Online Bible

LUKU 7 - Bisã Bible 2005

Sozanɔ gbɛ̃ zɔ̃kɔ̃ zĩkɛri werekɔ̃anaa
( Mat 8:5-13 )

¹ Kũ Yesu yã birenɔ ò gbɛ̃nɔnɛ pínki à làka, akũ à gɛ̀ɛ Kapɛnamu.

² Romu sozanɔ gbɛ̃ zɔ̃kɔ̃ ke kú gwe, à zĩkɛri vĩ à yei manamana, akũ àtɛn gyã kɛ à kà gana.

³ Kũ gbɛ̃ zɔ̃kɔ̃ɔ pì Yesu baaruu mà, à Yuda gbɛ̃ zɔ̃kɔ̃nɔ zĩ̀a ò wɛ́ kɛa à su à a zĩkɛrii pìi mì sí.

⁴ Kũ ò kà Yesu kĩnaa, ò wɛ́ kɛ̀a gbãngbãn ò pì: Gbɛ̃ pìi kà ǹ kpái.

⁵ À ye ó burii, àkũ mɛ́ à aduakɛkpɛ dɔ̀wɛrɛ.

⁶ Akũ Yesu gɛ̀ɛ kũńwo. Kũ à kà kãni kũ a bɛo, akũ gbɛ̃ zɔ̃kɔ̃ɔ pì a gbɛ̃nnanɔ zĩ̀ ò yã dí onɛ: Dikiri, ǹsun wari dɔ n zĩdaaro, mádi ká kũ ǹ gɛ̃ ma bɛaro.

⁷ A yã mɛ́ à tò ma dìtɛ kũ mádi ká mà su n kĩnaa ma zĩdaro. Ǹ yã o, ma zĩkɛri ni werekɔ̃a.

⁸ Zaakũ makũ se ò iko vĩmamɛ, má iko vĩ sozanɔa. Madì o ń gbɛ̃ donɛ à gɛ́, akũ àdi gɛ́. Madì o a pãndenɛ à mɔ́, akũ àdi su. Madì o ma zĩkɛriinɛ à adikũ kɛ, àdi kɛ.

⁹ Kũ Yesu yã pìi mà, à bò a sarɛ. Akũ à lìtɛ à pì gbɛ̃ kũ ò tɛ́ainɔnɛ: Matɛn oárɛ, mádi e gbɛ̃ke ma náani kɛ̀ lɛ bee Isarailanɔ tɛ́ro.

¹⁰ Kũ zĩ̀rii pìnɔ ɛ̀ra ò sù, ò è zĩkɛrii pìi wèrekɔ̃a.

Gyaanɔ nɛ́ mɛ̀n do légelege vuna gan

¹¹ Abire gbɛra Yesu gɛ̀ɛ wɛ̃tɛ kũ òdi pi Naini gũn. A ìbanɔ kũ gbɛ̃ pãndenɔ gɛ̀ɛ kãao dasidasi.

¹² Kũ à kà kãni kũ wɛ̃tɛ pì bĩnilɛo, à è ò gɛ̀ sɛna òtɛn boo. Gyaanɔ nɛ́ mɛ̀n do légelegemɛ. Wɛ̃tɛpidenɔn kú kũ nɔgbɛ̃ pìio dasi.

¹³ Kũ Dikiri a è, akũ à kɛ̀nɛ wɛ̃nda, à pìnɛ: Ǹsun ɔ́ɔ dɔro.

¹⁴ Akũ à nà gɛ̀ɛ pìii, à ɔ nà a àkpatiia. Kũ gbɛ̃ kũ ò sɛnanɔ zɛ̀, akũ à pì: Kɛfɛnna, ma ònnɛ ǹ vu!

¹⁵ Akũ gɛ̀ɛ pìi vùtɛ à nà yã'onaaa. Akũ Yesu a kpà a daa.

¹⁶ Vĩna gbɛ̃nɔ kũ̀ ń pínki, ò Luda sáabu kpà ò pì: O annabi zɔ̃kɔ̃ɔ è ó tɛ́. Ò pì dɔ: Luda sù a gbɛ̃nɔ gwa.

¹⁷ Akũ Yesu baaruu dà Yudea bùsula kũ bùsu kũ ò likainɔ pínki.

