Online Bible

MAAKU 15 - Bisã Bible 2005

Pilati yãkpatɛkɛna kũ Yesuo
( Mat 27:1-2 , 11-14 ; Luk 23:1-5 ; Yuh 18:28-38 )

¹ Kũ gu dɔ̀ gɔ̃̀nɔ sa'orikinɔ kũ gbɛ̃ zɔ̃kɔ̃nɔ kũ ludayãdannɛrinɔ kũ gbãnadenɔ ń pínki yã gɔ̃̀gɔ̃, akũ ò Yesu yĩ̀ ò gɛ̀ɛ ò a nà Pilatinɛ a ɔĩ.

² Akũ Pilati a là à pì: Mɔkɔ̃mmɛ Yudanɔ kína ũ yá? Yesu wèa à pì: Lɛn n ò lɛ.

³ Sa'orikinɔ tɛn yã didia,

⁴ akũ Pilati a là dɔ: Ĩni yãke oroo? Yã kũ òtɛn didimma ma fá!

⁵ Ama Yesu dí yãke weḿmaro, akũ yã pìi bò Pilati sarɛ.

Yãdana Yesula
( Mat 27:15-26 ; Luk 23:13-25 ; Yuh 18:39-19:16 )

⁶ Vĩnla dikpɛ zĩ òdi purusunanɔ doke kũ gbɛ̃nɔ a wɛ́ kɛ̀ gbarɛńnɛ.

⁷ Gɔrɔ kũ̀a sɔ̃ gbɛ̃ke kú kpɛ́siran òdi pi Baraba. À kú kũ gbɛ̃ gaavude kũ ò gbɛ̃ dɛ̀nɔo.

⁸ Akũ pari nà Pilatii ò wɛ́ kɛ̀a à kɛ lákũ àdi kɛńnɛ nà.

⁹ Akũ Pilati ń lá à pì: Á ye mà Yudanɔ kína gbarɛárɛn yá?

¹⁰ Zaakũ à dɔ̃ kũ nɛ̀sɛgɔ̃ba kũ sa'orikinɔn vĩ kũ Yesuo yãin ò a kpàawa.

¹¹ Akũ sa'orikinɔ gbɛ̃nɔ laakarii fùtɛ, de ò o Pilatinɛ à Baraba gbarɛńnɛ.

¹² Akũ Pilati ń lá à pì: Bɔ́n á ye mà kɛ kũ gbɛ̃ kũ adì pi Yudanɔ kínao teraa?

¹³ Akũ ò wiki lɛ̀ ò pì: Ǹ a pá lía!

¹⁴ Akũ Pilati pìńnɛ: À kɛ̀ deraa? Bɔ́ dàan à kɛ̀ɛ? Akũ ò wiki lɛ̀ ò kàra ò pì: Ǹ a pá lía!

¹⁵ Pilati ye à gbɛ̃nɔ pɔnna wɛtɛ, akũ à Baraba gbàrɛńnɛ. À Yesu kpà sozanɔa ò a gbɛ̃ flã̀ao ò a pá lía.

Yesu fobona
( Mat 27:27-31 ; Yuh 19:2-3 )

¹⁶ Akũ sozaa pìnɔ gɛ̀ɛ kãao bùsu gbɛ̃ zɔ̃kɔ̃ɔ pì bɛ ɔnn, akũ ò ń gã̀ kàkara pínki.

¹⁷ Ò arukĩmba tɛ̃ra dànɛ, akũ ò lɛ̀ fùraa tã̀ ò kùnɛ.

¹⁸ Akũ òtɛn fɔ kpáa ò pì: Fɔɔ Yudanɔ kína!

¹⁹ Òtɛni a lɛ́ kũ gòoo a mìia òtɛn lɛ́'i káa òtɛn kútɛ ń kosoa òtɛn mì natɛnɛ.

²⁰ Kũ ò a fobò ò làka, akũ ò arukĩmba tɛ̃ra pìi gòala ò a zĩda pɔ́kasa dànɛ. Akũ ò bò kãao òtɛn gɛ́ a pá lía.

Yesu pana lía
( Mat 27:32-44 ; Luk 23:26-43 ; Yuh 19:17-27 )

²¹ Kũ òtɛn gɛ́, Sirɛni gbɛ̃ kũ ò pinɛ Simɔ bò lakutu kea àtɛn su wɛ̃tɛ gũn, akũ ò gã nàa à Yesu lígbãndurukpana sɛ́. Àkũmɛ Alɛsanda kũ Rufuo de ũ.

²² Akũ ò gɛ̀ɛ kũ Yesuo gu kũ òdi pi Gɔgɔta kũ à pì mìtokoki.

²³ Akũ ò sèwɛ̃ kũ ò yã̀katɛ kũ ɛzɛo dɔ̀nɛ, ama adi miro.

²⁴ Kũ ò a pà lía, akũ ò a pɔ́kasanɔ kpàatɛ ò kàtɛ, akũ ò kàpaa kpà lákũ ń baadi ni sɛ́ nà.

²⁵ Ò a pà lía mɔ̀ kɛ̃ndomɛ.

²⁶ Ò yã kũ ò dìaa kɛ̃̀ ò nà lía a mìla ò pì: Yudanɔ kína.

