Online Bible

LUKU 4 - Bisã Bible 2005

Yesu yɔ̃ogwanaa
( Mat 4:1-11 ; Maa 1:12-13 )

¹ Yesu bò Yoda àtɛn su kũ Luda Ninio pɛkɛrɛna, akũ Nini pìi gɛ̀ɛ kãao gbárannan.

² Ibilisi a yɔ̃̀ à gwà gwe ari gɔrɔ bupla. Gɔrɔ kũ̀a adi pɔ́ke blero. Kũ gɔrɔ bupla pìi pàpa, nà tɛni a dɛ.

³ Akũ Ibilisi pìnɛ: Tó Luda Nɛ́mɛ n ũ, ǹ pi gbɛ̀ dí li burodi ũ.

⁴ Yesu wèa à pì: À kú Luda yãn ò pì: Pɔ́blen bisãsiri dìgɔ̃ kúo adoro.

⁵ Akũ Ibilisi gɛ̀ɛ kãao musu, akũ à andunia kpatanɔ mɔ̀nɛ pínki a zɛki gbɛ̀n gɔ̃̀nɔ

⁶ à pì: Mani n gba abirenɔ iko pínki kũ a gakurio, zaakũ à kú ma ɔĩmɛ, gbɛ̃ kũ má yei mani kpáa.

⁷ Tó n kutɛ ma arɛ dé, ani gɔ̃ n pɔ́ ũmɛ pínki.

⁸ Yesu wèa à pì: Ò kɛ̃̀ ò pì, ǹ donyĩ kɛ Dikiri n Ludanɛ ǹgɔ̃ doi ado.

⁹ Akũ Ibilisi gɛ̀ɛ kãao Yurusalɛmu, à a zɛ̀ Luda kpɛ́ mìsɔ̃ntɛa à pì: Tó Luda Nɛ́mɛ n ũ, ǹ ɔ gbarɛ n zĩdai la,

¹⁰ zaakũ ò kɛ̃̀ Luda yãn ò pì: Ani n yã o a malaikanɔnɛ ò n dãkpã.

¹¹ Ò pì dɔ: Oni n sɛ́ ń ɔĩ, de ǹsun gɛ̃̀ sí gbɛ̀ɛaro yãi.

¹² Yesu wèa à pì: Ò pì, ǹsun Dikiri n Luda lɛ́ ǹ gwaro.

¹³ Kũ Ibilisi Yesu yɔ̃̀ à gwà kũ yã pínkio à làka, akũ à a tòn ari zĩkea dɔ.

Yesu nana a zĩia Galili
( Mat 4:12-17 ; Maa 1:14-15 )

¹⁴ Yesu ɛ̀ra à tà Galili kũ Luda Nini gbãnao, akũ a tɔ́ dà bùsuu pìla pínki.

¹⁵ Àdi yã dańnɛ ń aduakɛkpɛnɔ gũn, baadi pínki dì a sáabu kpá.

Nazɛradenɔ gina Yesui
( Mat 13:53-58 ; Maa 6:1-6 )

¹⁶ Akũ à gɛ̀ɛ Nazɛra, gu kũ à nɛ́ blèn. Kámmabogɔrɔ zĩ à gɛ̀ɛ aduakɛkpɛn lákũ àdi kɛ nà. À fùtɛ à zɛ̀ de à kyó kɛ,

¹⁷ akũ ò annabi Isaya takada kpàa. Kũ à pòro, à bò gu kũ ò yã dí kɛ̃nwa ò pì:

¹⁸ Dikiri Nini kúma, à ma ditɛ mà baaru nna kpá takasidenɔnɛ, à ma zĩ mà gɔ̃nzĩdanɛ kpàkpa kɛ gbɛ̃ kũ ò ń zĩda vĩronɔnɛ, mà wɛ́wɛ̃naa kpàkpa kɛ vĩ̀nanɔnɛ, mà gbɛ̃ kũ ò yĩnanɔ poro,

¹⁹ mà Dikiri gbɛ̃kɛkɛnnɛgɔrɔ kpàkpa kɛ.

²⁰ Akũ à takada pìi kòko à kpà kpanyĩriia, à vùtɛ. Gbɛ̃ kũ ò kú kpɛ́ gũnnɔ wɛ́ fĩa ń pínki.

²¹ Akũ à nà yã'onnɛnaaa à pì: Luda yã dí pàpa gbãra lákũ átɛn ma nà.

²² Yã mana kũ à da a lɛ́n bò ń sarɛ ń pínki, òtɛni a tɔ́ nna sí ò pì: Yusufu nɛ́n díroo?

²³ Akũ à pìńnɛ: Má dɔ̃ sãnsãn kũ áni yáasi dí zumɛnɛ. Tó mɔkɔ̃mmɛ likita ũ, ǹ n zĩda were. Áni omɛnɛ mà yã kũ a mà ma kɛ̀ zaa Kapɛnamu kɛ ma bɛ wɛ̃tɛ gũn la dɔ.

²⁴ Yãpuran matɛn oárɛ, annabii dìgɔ̃ bɛ̀ɛrɛ vĩ a bɛ wɛ̃tɛ gũnlo.

