Online Bible

MATIU 26 - Bisã Bible 2005

Lɛ́kpakũsũna Yesuii
( Maa 14:1-2 ; Luk 22:1-2 ; Yuh 11:45-53 )

¹ Kũ Yesu yã birenɔ ò pínki à làka, akũ à pì a ìbanɔnɛ:

² Á dɔ̃ kũ Vĩnla dikpɛ gɔ̃̀ gɔrɔ pla, oni Bisãsiri Nɛ́ kpáḿma ò a pá lía.

³ Abire gbɛra sa'orikinɔ kũ Yuda gbɛ̃ zɔ̃kɔ̃nɔ kɔ̃ kàkara sa'oriki zɔ̃kɔ̃ kũ òdi pi Kayafa bɛa.

⁴ Ò yã gɔ̃̀gɔ̃ ɔ̃ndɔ̃o lákũ oni Yesu kũ ò a dɛ nà

⁵ ò pì: Òsun kɛ dikpɛ zĩro, de gbɛ̃nɔ sún zuka káro yãi.

Nísi gbĩ nna kuna Yesu mìia
( Maa 14:3-9 ; Yuh 12:1-8 )

^6-7 Kũ Yesu kú Bɛtani, Simɔ Kusu bɛa, àtɛn pɔ́ ble gɛngɛsɛkɛna, akũ nɔgbɛ̃ ke nài, à lo fítinna kũ nísi gbĩ nna ɔgɔde kú a gũn kũna, akũ à kù Yesu mìia.

⁸ Kũ a ìbanɔ è lɛ, akũ ń pɔ fùtɛ ò pì: Bɔ́n pɔ́ lalasekɛna dí ũu?

⁹ De ò nísi pì yìa yã kũ ɔgɔ zɔ̃kɔ̃ɔo ò kpà takasidenɔa.

¹⁰ Yesu dɔ̃̀ḿma, akũ à pìńnɛ: Bɔ́yãi átɛn wari dɔ nɔgbɛ̃ pìiaa? À zĩ mana kɛ̀mɛnɛmɛ.

¹¹ Takasidenɔn kú kãáo gɔrɔ sĩnda pínki, makũ sɔ̃ manigɔ̃ kú kãáo gɔrɔ sĩnda pínkiro.

¹² Kũ à nísi pìi kù ma mɛ̀ɛa, à kɛ̀ lɛ de à ma gɛ̀ kɛomɛ.

¹³ Yãpuran matɛn oárɛ, gu kũ òtɛni ma baaru nna waazi kɛn andunia gũn pínki, onigɔ̃ yã kũ nɔgbɛ̃ pìi kɛ̀ o a dɔngu yãi.

Yudasi bona Yesu kpɛ
( Maa 14:10-11 ; Luk 22:3-6 )

¹⁴ Abire gbɛra gbɛ̃nɔn kuri awɛɛplanɔ do kũ òdi pinɛ Yudasi Isikariɔti gɛ̀ɛ sa'orikinɔ kĩnaa

¹⁵ à pì: Tó ma Yesu kpàáwa, bɔ́n á ye à kpámaa? Akũ ò andurufu ɔgɔ mɛ̀n baraakurii nàro ò kpàa.

¹⁶ Zaa gɔrɔ birean àtɛn zɛ́ wɛtɛ à Yesu kpáḿma.

Vĩnla pɔ́blenaa
( Maa 14:12-21 ; Luk 22:7-14 ; Yuh 13:21-38 )

¹⁷ Burodi Futɛnasari dikpɛ gɔrɔ káaku zĩ Yesu ìbanɔ sù ò a là ò pì: Mán ń ye ò gɛ́ kɛkɛnnɛ ǹ Vĩnla pɔ́ blenn?

¹⁸ À wèḿma à pì: À gɛ́ wɛ̃tɛn gɔ̃gbɛ̃ ke kĩnaa à pinɛ, Dannɛri pì a gɔrɔ kà kãni. A bɛan áni Vĩnla pɔ́ blen kũ a ìbanɔ.

¹⁹ Yesu ìbanɔ kɛ̀ lákũ à dàńnɛ nà, ò Vĩnla pɔ́bleyã kɛ̀kɛ.

²⁰ Kũ ɔkɔsi kɛ̀, Yesu gɛngɛsɛkɛna teburuui kũ a gbɛ̃nɔn kuri awɛɛpla pìnɔ.

²¹ Gɔrɔ kũ òtɛn pɔ́ ble à pì: Yãpuran matɛn oárɛ, á gbɛ̃ mɛ̀n do ni ma kpáḿma.

