɛ̀ ò a lɛ̀o a mìia.

³¹ Kũ ò a fobò ò làka, akũ ò arukĩmba pìi gòala ò a zĩda pɔ́kasanɔ dànɛ, akũ òtɛn gɛ́ a pá lía.

Yesu pana lía

³² Kũ ò bɔ̀tɛ òtɛn gɛ́, ò dàkarɛ kũ Sirɛni gbɛ̃ kũ òdi pi Simɔo, akũ ò gã nàa à Yesu lígbãndurukpana sɛ́.

³³ Akũ ò kà gu kũ òdi pi Gɔgɔta kũ à pì mìtokoki.

³⁴ Akũ ò sèwɛ̃ kũ ò yã̀katɛ kũ ɛzɛo dɔ̀nɛ à mi. Kũ à í kɛ̀, akũ à gì mii.

³⁵ Kũ ò a pà lía, akũ ò kàpaa kpà ò a pɔ́kasanɔ kpàatɛkɔ̃nɛ.

³⁶ Akũ ò vùtɛ òtɛni a dãkpã gwe.

³⁷ Ò yã kũ ò dìaa kɛ̃̀ ò nà a mìla ò pì: Yudanɔ kína Yesun dí.

³⁸ Akũ ò kpãni wɛ́dewɛnɔ pà lía a sarɛ gbɛ̃nɔn pla, gbɛ̃ do a ɔplai, gbɛ̃ do a ɔzɛi.

³⁹ Gbɛ̃ kũ òtɛn gɛ̃ zɛ́la gwenɔ tɛni ń mì kɛ dékũdekũ, òtɛni a sɔ̃sɔ̃

⁴⁰ ò pì: Mɔkɔ̃n kũ n pì ĩni Luda kpɛ́ wí ǹ ɛra ǹ bo gɔrɔ aakɔ̃ daguran gweroo? Tó mɔkɔ̃mmɛ Luda Nɛ́ ũ, ǹ n zĩda sura ba ǹ kipa lía.

⁴¹ Lɛmɛ dɔ sa'orikinɔ kũ ludayãdannɛrinɔ kũ gbɛ̃ zɔ̃kɔ̃nɔ tɛni a fobo lɛ ò pì:

⁴² À gbɛ̃ pãndenɔ sura bà, ama ani fɔ̃ à a zĩda sura baro. Isarailanɔ kínanloo? À kipa lía tera, óni a náani kɛ.

⁴³ À Luda náani vĩ. Tó Luda yei, à a bo sà, zaakũ à pì akãamɛ Luda Nɛ́ ũ.

⁴⁴ Bee kpãni kũ ò ń pá lía lɛɛlɛnɔ tɛni a sɔ̃sɔ̃ lɛ dɔ.

Yesu ganaa

⁴⁵ Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mɔ̀ aakɔ̃.

⁴⁶ Fãnantɛ̃ mɔ̀ aakɔ̃n Yesu wiki lɛ̀ gbãnagbãna à pì: Ɛloi, Ɛloi, lɛma sabatani! Abirekũ pì, ma Luda, ma Luda, à kɛ̀ dera n ma tonn?

⁴⁷ Kũ gbɛ̃ kũ ò zɛna gwe kenɔ yã pìi mà, akũ ò pì: Dake tɛn Iliasu sísi.

⁴⁸ Zaa gwe gɔ̃̀nɔ ń gbɛ̃ do bàa lɛ̀ à gɛ̀ɛ à sako sɛ̀ à dà sèwɛ̃ kpã̀kpãa gũn, à fĩ̀fĩ lebaa, akũ à dɔ̀ Yesunɛ à mi.

⁴⁹ Akũ gbɛ̃ kparanɔ pì: À zɛ gĩa ò gwa tó Iliasu ni su à a sura ba.

⁵⁰ Yesu ɛ̀ra à wiki gbãna lɛ̀ dɔ, akũ à a wɛ̃̀ndii gbàrɛ.

⁵¹ Akũ Luda kpɛ́ lábure kɛ̃̀kɔ̃a pla bona musu suna zĩtɛ. Zĩtɛ yĩ̀gãyĩgã, gbɛ̀nɔ pàrapara,

⁵² miranɔ wɛ̃̀wɛ̃, akũ Luda gbɛ̃nɔ fùtɛ bona gan dasi.

⁵³ Yesu vuna gan gbɛra ò bɔ̀tɛ miran, ò gɛ̃̀ Luda wɛ̃tɛn, gbɛ̃nɔ ń é dasi.

⁵⁴ Kũ sozanɔ gbɛ̃ zɔ̃kɔ̃ kũ a gbɛ̃ kũ òtɛn Yesu dãkpãnɔ zĩtɛ yĩgãyĩgãnaa pìi è kũ yã kũ ò kɛ̀nɔ pínki, vĩna ń kũ manamana ò pì: Yãpuramɛ Luda Nɛ́n gbɛ̃ dí ũ.

⁵⁵ Nɔgbɛ̃nɔn kú gwe dasi, òtɛn gu gwa zã̀ dire. Ò tɛ́ Yesui bona Galilimɛ, òdigɔ̃ pɔ́ble kɛnɛ.

⁵⁶ Ń tɛ́n Mariama Magadalɛni kun kũ Mariamao Yamisi kũ Yusufuo da kũ Zebedi nɛ́nɔ dao.

Yesu vĩnaa

⁵⁷ Kũ ɔkɔsi kɛ̀, Arimatea gbɛ̃ ɔgɔde kũ òdi pinɛ Yusufu sù. Yesu ìbaamɛ dɔ.

⁵⁸ À gɛ̀ɛ à Yesu gɛ̀ɛ gbɛ̀ka Pilatia, akũ Pilati pì ò kpáa.

⁵⁹ Kũ Yusufu gɛ̀ɛ pìi sɛ̀, a táaru biza dufu fĩ̀fĩa,

⁶⁰ à a dà a zĩda gbɛ̀wɛɛ kũ ò sɔ̀ mira ũ gũn. Akũ à gbɛ̀ gbɛ̃̀ntɛ̃ɛ gbigiri kɛ̀ à tà wɛ̀ɛ pìlɛ à tà.

⁶¹ Mariama Magadalɛni kũ Mariama pãnde pìio vutɛna gwe, ò arɛdɔna miraa.

⁶² Kũ gɔrɔ lìtɛ, kámmabogɔrɔ zĩ kà, akũ sa'orikinɔ kũ Farisinɔ gɛ̀ɛ Pilati kĩnaa lɛɛlɛ

⁶³ ò pì: Yã kũ gbɛ̃kɛkɛrii pìi ò a bɛ̃nɛ zĩ dɔógu à pì, gɔrɔ aakɔ̃ gbɛra áni vu.

⁶⁴ Ǹ tó ògɔ̃ mira pì dãkpã ari a gɔrɔ aakɔ̃de zĩ. Tó lɛnlo, a ìbanɔ ni su ò a gɛ̀ sɛ́ kpãni, oni o gbɛ̃nɔnɛ à fùtɛ bona gan. Ɛ́kɛ kpɛ bire nigɔ̃ de a káakupɔla.

⁶⁵ Akũ Pilati pìńnɛ: À sozanɔ sí à gɛ́ à mira pì dãkpã lákũ áni fɔ̃ nà.

⁶⁶ Akũ ò gɛ̀ɛ ò sèedaa kɛ̀ miragbɛɛa, ò sozanɔ tò gwe ògɔ̃ dãkpã.