MATIU 24 - Bisã Bible 2005

Yurusalɛmu yakana kũ andunia lákagɔrɔ sèedanɔ

¹ Yesu bò Luda ɔnn àtɛn tá, akũ a ìbanɔ nàai ò lɛ́zuki kɛ̀nɛ a kpɛ́nɔa.

² Akũ Yesu pìńnɛ: A abirekũ è pínki yá? Yãpuran matɛn oárɛ, oni gbɛ̀ ke tó dikɔ̃aro, oni gboro pínkimɛ.

³ Gɔrɔ kũ Yesu vutɛna Kùkpɛ sĩ̀sĩgɛrɛɛi, a ìbanɔ sù a kĩnaa gusarɛ, ò a là ò pì: Ǹ owɛrɛ, bɔrɛn yã dínɔ ni kɛɛ? Bɔ́ mɛ́ anigɔ̃ de n suna kũ andunialakagɔrɔo sèeda ũu?

⁴ Yesu wèḿma à pì: À laakari kɛ, àsun tó ò á sãtɛro.

⁵ Zaakũ oni su dasi kũ ma tɔ́o, onigɔ̃ pi Arumasihumɛ ń ũ, oni gbɛ̃nɔ sãtɛ dasi.

⁶ Áni zĩ̀nɔ baaru ma kũ a òpiio. Àsun bídi kɛro. Sé abirekũnɔ kɛ, ama gɔrɔ lakana kpɛ́.

⁷ Buri kũ burio ni futɛ kũ kɔ̃o, lɛmɛ dɔ bùsu kũ bùsuuo. Nà kũ zĩtɛ yĩgãyĩgãnaao nigɔ̃ kú gukenɔn.

⁸ Yã birenɔ pínki nɔ̀wãwã naana ũ.

⁹ Abire gbɛra oni á kũkũ ò á kpáḿma, ò wɛ́ tãáwa ò á dɛ, buri sĩnda pínki ni zãágu ma yãi.

¹⁰ Gbɛ̃nɔ ni fuma dasi, ò bo kɔ̃ kpɛ, oni zãkɔ̃n.

¹¹ Annabi ɛ́kɛnɔ ni su dasi ò gbɛ̃nɔ sãtɛ dasi.

¹² Yã vãni ni kɔ̃, gbɛ̃nɔ yenyĩ ni busa dasi.

¹³ Gbɛ̃ kũ à zɛna gbãna ari a gɔrɔ lɛ́a mɛ́ ani surabana le.

¹⁴ Oni kpata kũ à bò Luda kĩnaa pì baaru kpá andunia gu sĩnda pínkia sèeda ũ buri sĩnda pínkinɛ, gbasa pɔ́ pínki ni láka.

¹⁵ Tó a tɛ̃̀ guyakari kũ annabi Daniɛli a yã òo è Luda ɔnn, kyókɛri gɔ̃ dɔ̃,

¹⁶ gbɛ̃ kũ ò kú Yudeanɔ bàa sí ò mì pɛ́ kpinɔa.

¹⁷ Gbɛ̃ kũ à kú a kpɛ́ musu sún kipa à gɛ̃ kpɛ́ gũn à pɔ́ke sɛ́ à booro.

¹⁸ Gbɛ̃ kũ à kú bura sún ɛra bɛ à a uta sɛ́ro.

¹⁹ Waiyoo nɔ̀sindarenɔ kũ nɛ́randenɔ gɔrɔ birea.

²⁰ À adua kɛ de bàasinaa pì sún kɛ bunsirɛ ke kámmabogɔrɔ zĩro.

²¹ Zaakũ gɔrɔ pì wɛ́tãmma nigɔ̃ zɔ̃kɔ̃. Zaa gɔrɔ kũ Luda andunia kɛ̀ ari gbãra, a taka dí kɛro, akũsɔ̃ ani kɛ zikiro.

²² Tó Luda dí gɔrɔ pìnɔ lagoro, de gbɛ̃ke ni boro. Ama ani gɔrɔ pìnɔ lago a gbɛ̃ kũ à ń sɛ́nɔ yãimɛ.

Bisãsiri Nɛ́ sunaa

²³ Gɔrɔ birea tó gbɛ̃ke pìárɛ, à Arumasihu gwa la kesɔ̃ à Arumasihu gwa zãa, àsun síro.

²⁴ Zaakũ Arumasihu ɛ́kɛnɔ kũ annabi ɛ́kɛnɔ ni su ò sèeda zɔ̃kɔ̃nɔ kũ daboyãnɔ kɛ, de ò gbɛ̃ kũ Luda ń sɛ́nɔ sãtɛo se, tó ani sí kɛ.

²⁵ À ma, ma gĩnakɛ ma òárɛ zaa káaku kɔ̀.

²⁶ Tó ò pìárɛ à gwa, à kú sɛ̃̀n, àsun gɛ́ro. Ke tó ò pìárɛ à gwa, à kú kpɛ́nɛ gũn, àsun síro.

²⁷ Zaakũ lákũ legũ dì pí à ludambɛ pura kũ zaa ifãboki kpa ari a lɛ́tɛ kpa nà, lɛn Bisãsiri Nɛ́ suna nigɔ̃ de lɛ.