²⁵ Matɛn oárɛ yãpura, kũ ludambɛ zɛ́ tà Iliasu gɔrɔ, gyaanɔnɔn dasi. Legũ dí maro ari wɛ̃̀ aakɔ̃ kũ mɔ suddoo, akũ nà zɔ̃kɔ̃ɔ gɛ̃̀ Isarailanɔ bùsun pínki,

²⁶ ama Luda dí Iliasu zĩ ń gbɛ̃kearo, sé gyaanɔ kũ à kú Zarɛfa, Sidɔ̃ sarɛ.

²⁷ Annabi Ɛlisa gɔrɔ sɔ̃, Isarailanɔ bùsun kusunɔn dimmɛ, ama adi ń gbɛ̃ke werekɔ̃aro, sé Siria bùsu gbɛ̃ Naama.

²⁸ Kũ gbɛ̃ kũ ò kú aduakɛkpɛ gũnnɔ yã pìi mà, ń pɔ fɛ̃̀ manamana ń pínki.

²⁹ Akũ ò bò kũ Yesuo wɛ̃tɛ kpɛ, ò gɛ̀ɛ kãao sĩ̀sĩ kũ ń wɛ̃tɛ kátɛa mìsɔ̃ntɛa, de ò ɔ sɔ̃i à lɛ́tɛ à sín yãi.

³⁰ Akũ à bò ń tɛ́ à tà.

Yesu tãnade werekɔ̃ana Kapɛnamu
( Mat 8:14-17 ; Maa 1:21-39 )

³¹ Yesu tà Kapɛnamu, Galili bùsun, akũ àtɛn yã dańnɛ kámmabogɔrɔ zĩ.

³² A yãdannɛnaa bò ń sarɛ, zaakũ a yã iko vĩ.

³³ Gɔ̃gbɛ̃ tãnade ke kú aduakɛkpɛn gwe, akũ à wiki gbãna lɛ̀ à pì:

³⁴ É'e! Bɔ́n ó vĩ kɔ̃ ɔĩii, Yesu Nazɛra? N su ǹ ó kakatɛn yá? Má dɔ̃ gbɛ̃ kũ ń de a ũ, mɔkɔ̃mmɛ Luda gbɛ̃ kũ à kú adona ũ.

³⁵ Akũ Yesu gì tãna pìinɛ à pì: Ǹ yĩtɛ! Ǹ go gɔ̃gbɛ̃ pìia. Akũ tãna pì gɔ̃gbɛ̃ pìi pã̀tɛ gbɛ̃nɔ tɛ́, à gòa, adi a kĩnnaro.

³⁶ Gbɛ̃nɔ bídi kɛ̀ ń pínki, òtɛn kɔ̃ lala: Bɔ́ taka buri yãn gwee? Àdi yã ditɛ tãnanɔnɛ kũ iko gbãnao, akũ òdi goḿma.

³⁷ Akũ a tɔ́ dà bùsuu pìla pínki.

Gyãrenɔ werekɔ̃ana dasidasi
( Mat 8:14-17 ; Maa 1:29-34 )

³⁸ Kũ à bò aduakɛkpɛn, akũ à tà Simɔ bɛa. Simɔ nanɔ da tɛn mɛ̀wãna kɛ manamana, akũ ò a yã ònɛ.

³⁹ Yesu zɛ̀ala à gì mɛ̀wãna pìinɛ, akũ a mɛ̀ɛ kɛ̀ sã̀na. Zaa gwe gɔ̃̀nɔ à fùtɛ à pɔ́ble kɛ̀ńnɛ.

⁴⁰ Kũ ifãntɛ̃ gɛ̃̀ kpɛ́n, gbɛ̃ kũ ò gyãre vĩnɔ sù kũńwo Yesunɛ, akũ à ɔ nàna ń baadia, à ń werekɔ̃a kũ ń gyã buri sĩnda pínkio.

⁴¹ Tãnanɔ sɔ̃ òtɛn bo gbɛ̃nɔ gũn kũ wikio dasi ò pì: Mɔkɔ̃mmɛ Luda Nɛ́ ũ. Ama àdi gíńnɛ ò yã o, kũ ò a dɔ̃̀ Arumasihu ũ yãi.

Yesu waazikɛna Galili
( Maa 1:35-39 )

⁴² Gukɛ̃kɔ̃ana Yesu bò wɛ̃tɛ gũn, à gɛ̀ɛ gusarɛ, akũ gbɛ̃nɔ tɛni a wɛtɛ. Kũ ò bòa, ò ye à ń tóro.

⁴³ Akũ à pìńnɛ: Sé mà kpata kũ à bò Luda kĩnaa baaru kpá wɛ̃tɛ kparanɔnɛ dɔ, zaakũ abire yãin Luda ma zĩ.

⁴⁴ Akũ à gɛ̀ɛ àtɛn waazi kɛ Yudea bùsu aduakɛkpɛnɔ gũn.

« Předchozí

další »

Následuj nás:

Sponzorované odkazy

Reklamy