MAAKU 13 - Bisã Bible 2005

Yurusalɛmu yakana kũ andunialakagɔrɔ sèedanɔ

¹ Lákũ Yesu tɛn bo Luda ɔnn nà, a ìbanɔ doke pìnɛ: Dannɛri, ǹ gwa lákũ ò kpɛ́ mana dí takanɔ bò nà kũ gbɛ̀ mana dí takanɔ.

² Akũ Yesu pìnɛ: N kpɛ́ zɔ̃kɔ̃ dínɔ è pínki yá? Gbɛ̀ ke kú gu dí kũ oni tó dikɔ̃aro, oni gboro pínkimɛ.

³ Yesu vutɛna Kùkpɛ sĩ̀sĩgɛrɛɛi arɛdɔkɔ̃ana kũ Luda ɔnnwo, akũ Pita kũ Yamisio kũ Yuhanao kũ Anduruo a gbɛ̀ka gusarɛ ò pì:

⁴ Ǹ owɛrɛ, bɔrɛn yã dínɔ ni kɛɛ? Bɔ́ mɛ́ anigɔ̃ de a pínki kɛgɔrɔ sèeda ũu?

⁵ Akũ Yesu pìńnɛ: À laakari kɛ, àsun tó ò á sãtɛro.

⁶ Oni su dasi kũ ma tɔ́o, onigɔ̃ pi Arumasihumɛ ń ũ oni gbɛ̃nɔ sãtɛ dasi.

⁷ Tó a zĩ̀nɔ baaruu mà kũ a òpiio, àsun bídi kɛro. Sé abirekũnɔ kɛ, ama andunia lakana kpɛ́.

⁸ Buri kũ burio ni futɛkɔ̃i, lɛmɛ dɔ bùsu kũ bùsuuo. Zĩtɛ yĩgãyĩgãna nigɔ̃ kú gukenɔn kũ nàao. Yã dínɔmɛ nɔ̀wãwã naana ũ.

⁹ À laakari kɛ. Oni á kũkũ ò á na yãkpatɛkɛrinɔnɛ ń ɔĩ, oni á gbɛ̃gbɛ̃ aduakɛkpɛnɔ gũn. Oni á zɛ bùsu gbɛ̃ zɔ̃kɔ̃nɔ kũ kínanɔ arɛ ma yãi, de àgɔ̃ deńnɛ ma sèedadenɔ ũ.

¹⁰ Sé ò ma baaru nna waazi kɛ buri pínki ma gĩa.

¹¹ Tó ò gɛ̀ɛ kãáo yãkpatɛkɛkia, àsun gĩnakɛ à bídi kɛ yã kũ áni oaro. Yã kũ Luda dàárɛ á lɛ́n gɔrɔ kũ̀a à o, zaakũ ákɔ̃nɔ mɛ́ áni yã oro, Luda Ninimɛ.

¹² Vĩ̀ni kũ dakũnanɔ ni kɔ̃ kpáḿma ò dɛ. Denɔ ni bo ń nɛ́nɔ kpɛ. Nɛ́nɔ ni bo ń denɔ kũ ń danɔ kpɛ ò ń dɛ.

¹³ Gbɛ̃ sĩnda pínki ni zãágu ma yãi, ama gbɛ̃ kũ à zɛna gbãna ari a gɔrɔ lɛ́a ni surabana le.

¹⁴ Tó a tɛ̃̀ guyakari è gu kũ à de àgɔ̃ kunlo, kyókɛri gɔ̃ dɔ̃, gbɛ̃ kũ ò kú Yudeanɔ bàa sí ò mì pɛ́ kpinɔa.

¹⁵ Gbɛ̃ kũ à kú a kpɛ́ musu sún kipa à gɛ̃ kpɛ́ gũn à pɔ́ke sɛ́ à booro.

¹⁶ Gbɛ̃ kũ à kú bura sún ɛra bɛ à a uta sɛ́ro.

¹⁷ Waiyoo nɔ̀sindarenɔ kũ nɛ́randenɔ gɔrɔ birea.