²² Ń nɛ̀sɛɛ yàka manamana, akũ òtɛni a la dodo: Asa makũmɛroo, Dikiri?

²³ Yesu wèḿma à pì: Gbɛ̃ kũ ótɛn ɔ kakara ta gũn lɛɛlɛ mɛ́ ani ma kpáḿma.

²⁴ Bisãsiri Nɛ́ ni kpágui lákũ à kɛ̃na a yã musu nà, ama waiyoo gbɛ̃ kũ ani Bisãsiri Nɛ́ kpáḿma pìi. Ani kɛ sã̀na adenɛ tó odi a i yãro.

²⁵ Akũ Yudasi kũ ani a kpáḿma pì pì: Asa makũmɛroo, Rabi? Yesu pìnɛ: Mɔkɔ̃mmɛ n ò gwe.

Dikiri pɔ́ble
( Maa 14:22-26 ; Luk 22:14-20 ; 1Kɔ 11:23-25 )

²⁶ Kũ òtɛn pɔ́ ble, Yesu burodii sɛ̀, à arubarikaa dàn, akũ à lìkɔ̃rɛ à kpà a ìbanɔa à pì: À sí à só, ma mɛ̀ɛn dí.

²⁷ Akũ à toko sɛ̀ dɔ à arubarikaa dàn, à kpàḿma à pì: À mi á pínki.

²⁸ Ma arun dí, Luda bàka kunna kũ gbɛ̃ dasinɔ aru ũ, kũ ani bɔtɛma ń durunnanɔ kɛ̃mmana yãi.

²⁹ Matɛn oárɛ, zaa gbãra mani geepi'i dí mi doro ari kpata kũ à bò ma De kĩnaa gɛ́ boo gupuraa, gbasa mà a dufu mi kãáo sà.

³⁰ Kũ ò lɛ̀ɛ sì, akũ ò bɔ̀tɛ ò gɛ̀ɛ Kùkpɛ sĩ̀sĩgɛrɛɛi.

Yesu gĩnakɛ à dɔ̃ yã kũ Pita ni kɛ
( Maa 14:27-31 ; Luk 22:31-34 ; Yuh 13:36-38 )

³¹ Akũ Yesu pìńnɛ: Á pínki áni fuma gwãaniala, zaakũ ò kɛ̃̀ Luda yãn ò pì: Mani sãdãri lɛ́, sãnɔ ni fãkɔ̃a.

³² Ama ma vunaa gbɛra mani doárɛ arɛ gɛna Galili.

³³ Akũ Pita pìnɛ: Bee tó ò fùmma ń pínki, mani fumma zikiro.

³⁴ Akũ Yesu pìnɛ: Yãpuran matɛn onnɛ, gwãaniala ari ko gɔ̃ gɛ́ lɛ́ zu, ĩni ledi kpámai gɛ̃̀n aakɔ̃.

³⁵ Pita pìnɛ: Bee tó mani sù mà ga kũnwo, mani ledi kpányĩ zikiro. Akũ a ìbanɔ ò lɛ se ń pínki.

Yesu aduakɛna zaa Gɛtɛsɛmani
( Maa 14:32-42 ; Luk 22:39-46 )

³⁶ Akũ Yesu kũ a ìbanɔ kà gu kũ òdi pi Gɛtɛsɛmani, akũ à pìńnɛ: À vutɛ la ari mà gɛ́ adua kɛ zã̀ dire.

³⁷ À Pita kũ Zebedi nɛ́ gbɛ̃nɔn planɔ sɛ̀ à gɛ̀ɛ kũńwo. A pɔ sira kũ̀ à nɛ̀sɛyɔkɔ sì.

³⁸ Akũ à pìńnɛ: Ma pɔ sira kũ̀ manamana ari ga lɛ́i. À zɛ la à itɛ̃ kɛ kũmao.

³⁹ Kũ à gɛ̀ɛ arɛ fíti, akũ à kùtɛ zĩtɛ à adua kɛ̀ à pì: Baa, tó ani sí kɛ, ǹ tó toko'i díkĩna gɛ̃tɛmala. Ama adi kɛ lákũ má yei nàro, séde lákũ ń yei nà.

⁴⁰ Akũ a ɛ̀ra à sù à a ìbanɔ lè, òtɛn i o. Akũ à pì Pitanɛ: Lɛn yá? Ádi fɔ̃ a itɛ̃ kɛ̀ kũmao bee awa doroo?

