Online Bible

MAAKU 2 - Bisã Bible 2005

Gbɛ̃ kɔ̃̀nɔkuna werekɔ̃anaa
( Mat 9:1-8 ; Luk 5:17-26 )

¹ Gɔrɔ pla gbɛra Yesu ɛ̀ra à tà Kapɛnamu. Kũ ò mà à kú bɛ,

² akũ ò kàkarai dasidasi, gɛ̃ki kun doro bee kpɛ́lɛlɛa, àtɛn Luda yã ońnɛ.

³ Akũ ò sùnɛ kũ gbɛ̃ kɔ̃̀nɔkunaao, gbɛ̃nɔn siikɔ̃ mɛ́ ò a sɛna.

⁴ Kũ odi le ò nà kãao Yesuiro pari yãi, akũ ò dìdi kãao kpɛ́ musu, ò kpɛ́ fɔ̃̀ gu kũ Yesu kunwa. Kũ ò fɔ̃̀, akũ ò gyãre pìi kìpa kũ a wútɛbɔɔo.

⁵ Kũ Yesu è ò a náani vĩ, à pì gbɛ̃ kɔ̃̀nɔkunaa pìinɛ: Ma gbɛ̃, n durunnanɔ kɛ̃̀mma.

⁶ Ludayãdannɛri kenɔ vutɛna gwe òtɛn o ń nɛ̀sɛɛ gũn:

⁷ Bɔ́yãi gbɛ̃ dí tɛn o lɛɛ? Àtɛn dɔkɛ kũ Ludaomɛ! Dí mɛ́ ani fɔ̃ à durunnanɔ kɛ̃ḿma, tó adi kɛ Luda ado baasiroo?

⁸ Gwe gɔ̃̀nɔ Yesu dɔ̃̀ a nɛ̀sɛɛ gũn laasun kũ òtɛn lɛ́, akũ à ń lá à pì: Bɔ́yãi átɛn laasun bire taka lɛ́ á nɛ̀sɛɛ gũnn?

⁹ Tó ma pì gbɛ̃ kɔ̃̀nɔkunaa pìinɛ a durunnanɔ kɛ̃̀a, ke tó ma pì à futɛ à a wútɛbɔ sɛ́ à táa o, a kpate mɛ́ à aragaa?

¹⁰ Ma ò lɛ de àgɔ̃ dɔ̃ kũ Bisãsiri Nɛ́ durunnanɔ kɛ̃mmana iko vĩ zĩtɛ lamɛ. Akũ à ò gbɛ̃ kɔ̃̀nɔkunaa pìinɛ à pì:

¹¹ Ma ònnɛ ǹ futɛ ǹ n wútɛbɔ sɛ́ ǹ tá bɛ.

¹² Akũ à fùtɛ gɔ̃̀nɔ à a wútɛbɔɔ pìi sɛ̀ à bòo gbɛ̃nɔ wára ń pínki. Yã pìi bò ń sarɛ, akũ ò Luda tɔ́ bò ò pì: Ódi yã dí taka e yãro.

Yesu Levi sisinaa
( Mat 9:9-17 ; Luk 5:27-39 )

¹³ Yesu ɛ̀ra à bò à gɛ̀ɛ sɛ̀bɛ lɛ́a. Òtɛn su a kĩnaa dasidasi, akũ àtɛn yã dańnɛ.

¹⁴ Gɔrɔ kũ àtɛn gɛ̃tɛ, akũ à Alafeu nɛ́ Levi è vutɛna a bɛ'ɔgɔsikin. À pìnɛ: Ǹ mɔ́ ǹ tɛ́mai. Akũ à fùtɛ à tɛ̀i.

¹⁵ Zĩkea kũ Yesu tɛn pɔ́ ble Levi pì bɛa, bɛ'ɔgɔsirinɔ kũ kifirinɔ tɛn pɔ́ ble kãao dasi kũ a ìbanɔ lɛɛlɛ. Zaakũ gbɛ̃ bire takanɔn tɛ́i dasi.