²⁸ Gu kũ gɛ̀ kún, gwen yumburukunɔ ni kɔ̃ kakaran.

²⁹ Gɔrɔ pìnɔ wɛ́tãmma gbɛra gɔ̃̀nɔ ifãntɛ̃ ni sira kũ, mɔvura ni í kɛro, susunɛnɔ ni wowo ludambɛ, gbãna kũ ò kú musunɔ ni dege.

³⁰ Bisãsiri Nɛ́ sèeda gbasa à bo ludambɛ, buri kũ ò kú andunia gũnnɔ ni ń zĩda kɛ̃kɛ̃ ń pínki, oni Bisãsiri Nɛ́ suna e ludambɛ lukun kũ gbãnao kũ gakuri zɔ̃kɔ̃ɔo.

³¹ Ani a malaikanɔ zĩ kũ kãkãki'ũ gbãnao, oni a gbɛ̃ kũ à ń sɛ́nɔ kakara andunia kusuru siikɔ̃a zaa ludambɛ lɛ́ díkũ kũ a lɛ́ direkũo.

³² À yã dada kaka lía. Tó a gã̀nɔ í kpàkpa, àtɛn lá bɔ̀tɔ kú, á dɔ̃ guwãnagɔrɔ kà kãni.

³³ Lɛmɛ sɔ̃, tó a yã pìnɔ è pínki lɛ, àgɔ̃ dɔ̃ kũ a sunaa kà kãni, à kú kpɛ́lɛlɛa.

³⁴ Yãpuran matɛn oárɛ, gɔrɔ dí gbɛ̃nɔ ni gɛ̃tɛro ari yã pìnɔ gɛ́ kɛo pínki.

³⁵ Musu kũ zĩtɛo ni gɛ̃tɛ, ama ma yãnɔn gɛ̃tɛna vĩro.

³⁶ Gbɛ̃ke a gɔrɔ ke a gɔrɔ zaka dɔ̃ro, bee malaika kũ ò kú musunɔ ke Luda Nɛ́, sé De Luda.

³⁷ Lákũ à de nà Nuhu gɔrɔ, lɛn anigɔ̃ de lɛ se Bisãsiri Nɛ́ sugɔrɔa.

³⁸ Gɔrɔ kũ í dí da andunialaro, òtɛn pɔ́ ble òtɛn í mi, òtɛn nɔ sɛ́ òtɛn zã kɛ ari Nuhu gɛ̀ɛ à gɛ̃̀ gó'itɛ gũn.

³⁹ Odi dɔ̃ro, akũ í sù à ń sɛ́tɛ ń pínki. Lɛn anigɔ̃ de lɛ se Bisãsiri Nɛ́ sugɔrɔa.

⁴⁰ Gɔrɔ birea gbɛ̃nɔn planɔ nigɔ̃ kú bura, oni gbɛ̃ do sɛ́ ò gbɛ̃ do tón.

⁴¹ Nɔgbɛ̃ gbɛ̃nɔn planɔ nigɔ̃ pɔ́ lɔ́lɔ gbɛ̀n, oni gbɛ̃ do sɛ́ ò gbɛ̃ do tón.

⁴² Abire yãi á wɛ́ gɔ̃ dɔ, zaakũ á dɔ̃ gɔrɔ kũ á Dikiri ni suro.

⁴³ Àgɔ̃ adikĩna dɔ̃. Tó bede gɔrɔ zaka kũ kpãni ni suawa dɔ̃̀ yã, de á wɛ́ gɔ̃ dɔ, ani tó à a kpɛ́ fɔ̃ro.

⁴⁴ Abire yãi ákɔ̃nɔ sɔ̃, àgɔ̃ kú kũ soruo, zaakũ Bisãsiri Nɛ́ ni su gɔrɔ zaka kũ á wɛ́ dɔiroamɛ.

Zĩkɛri náanide laakaride

⁴⁵ Dímɛ zĩkɛri náanide laakaride kũ a dikiri a zĩkɛrinɔ nànɛ a ɔĩ de à pɔ́ble kpáḿma a gɔrɔa ũu?

⁴⁶ Arubarikaden zĩkɛri kũ a dikiri a lè àtɛn kɛ lɛ a sugɔrɔa ũ.

⁴⁷ Yãpuran matɛn oárɛ, ani a aruzɛkɛ sĩnda pínki nanɛ a ɔĩmɛ.

⁴⁸ Ama tó zĩkɛrii pì pãsĩ, akũ à pì a nɛ̀sɛɛ gũn a dikiri tɛn gì kɛ,

⁴⁹ akũ à nà a zĩkɛri dakenɔ gbɛ̃gbɛ̃naaa, àtɛn pɔ́ ble àtɛn í mi kũ wɛ̃dɛrinɔ,

⁵⁰ a dikiri ni su gɔrɔ kũ a wɛ́ dɔiroamɛ, gɔrɔ zaka kũ à dɔ̃roa,

⁵¹ ani a zɔ̃zɔ̃kɔ̃rɛ, à a baka da kũ manafikidenɔ. Gwen oni ɔ́ɔ dɔn ò ɔ di ń mìia.