⁴¹ À itɛ̃ kɛ àgɔ̃ adua kɛ de àsun fu yɔ̃ogwanaaaro yãi. Nini yei, ama mɛ̀ɛ busɛ.

⁴² À kɛ̃̀ḿma a gɛ̃̀n plade, à adua kɛ̀ à pì: Baa, tó toko díkĩna ni gɛ̃tɛmala a í minaa sariro, ǹ tó n pɔyenyĩna kɛ.

⁴³ Kũ à ɛ̀ra à sù à ń lé, òtɛn i o dɔ, zaakũ òtɛn idekũ dɛdɛ.

⁴⁴ Akũ à ń tón dɔ, à gɛ̀ɛ à wɛ́ kɛ̀ a gɛ̃̀n aakɔ̃de, à yã dokɔ̃nɔ pìi ò dɔ.

⁴⁵ Akũ à ɛ̀ra à sù a ìbanɔ kĩnaa à pìńnɛ: Átɛn i o, átɛn kámma bo ari teran yá? À gwa! Gɔrɔ kà kãni. Ò Bisãsiri Nɛ́ kpà durunnakɛrinɔa.

⁴⁶ À futɛ ò tá. Gbɛ̃ kũ à ma nańnɛ ń ɔĩ tɛn su.

Yesu kũnaa
( Maa 14:43-50 ; Luk 22:47-53 ; Yuh 18:3-12 )

⁴⁷ Kũ à kpɛ́ àtɛn yã pì o, akũ Yudasi, a ìba gbɛ̃nɔn kuri awɛɛplanɔ doke sù kũ pario, ò fɛ̃nɛdanɔ kũna kũ gònɔ, ò bò sa'orikinɔ kũ Yuda gbɛ̃ zɔ̃kɔ̃nɔ kĩnaa.

⁴⁸ Bonkpɛde pì sɔ̃, à sèedaa òńnɛ à pì: Gbɛ̃ kũ mani lɛ́ pɛ́a, àkũmɛ gwe. À a kũ.

⁴⁹ Akũ à mìi dɔ̀ Yesua gɔ̃̀nɔ à pì: Fɔɔ, Rabi! Akũ à lɛ́ pɛ̀a.

⁵⁰ Yesu pìnɛ: Ma gbɛ̃, ǹ n kɛna kɛ! Akũ ò sù ò ɔ pɛ̀tɛ Yesua ò a kũ̀.

⁵¹ Akũ Yesu gbɛ̃nɔ do a fɛ̃nɛda wòto, à sa'oriki zɔ̃kɔ̃ zĩ̀rii lɛ̀o à a sã gò.

⁵² Akũ Yesu pìnɛ: Ǹ n fɛ̃nɛda sɔtɔ a plɛn. Zaakũ gbɛ̃ kũ à zɛ̀ kũ fɛ̃nɛdao, fɛ̃nɛda mɛ́ ani a dɛ.

⁵³ Tó má ye ma De malaika zĩ̀karinɔ gbarɛmɛnɛ gɔ̃̀nɔ de gã̀ kuri awɛɛplanɔla, ń dɔ̃ mani fua mà a wɛ́ kɛan yá?

⁵⁴ Tó ma kɛ̀ lɛ sɔ̃, deran yã kũ ò kɛ̃̀ Luda yãn ò pì ani kɛ lɛ ni kɛɛ?

⁵⁵ Akũ Yesu pì parinɛ: Kpãni wɛ́dewɛn ma ũ kũ a su à ma kũ kũ fɛ̃nɛdanɔ kũ gònɔo yá? Madìgɔ̃ vutɛ Luda ɔnn lákũ gu dìgɔ̃ dɔ nà madìgɔ̃ yã daárɛ, ádi ma kũro.

⁵⁶ Ama yã pìi kɛ̀ pínki, de yã kũ annabinɔ kɛ̃̀ Luda yãn kɛ yãi. Akũ a ìbanɔ bàa lɛ̀ ń pínki ò a tòn.

Yuda gbãnadenɔ yãkpatɛkɛna kũ Yesuo
( Maa 14:53-65 ; Luk 22:54-55 , 63-71 ; Yuh 18:13-14 , 19-24 )

⁵⁷ Gbɛ̃ kũ ò Yesu kũ̀nɔ gɛ̀ɛ kãao sa'oriki zɔ̃kɔ̃ Kayafa bɛa. Ludayãdannɛrinɔ kũ gbɛ̃ zɔ̃kɔ̃nɔ kakarana gwe.

