MALAKI 2 - Bisã Bible 2005

¹ Makũ Dikiri Zĩ̀karide ma pì: Ákɔ̃nɔ sa'orinɔ á yãn dí sà.

² Tó ádi ma yã maro, tó ádi da á swɛ̃̀n à ma tɔ́ kpáro, mani láari boáwa de àsun gɔ̃ arubarika vĩro. Ma bòáwa se kɔ̀, zaakũ ádi da á swɛ̃̀n a ma tɔ́ kpàro.

³ À ma! Mani kpãkɛ̃ á burinɔi á yãi, mani dikpɛ sa'opɔnɔ gbɔ̃̀ lɔ́lɔ á ãnnwa, oni á sɛ́tɛ ò á kɔ́tɛ.

⁴ Ánigɔ̃ dɔ̃ sà kũ ma yã dí dìtɛárɛ de ma bàka kunna kũ Levi burinɔ kpɛ́ kun. Makũ Dikiri Zĩ̀karide makũ mɛ́ ma ò.

⁵ Ma bàka kunna kũńwo pìi gũn ma wɛ̃̀ndi kũ aafiaao kpàḿma de ògɔ̃ ma vĩna vĩ, akũ ò ma vĩna vĩ, ń nini kòko ma tɔ́ yãi.

⁶ Yãdannɛna yãpura da ń lɛ́n, odi ɛ́kɛyã ma ń lɛ́nlo. Ò táa ò kũmao kũ lɛ́dokɔ̃nɔo kũ nɛ̀sɛpurao ò gbɛ̃nɔ bò yã vãni gũn dasi.

⁷ À mana sa'ori gɔ̃ dɔ̃na vĩ de gbɛ̃nɔ le ò yãdannɛna ma a lɛ́i, zaakũ àkũmɛ makũ Dikiri Zĩ̀karide zĩ̀ri ũ.

⁸ Ákɔ̃nɔ sɔ̃ a zã zɛ́a, á yãdannɛnanɔ tò gbɛ̃nɔ fù dasi, a ma bàka kunna kũ Levi burinɔ gbòro. Makũ Dikiri Zĩ̀karide makũ mɛ́ ma ò.

⁹ Akũ ma tò ò á gya bò ma á kĩa gbɛ̃ sĩnda pínki kĩnaa, kũ ádi tɛ́ ma ágbairo akũsɔ̃ adì gbɛ̃nɔ tɛ̃̀ bo doka musu.

Yìgidɛna yã

¹⁰ À de ó pínki De mɛ̀n domɛɛ? À de Luda dokɔ̃nɔ mɛ́ à ó kɛɛ? Bɔ́ mɛ́ à tò odì yãfutɛ kɛkɔ̃nɛɛ? O Luda bàka kunna kũ ó dizinɔ yã gbòro.

¹¹ Yudanɔ yãfutɛ kɛ̀ ò yã vãni kɛ̀ Isarailanɔ bùsun kũ Yurusalɛmuo, zaakũ ò tãnagbagbarinɔ sɛ̀ nɔ ũ ò Dikiri kpɛ́ kũ à yeii gbã̀a lɛ̀o.

¹² Gbɛ̃ kũ à yã dí taka kɛ̀, Dikiri a kɛ̃ Yakubu burinɔa, bee tó dímɛ, bee tó à sù kũ gbanɔ Dikiri Zĩ̀karidenɛ.

¹³ Yã plade kũ adì kɛn dí. Adìgɔ̃ ɔ́ɔ dɔ àgɔ̃ wiki pɛ́, á wɛ́'i dìgɔ̃ kú Dikiri gbagbakia, kũ adi wɛ́ sɛ́ à gba kũ a suonɛ gwa gbasa à sìro yãi.

¹⁴ Adì pi: Bɔ́ mɛ́ à sù kũ yã dioo? Kũ Dikiri mɛ́ à sèedade ũ á dagura kũ n kɛfɛnnakɛgɔrɔ nɔkpammao yãimɛ. Zaakũ n nɔkpamma pìn n gbɛ̃ndo kũ a kɔ̃ yã mà ũ, akũ n yã fùtɛnɛ.

¹⁵ À de Dikiri á kɛ mɛ̀ dokɔ̃nɔ ũ de á mɛ̀ kũ á lɛ́o gɔ̃ dokɔ̃nɔ yãimɛɛ? Bɔ́n Luda tɛn pɛ́a á mɛ̀dokɔ̃nɔkɛ pìi musuu? De á nɛ́nɔ le ò a yã ma yãimɛ. Abire yãi àgɔ̃ á zĩda kũna dɔ̃ de àsun yã futɛ á nɔkpammanɛro.

¹⁶ Makũ Dikiri Isarailanɔ Luda ma pì, ma zã yìgidɛnan kũ nɔ kpebonaao. Makũ Dikiri Zĩ̀karide makũ mɛ́ ma ò. Àgɔ̃ á zĩda kũna dɔ̃, àsun yã futɛnɛro.

¹⁷ A tò Dikiri kpàsa kũ á yã'onaao. Adì pi: Ó yã kpate mɛ́ à a kpàsaa? Kũ adì pi vãnikɛrinɔ mana Dikirinɛ, akũ ń yã dì káagu yãi. Adì pi dɔ Luda kũ àdi yãkpatɛ kɛ kũ gbɛ̃nɔo a zɛ́a pì kú mámɛɛ?