MAAKU 4 - Bisã Bible 2005

Yãlɛkɔ̃ana kũ pɔ́wɛfãriio

¹ Yesu ɛ̀ra àtɛn yã dańnɛ sɛ̀bɛɛ sarɛ. Ò kàkarai dasidasi, akũ à gɛ̃̀ à vùtɛ gó'itɛn íla, gbɛ̃nɔ gɔ̃̀ katɛna sĩ̀sĩ bara sɛ̀bɛ lɛ́a ń pínki.

² À yã dàńnɛ kũ yãlɛkɔ̃ananɔ dasi. Lákũ àtɛn dańnɛ nà à pì:

³ À sã kpá! Búbari ke mɛ́ à kun à bò à gɛ̀ɛ pɔ́wɛ fã.

⁴ Lákũ àtɛn fã nà, akũ a kenɔ lɛ̀tɛ zɛ́ gũn, bãnɔ sù ò blè.

⁵ A kenɔ lɛ̀tɛ gbɛ̀ sàraa musu, gu kũ à bùsu vĩ dasiro, akũ ò bùtɛ gɔ̃̀nɔ, kũ bùsuu gègete gwero yãi.

⁶ Kũ ifãntɛ̃ fùtɛ, akũ ò tɛ́ kũ̀ ò gàga, kũ ò zĩni vĩro yãi.

⁷ A kenɔ lɛ̀tɛ lɛ̀nɔ gũn, akũ lɛ̀ɛ fùtɛ à nàkaraḿma odi nɛ́ iro.

⁸ A kenɔ sɔ̃ ò lɛ̀tɛ zĩtɛ mana gũn. Ò bùtɛ ò fùtɛ ò nɛ́ ì, a kenɔ karanaa kɛ̀ baraakurikuri, kenɔ baaakɔ̃kɔ̃, kenɔ basɔsɔɔro.

⁹ Akũ Yesu pì: Gbɛ̃ kũ à sã vĩ à yã pì ma.

¹⁰ Kũ Yesu gòńnɛ gwe à kú ado, akũ a gbɛ̃nɔn kuri awɛɛplanɔ kũ gbɛ̃ kũ ò kúinɔ sù ò yã pìnɔ mìi gbɛ̀kaa.

¹¹ Akũ à pìńnɛ: Luda kpata kũ à bò a kĩnaa asiri kpàáwa àgɔ̃ dɔ̃, ama madì yã sĩnda pínki o gbɛ̃ kparanɔnɛ kũ yãlɛkɔ̃ananɔmɛ,

¹² de ògɔ̃ gwagwa pɔ́ke'enaa sari, ògɔ̃ sã kpákpa a dɔ̀rɔ dɔ̃naa sari, de òsun arɛ dɔ Ludaa, à ń durunnanɔ kɛ̃ḿmaro yãi.

¹³ Akũ Yesu ń lá à pì: Á yã pì dɔ̃roo? Deran áni yãlɛkɔ̃ana ke dɔ̃ɔ?

¹⁴ À ma! Búbari pìi Luda yãn àtɛn fã.

¹⁵ Gbɛ̃kenɔ de lán zɛ́ gũn pɔ́wɛ bà, gu kũ ò Luda yã fã̀n. Tó ò mà, akũ Setan dì su à Luda yã kũ ò fã̀ ń tɛ́ pì síḿma gɔ̃̀nɔ.

¹⁶ Gbɛ̃kenɔ de lán pɔ́wɛ kũ à lɛ̀tɛ gbɛ̀ sàraa musu bà. Tó ò Luda yã mà, òdi sí gɔ̃̀nɔ kũ pɔnnao.

¹⁷ Zaakũ ò zĩni vĩro, òdi kɛ gɔrɔ plaro. Tó yã̀'ũmmana ń lé ke tó ò wɛ́ tã̀ḿma yã pì yãi, òdi fumɛ gɔ̃̀nɔ.

¹⁸ Gbɛ̃kenɔ de lán pɔ́wɛ kũ à lɛ̀tɛ lɛ̀nɔ gũn bà. Ò Luda yã mà,

¹⁹ ama andunia yã damukɛna kũ yena aruzɛkɛiio kũ pɔ́ kparanɔ nidɛnao dì nakaraḿma, akũ yã pìi dì gɔ̃ àree sari.

²⁰ Gbɛ̃kenɔ de lán pɔ́wɛ kũ ò lɛ̀tɛ zĩtɛ manaanɔ bà. Òdi Luda yã ma ò sí, akũ òdi kɛ karana pɔ́ ũ, ń kenɔ baraakurikuri, kenɔ baaakɔ̃kɔ̃, kenɔ basɔsɔɔro.