⁵⁸ Pita tɛ́ a kpɛ zã̀ dire ari sa'oriki zɔ̃kɔ̃ɔ pìi bɛa. À gɛ̃̀ ɔnn, à vùtɛ kũ dogarinɔ de à yã pìi mìdɛna e.

⁵⁹ Sa'orikinɔ kũ Yuda yãkpatɛkɛrinɔ ń pínki tɛn sèeda wɛtɛ Yesua ò a dɛ.

⁶⁰ Bee kũ gbɛ̃nɔ sù ò ɛ́kɛyãnɔ dìdia dasi, adi kɛro. Kpɛkpɛ gbɛ̃nɔn pla kenɔ sù

⁶¹ ò pì: Gbɛ̃ pìi pì, áni fɔ̃ à Luda kpɛ́ wí, áni ɛra à bo gɔrɔ aakɔ̃ dagura sɛ́!

⁶² Akũ sa'oriki zɔ̃kɔ̃ɔ fùtɛ à zɛ̀ à pì Yesunɛ: Ń yãke vĩ ǹ weḿmaroo? Yã kũ òtɛn didimma dí de deraa?

⁶³ Yesu yĩtɛ kpɛ̃n, akũ sa'oriki zɔ̃kɔ̃ɔ pìi pìnɛ: Ma nannɛ Luda Wɛ̃̀ndidei, ǹ owɛrɛ tó Luda Nɛ́ Arumasihumɛ n ũ.

⁶⁴ Yesu wèa à pì: Lɛn n ò lɛ. Makũ sɔ̃, matɛn oárɛ, zaa gbãra áni Bisãsiri Nɛ́ e vutɛna Gbãnasĩndapinkide ɔplai, akũsɔ̃ áni a suna e ludambɛ lukun.

⁶⁵ Akũ sa'oriki zɔ̃kɔ̃ɔ pì a utanɔ gà à kɛ̃̀ à pì: A dɔkɛ̀ kũ Ludao! À kɛ̀ dera ótɛn sèedade pãnde kenɔ wɛtɛ dɔɔ? A mà lákũ à dɔkɛ̀ kũ Ludao nà.

⁶⁶ Yã kpaten a zɛo teraa? Akũ ò wèa ò pì: A taari kà ò a dɛ.

⁶⁷ Akũ ò lɛ́'i sù a ãnnwa, ò a lɛ̀lɛ kũ okũo. Gbɛ̃kenɔ a sãn kɛ̀kɛ

⁶⁸ ò pì: Arumasihu, ǹ annabikɛyã o ǹ gbɛ̃ kũ à n lɛ owɛrɛ.

Pita ledikpana Yesui
( Maa 14:66-72 ; Luk 22:56-62 ; Yuh 18:15-18 , 25-27 )

⁶⁹ Pita vutɛna ɔnn, akũ zɔ̀nɔkpare ke sù à pìnɛ: Mɔkɔ̃n sɔ̃ ndìgɔ̃ kú lɛɛlɛ kũ Galili gbɛ̃ Yesu pìiomɛ.

⁷⁰ Akũ à ledi kpà ń pínki wára à pì: Mádi yã kũ ntɛn o dɔ̀rɔ dɔ̃ro.

⁷¹ Akũ à fùtɛ à gɛ̃̀ gãnun. Nɔgbɛ̃ pãnde a è, akũ à pì gbɛ̃ kũ ò kú gwenɔnɛ: Gbɛ̃ díkĩna lɛɛlɛ kũ Yesu Nazɛraomɛ.

⁷² Pita ɛ̀ra à ledi kpà à la dà à pì: Má gbɛ̃ pì dɔ̃ro.

⁷³ Kũ à kɛ̀ saa fíti, gbɛ̃ kũ ò zɛna gwenɔ nà Pitai ò pì: Yãpuramɛ, ń gbɛ̃ domɛ n ũ, zaakũ ó n dɔ̃ n yã'onaaamɛ.

⁷⁴ Akũ à fùtɛ à a zĩda kà à la dà à pì: Má gbɛ̃ pì dɔ̃ro. Zaa gwe gɔ̃̀nɔn ko lɛ́ zù.

⁷⁵ Akũ yã kũ Yesu òo dɔ̀ Pitagu kũ à pì, ari ko gɔ̃ gɛ́ lɛ́ zu, ani ledi kpáai gɛ̃̀n aakɔ̃. Akũ Pita bò bàai à pɔsira ɔ́ɔ dɔ̀.

« Předchozí

další »

Následuj nás:

Sponzorované odkazy

Reklamy