¹⁸ À adua kɛ de yã pì sún kɛ bunsirɛ gɔrɔro,

¹⁹ zaakũ wɛ́tãmma nigɔ̃ kun gɔrɔ pìnɔa. Zaa gɔrɔ kũ Luda andunia kɛ̀ ari gbãra a taka dí kɛro, ani sɔ̃ kɛ zikiro.

²⁰ Tó Dikiri dí gɔrɔ pìnɔ lagoro, de gbɛ̃ke ni boro. Ama à gɔrɔ pìnɔ làgo a gbɛ̃ kũ à ń sɛ́nɔ yãimɛ.

Bisãsiri Nɛ́ sunaa

²¹ Gɔrɔ birea tó gbɛ̃ke pìárɛ, à Arumasihu gwa la kesɔ̃ à Arumasihu gwa zã̀ dire, àsun síro.

²² Zaakũ Arumasihu ɛ́kɛnɔ kũ annabi ɛ́kɛnɔ ni su ò sèedanɔ kũ daboyãnɔ kɛ, de ò gbɛ̃ kũ Luda ń sɛ́nɔ sãtɛo, tó ani sí kɛ.

²³ À laakari kɛ. Ma gĩnakɛ ma yã pínki òárɛ zaa káaku kɔ̀.

²⁴ Gɔrɔ pìnɔ wɛ́tãmmanaa gbɛra ifãntɛ̃ ni sira kũ, mɔvura ni í kɛro,

²⁵ susunɛnɔ ni woro ludambɛ, gbãna kũ ò kú musunɔ ni yĩgã,

²⁶ gbasa ò Bisãsiri Nɛ́ suna e ludambɛ lukun kũ gbãna zɔ̃kɔ̃ɔo kũ gakurio.

²⁷ Ani a malaikanɔ zĩ andunia kusuru siikɔ̃ gũn, de ò gbɛ̃ kũ Luda ń sɛ́nɔ kakara zaa andunia lɛ́ díkũ kũ a lɛ́ direkũo.

²⁸ À yã dada kaka lía. Tó a ɔnɛnɔ í kpàkpa àtɛn lá bɔ̀tɔ kú, á dɔ̃ kũ guwãnagɔrɔ kà kãni.

²⁹ Lɛmɛ sɔ̃, tó a è yã pìnɔ tɛn kɛ, àgɔ̃ dɔ̃ kũ a sunaa kà kãni, à kú kpɛ́lɛlɛa.

³⁰ Yãpuran matɛn oárɛ gɔrɔ dí gbɛ̃nɔ ni gɛ̃tɛro ari yã pìnɔ gɛ́ kɛo pínki.

³¹ Musu kũ zĩtɛo ni gɛ̃tɛ, ama ma yãnɔn gɛ̃tɛna vĩro.

³² Gbɛ̃ke a gɔrɔ ke a gɔrɔ zaka dɔ̃ro, bee malaika kũ ò kú musunɔ ke Luda Nɛ́, sé De Luda.

³³ À laakari kɛ, á wɛ́ gɔ̃ dɔ, zaakũ á dɔ̃ gɔrɔ kũ ani suro.

³⁴ A de lán gbɛ̃ kũ àtɛn gɛ́ wɛ̃tɛa bà. À a bɛ tò a zĩkɛrinɔnɛ baadi kũ a zĩo, akũ à pì a gudãkpãriinɛ á wɛ́ gɔ̃ dɔ.

³⁵ Ákɔ̃nɔ sɔ̃, á dɔ̃ gɔrɔ kũ bede ni suro, ɔkɔsin yá, lizãndon yá, kolɛzuon yá, ke gudɔo. A yã mɛ́ à tò á wɛ́ gɔ̃ dɔ,

³⁶ de àsun su kãnto à á le átɛn i oro yãi.

³⁷ Yã kũ matɛn oárɛ matɛn o gbɛ̃ sĩnda pínkinɛmɛ, à wɛ́ gɔ̃ dɔ.