¹⁶ Farisi kũ òdi Luda yã dańnɛnɔn kú gwe. Kũ ò è Yesu tɛn pɔ́ ble lɛɛlɛ kũ bɛ'ɔgɔsirinɔ kũ kifirinɔ, akũ ò a ìbanɔ là ò pì: Bɔ́yãin àtɛn pɔ́ ble lɛɛlɛ kũ bɛ'ɔgɔsirinɔ kũ kifirinɔoo?

¹⁷ Kũ Yesu yã pìi mà, à pìńnɛ: Gbɛ̃ kũ à aafia vĩ bàka kú kũ likita yãoro, sé gyãre. Mádi su gbɛ̃ mananɔ sísiro, sé kifirinɔ.

Lɛ́yĩnaa
( Mat 9:14-17 ; Luk 5:33-39 )

¹⁸ Yahaya Da'itɛkɛri ìbanɔ kũ Farisinɔ tɛn lɛ́ yĩ, akũ ò sù ò Yesu là ò pì: Yahaya ìbanɔ kũ Farisi ìbanɔ dì lɛ́ yĩ, akũ n ìbanɔ dì yĩ sero bi?

¹⁹ Akũ Yesu pìńnɛ: Nɔsɛri gbɛ̃nɔ ni lɛ́ yĩ gɔrɔ kũ à kú kũńwo nɔsɛ gũn yá? Oi! Gɔrɔ kũ nɔsɛri kú kũńwo, oni lɛ́ yĩro.

²⁰ A gɔrɔ ni su kũ oni nɔsɛri bo ń tɛ́. Gɔrɔ birean oni lɛ́ yĩ sà.

²¹ Òdi pɔ́lɛ dufu nambata di uta zĩlaro. Tó ò kɛ̀ lɛ, a dufu ni sɔ̃kũn oni kɛ̃kɔ̃a, uta zĩ fɔ̃na ni kara.

²² Òdi sèwɛ̃ dufu ká tùru zĩ gũnlo. Tó ò kɛ̀ lɛ, wɛ̃ pì ni tùru pũtã, wɛ̃ kũ tùruuo ni yaka ń pínki. Oi, òdi sèwɛ̃ dufu ká tùru dufu gũmmɛ.

Kámmabogɔrɔ yã
( Mat 12:1-21 ; Luk 6:1-11 )

²³ Kámmabogɔrɔ zĩ kea Yesu tɛn pã buranɔla. Lákũ àtɛn gɛ́ nà a ìbanɔ pɔ́blewɛ wòro òtɛn só.

²⁴ Akũ Farisinɔ pìnɛ: Ǹ gwa! Bɔ́yãin òtɛn yã kũ òdi kɛ kámmabogɔrɔ zĩro kɛɛ?

²⁵ Akũ Yesu wèḿma à pì: Àdi a kyó kɛ ziki a è lákũ Dauda kɛ̀ gɔrɔ kũ àpii kũ a gbɛ̃nɔ tɛn takasi kɛ, kũ nà tɛni ń dɛroo?

²⁶ Sa'oriki Abiata gɔrɔa à gɛ̃̀ Luda ɔnn, à burodi kũ ò kàtɛ Ludanɛɛ sò, kũ gbɛ̃ke a sona zɛ́ vĩro, sé sa'orinɔ, akũ à kpà a gbɛ̃nɔa.

²⁷ Yesu ɛ̀ra à pìńnɛ dɔ: Luda kámmabogɔrɔ dìtɛ bisãsiri aafia yãimɛ. Adi kɛ kámmabogɔrɔn à bisãsiri kɛ̀iro.

²⁸ Abire yãi Bisãsiri Nɛ́ iko vĩ kámmabogɔrɔa se.

« Předchozí

další »

Následuj nás:

Sponzorované odkazy

Reklamy