Yãlɛkɔ̃ana kũ fitilao

²¹ Yesu pìńnɛ: Òdi fitila na ò gbaka kútɛa ke ò ditɛ gádo gbáru yá? fitiladibɔɔ musun òdi dinloo?

²² Asiri ke kun kũ oni gí boaairo. Pɔ́ke kun utɛna kũ ani bo gupuraaro.

²³ Gbɛ̃ kũ à sã vĩ à yã pì ma.

²⁴ À pìńnɛ dɔ: À laakari kɛ yã kũ átɛn maa. Zaka kũ adì yɔ̃̀ońnɛn Luda ni yɔ̃oárɛ ani ɛra à karaárɛ dɔ.

²⁵ Gbɛ̃ kũ à pɔ́ vĩ Luda ni karanɛ. Gbɛ̃ kũ à pɔ́ke vĩro sɔ̃, bee a fítinna kũ à vĩ Luda ni sía.

Yãlɛkɔ̃ana kũ pɔ́wɛbutɛnaao

²⁶ À pì dɔ: Kpata kũ à bò Luda kĩnaa de lán pɔ́wɛ kũ gbɛ̃ fã̀ bura bà.

²⁷ Gwãani kũ fãnantɛ̃o bee tó àtɛn i o ke à bɛ̃nɛ, pɔ́wɛ pìi dì butɛ à zɔ̃kɔ̃ kũ, gbɛ̃ pìi dìgɔ̃ dɔ̃ lákũ àdi kɛ nàro.

²⁸ Zĩtɛ mɛ́ àdi pɔ́blewɛ i a zĩda. Àdi kà pá gĩa gbasa à nɔ̀ sí, a gbɛran àdi pia.

²⁹ Tó à mà, akũ òdi kɛ̃ kũ kòmao, zaakũ a kɛ̃gɔrɔ mɛ́ à kà.

Yãlɛkɔ̃ana kũ musadi wɛ́o

³⁰ À pì dɔ: Bɔ́n kpata kũ à bò Luda kĩnaa bòkɔ̃aoo? Bɔ́n óni le ò lɛkɔ̃aoo?

³¹ À de lán musadi wɛ́ bà, kũ a wɛ́ kete de pɔ́wɛ kũ òdi tɔ̃nɔla pínki,

³² ama tó ò tɔ̃̀, àdi butɛ à zɔ̃kɔ̃ kũ de dò pɔ́nɔla pínki. Àdi ɔnɛ gègetenɔ kɛ ari bãnɔ dì su ò didi a lá uran.

³³ Yesu Luda yã òńnɛ dasi kũ yãlɛkɔ̃ana bire takanɔ ń mana lɛ́n.

³⁴ Adi yãke ońnɛ yãlɛkɔ̃anaa sariro. Tó à kú kũ a ìbanɔ ńtɛ̃nɛ, akũ àdi yã sĩnda pínki bɔkɔtɛńnɛ.

Yesu zàga'ĩa zɛnaa

³⁵ Kũ ɔkɔsi tɛn kɛ, à pì a ìbanɔnɛ: Ò bikũ bara.

³⁶ Lákũ Yesu kú gó gũn nà, akũ ò gɛ̃̀ kãao lɛɛlɛ ò dà zɛ́n lɛ ò pari tò gwe. Gó pãndenɔ gɛ̀ɛ kũńwo.

³⁷ Akũ zàga'ĩa gbãna fùtɛ. Í tɛn gó yĩpayĩpa àtɛn ká a gũn ari à ye à pa.

³⁸ Yesu kú gó kpɛ kpa, àtɛn i o a mì di mìbɔkɔɔa. Akũ a ìbanɔ a vù ò pìnɛ: Dannɛri! Kũ ótɛn kákatɛ, ńdi bídi kɛroo?

³⁹ Akũ à fùtɛ à pàta ĩaa à pì ínɛ: Ǹ yĩtɛ! Ǹ zɛ tɛɛnɛ! Akũ ĩa kpàtɛ, gu yĩ̀ kítikiti.

⁴⁰ Akũ à ń lá à pì: À kɛ̀ dera á sika vĩ lɛɛ? Ase á ma náani vĩro ari tera yá?

⁴¹ Akũ ò gɔ̃̀ bídi gũn òtɛn kɔ̃ lala ò pì: Dín gbɛ̃ dí ũ sɛ́ɛ? Bee ĩa kũ ío dì a yã mamɛ.