²⁷ Ò kpãni wɛ́dewɛnɔ pà lía a sarɛ gwe dɔ gbɛ̃nɔn pla, gbɛ̃ do a ɔplai gbɛ̃ do a ɔzɛi.

²⁸ Lɛn yã kũ ò kɛ̃̀ Luda yãn pàpa lɛ kũ ò pì: Ò a kàkara kũ dàkɛrinɔ.

²⁹ Gbɛ̃ kũ òtɛn gɛ̃ zɛ́la gwenɔ tɛni ń mì kɛ dékũdekũ, òtɛni a sɔ̃sɔ̃ ò pì: Ɛ̃hɛ̃! Mɔkɔ̃n kũ n pì ĩni Luda kpɛ́ wí ń ɛra ǹ bo gɔrɔ aakɔ̃ daguran gweroo?

³⁰ Ǹ n zĩda mì sí ǹ kipa lía!

³¹ Lɛmɛ dɔ sa'orikinɔ kũ ludayãdannɛrinɔ tɛni a fobo lɛ ò pì: À gbɛ̃ pãndenɔ mìi sì, ama ani fɔ̃ à a zĩda mì síro.

³² Tó Arumasihu, Isarailanɔ kína kìpa lía tera ò e, óni a náani kɛ. Akũ gbɛ̃ kũ ò ń pá lía lɛɛlɛnɔ tɛni a sɔ̃sɔ̃ dɔ.

Yesu ganaa
( Mat 27:45-46 ; Luk 23:44-49 ; Yuh 19:28-30 )

³³ Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mɔ̀ aakɔ̃.

³⁴ Fãnantɛ̃ mɔ̀ aakɔ̃n Yesu wiki lɛ̀ gbãnagbãna à pì: Ɛloi, Ɛloi, lɛma sabatani! Abirekũ pì: Ma Luda, ma Luda, à kɛ̀ dera n ma tonn?

³⁵ Kũ gbɛ̃ kũ ò zɛna gwe kenɔ yã pìi mà, akũ ò pì: À ma, àtɛn Iliasu sísi.

³⁶ Akũ gbɛ̃ke bàa lɛ̀ à gɛ̀ɛ à sako sɛ̀ à dà sèwɛ̃ kpã̀kpãa gũn, à fĩ̀fĩ lebaa, akũ à dɔ̀ Yesunɛ à mi. Akũ à pì: À zɛ gĩa ò gwa, tó Iliasu ni su à a kipa.

³⁷ Yesu wiki gbãna lɛ̀ à wɛ̃̀ndii tà.

³⁸ Akũ Luda kpɛ́ lábure kɛ̃̀kɔ̃a pla bona musu suna zĩtɛ.

³⁹ Kũ sozanɔ gbɛ̃ zɔ̃kɔ̃ kũ à zɛ Yesu arɛ gwe è lákũ à gà nà, akũ à pì: Yãpuramɛ Luda Nɛ́n gbɛ̃ dí ũ.

⁴⁰ Nɔgbɛ̃ kenɔ kú gwe dɔ òtɛn gu gwa zã̀ dire. Ń tɛ́n Mariama Magadalɛni kun kũ Mariamao Yamisi Fíti kũ Yusufuo da kũ Salomɛo.

⁴¹ Gɔrɔ kũ Yesu kú Galili, mɔ́kɔ̃nɔ mɛ́ òdigɔ̃ tɛ́i ògɔ̃ kpái. Nɔgbɛ̃ pãndenɔn kú gwe dɔ dasi kũ ò gɛ̀ɛ kãao Yurusalɛmu lɛɛlɛ.

Yesu vĩnaa
( Mat 27:57-61 ; Luk 23:50-56 ; Yuh 19:38-42 )

⁴² Azuma zĩ ɔkɔsi. Kũ òtɛn kámmabogɔrɔ soru kɛ,

⁴³ Yusufu Arimatea gbɛ̃ sù. Gbɛ̃ tɔ́demɛ Yuda gbãnadenɔ tɛ́. Àkũ sɔ̃ àtɛn kpata kũ à bò Luda kĩnaa dã. À kùgbãna kɛ̀ à gɛ̀ɛ Pilati kĩnaa à Yesu gɛ̀ɛ gbɛ̀kaa.

⁴⁴ Kũ Pilati mà Yesu gĩnakɛ à gà kɔ̀, à bò a sarɛ. Akũ à sozanɔ gbɛ̃ zɔ̃kɔ̃ɔ sìsi à a là tó Yesu gà kɔ̀.

⁴⁵ Kũ Pilati gbɛ̃ zɔ̃kɔ̃ɔ yã pìi mà, akũ à Yusufu gbà zɛ́ à gɛ̀ɛ pì sɛ́.

⁴⁶ Akũ Yusufu gɛ̀ɛ à táaru biza lù, akũ à gɛ̀ɛ à a gɛ̀ɛ kìpa lía à biza pìi fĩ̀fĩa. À a dà gbɛ̀wɛɛ kũ ò sɔ̀ mira ũ gũn, akũ à gbɛ̀ gbɛ̃̀ntɛ̃ gbigiri kɛ̀ à tàta wɛ̀ɛ pìlɛ.

⁴⁷ Mariama Magadalɛni kũ Mariama Yusufu dao è gu kũ ò Yesu gɛ̀ɛ pìi wùtɛn.

« Předchozí

další »

Následuj nás:

Sponzorované odkazy

Reklamy