Yahaya Da'itɛkɛri zĩ̀rinɔ
( Mat 11:1-19 )

¹⁸ Yahaya ìbanɔ yã pìnɔ bàbanɛ pínki. Akũ Yahaya ń gbɛ̃nɔn planɔ sìsi,

¹⁹ à ń zĩ Dikiria, ò a la, àkũmɛ gbɛ̃ kũ ani su ũ yá, ke ògɔ̃ wɛ́ dɔ gbɛ̃ pãndeimɛ?

²⁰ Kũ gbɛ̃ pìnɔ kà Yesu kĩnaa, ò pìnɛ: Yahaya Da'itɛkɛri mɛ́ à ó zĩ ò n la, mɔkɔ̃mmɛ gbɛ̃ kũ ani su ũ yá, ke ògɔ̃ wɛ́ dɔ gbɛ̃ pãndeimɛ?

²¹ Zaa gwe gɔ̃̀nɔ Yesu gbɛ̃nɔ wèrekɔ̃a dasi kũ ń gyãnɔ kũ ń wãwãnɔ kũ ń tãnanɔ. À tò vĩ̀nanɔ gu è dasi dɔ.

²² Akũ à pì Yahaya zĩ̀rinɔnɛ: À gɛ́ à yã kũ a è, akũsɔ̃ a mànɔ gbãnɛ. À onɛ vĩ̀nanɔ tɛn gu e, ɛrɛnɔ tɛn táa o, kusunɔ tɛn werekɔ̃a, sãtonɔ tɛn yã ma, gɛ̀nɔ tɛn vu, takasidenɔ tɛn baaru nna waazi ma.

²³ Arubarikaden gbɛ̃ kũ àdi fu ma yãaro ũ.

²⁴ Kũ Yahaya zĩ̀rinɔ tà, Yesu Yahaya yã ò parinɛ à pì: Bɔ́n a gɛ gwa gbárannan? Kàpa kũ ĩa tɛn yĩgãn yá?

²⁵ Bɔ́n a gɛ gwa sàa? Gbɛ̃ kũ à pɔ́kasa zãrɛ danan yá? Nnamari kũ òdi pɔ́kasa mana danɔ dìgɔ̃ kú kínabɛamɛ.

²⁶ Bɔ́n a gɛ gwa sàa? Annabiin yá? Lɛmɛ! Matɛn oárɛ à de annabila se.

²⁷ Zaakũ Yahayan ò a yã kɛ̃̀ Luda yãn ò pì: Mani ma zĩ̀ri gbarɛ n ã à zɛ́ kɛkɛnnɛ.

²⁸ Matɛn oárɛ, nɔgbɛ̃ nɛ́'inaa gũn gbɛ̃ke dí ká Yahaya ũro. Bee kũ abireo gbɛ̃ kũ à de gbɛ̃ kpɛde ũ kpata kũ à bò Luda kĩnaa gũn deala.

²⁹ Kũ gbɛ̃ sĩnda pínki a yã mà, ari kũ bɛ'ɔgɔsirinɔ sé, ò yã nna kpà Ludaa, zaakũ Yahaya ń da'itɛ kɛ̀.

³⁰ Farisinɔ kũ ludayãdannɛrinɔ sɔ̃, ò gì yã kũ Luda dìtɛ à kɛńnɛi, akũ odi we kũ Yahaya ń da'itɛ kɛ̀ro.

³¹ Yesu pì: Bɔ́n mani gbãragbɛ̃nɔ kpákũsũoo? Bɔ́n ò bòkɔ̃aoo?

³² Ò de lán nɛ́ kũ ò kú ɛtɛ gũn, òtɛn lɛ́ zukɔ̃inɔ bà òtɛn pi: O úra pɛ̀árɛ, ádi ũ wãro. O wɛ̃nda lɛ̀ɛ sìárɛ, ádi ɔ́ɔ dɔro.

³³ Zaakũ Yahaya Da'itɛkɛrii sù, adi burodi sóro, adi sèwɛ̃ miro, akũ a pì tãnademɛ.

³⁴ Bisãsiri Nɛ́ sù, àdi pɔ́ ble, àdi í mi, akũ a pì: Guturu wɛ̃miriimɛ, bɛ'ɔgɔsirinɔ kũ durunnakɛrinɔ gbɛ̃nnamɛ.

³⁵ Ama òdi ɔ̃ndɔ̃ dɔ̃ a yãkɛnaaamɛ.

Nísi gbĩ nna kuna Yesu gbáa

³⁶ Farisi ke Yesu sìsi à su à pɔ́ ble kãao. Yesu gɛ̀ɛ a bɛa, akũ àtɛn pɔ́ ble gɛngɛsɛkɛna.

³⁷ Nɔgbɛ̃ dàvãnide ke kú wɛ̃tɛ pìi gũn. Kũ à mà Yesu tɛn pɔ́ ble Farisi pì bɛa, akũ à gɛ̀ɛ gwe kũ kpáluba fítinnao kũ nísi gbĩ nnao kú a gũn.

³⁸ À zɛ̀ a kpɛ a gbá sarɛ, àtɛn ɔ́ɔ dɔ. A wɛ́tɛ̃ tɛn tɔ̃ a gɛ̀sɛkpɛa, akũ àtɛn wara kũ a mìkão, à lɛ́ pɛ̀pɛ a gbáa, akũ à nísi gbĩ nna pìi kùa.

³⁹ Kũ Farisi kũ à a sìsi pìi è lɛ, akũ à pì a swɛ̃̀ɛ gũn: Tó gbɛ̃ pì bi annabiimɛ, de à nɔgbɛ̃ kũ àtɛn ɔ naa dí taka dɔ̃̀, kũ dàvãnidemɛ.

⁴⁰ Akũ Yesu pì Farisi pìinɛ: Simɔ, má yãke vĩ mà onnɛ. Simɔ pì: Ǹ o, Dannɛri.

⁴¹ Yesu pì: Ɔgɔdakɛri ke mɛ́ à kun, gbɛ̃nɔn planɔ a fĩna kũna, gbɛ̃ do andurufu ɔgɔ wàa pla kpɛ́ basɔɔro, gbɛ̃ do sɔ̃ ɔgɔ bupla akuri.

⁴² Kũ ò pɔ́ke vĩ ò fĩna booro, akũ à tòńnɛ ń pla ń pínki. Ń tɛ́, dí mɛ́ anigɔ̃ yei de a dakelaa?

⁴³ Simɔ wèa à pì: Matɛn da gbɛ̃ kũ ò tònɛ kũ ɔgɔ zɔ̃kɔ̃ɔomɛ. Yesu pìnɛ: N we mana.

⁴⁴ Akũ Yesu arɛ dɔ̀ nɔgbɛ̃ pìia, à pì Simɔnɛ: N nɔgbɛ̃ pìi è yá? Kũ ma gɛ̃ n bɛa, ńdi í kpáma ma gbá pìpiro, akũ nɔgbɛ̃ pì ma gbá pìpi kũ a wɛ́tɛ̃o, à wàra kũ a mìkão.

⁴⁵ Ńdi lɛ́ pɛ́maro. Nɔgbɛ̃ pì sɔ̃, zaa gɔrɔ kũ ma gɛ̃ la, adi kámma bo kũ lɛ́pɛna ma gbáaaoro.

⁴⁶ Ńdi nísi má ma mìiaro. Nɔgbɛ̃ pì sɔ̃, à nísi gbĩnnade kù ma gbánɔa.

⁴⁷ Abire yã mɛ́ à tò matɛn onnɛ, à yemai manamana kũ a durunna zɔ̃kɔ̃ɔ kɛ̃̀a yãimɛ. Gbɛ̃ kũ ò a kɛ̃̀ kũ a fítio sɔ̃, yenyĩ fítinlen àdigɔ̃ vĩ.

⁴⁸ Akũ à pì nɔgbɛ̃ pìinɛ: N durunnanɔ kɛ̃̀nnɛ.

⁴⁹ Akũ gbɛ̃ kũ òtɛn pɔ́ ble lɛɛlɛnɔ òkɔ̃nɛ ò pì: Dín gbɛ̃ pì ũ, kũ àtɛn durunnanɔ kɛ̃ḿmaa?

⁵⁰ Akũ Yesu pì nɔgbɛ̃ pìinɛ: Ma náani kũ n kɛ̀ mɛ́ à n sura bà. Ǹ tá bɛ aafia.

« Předchozí

další »

Následuj nás:

Sponzorované odkazy

Reklamy