LAASUNDE 8 - Bisã Bible 2005

¹ Dí mɛ́ à de lán ɔ̃ndɔ̃rii bàa? Dí mɛ́ à yãnɔ bɔkɔtɛna dɔ̃ɔ? Ɔ̃ndɔ̃ dì bisãsiri ãn werenɛ, àdi a wɛ́ pãsĩ litɛ wɛ́ mana ũ.

² Ǹ mì natɛ kína yãnɛ, zaakũ n lɛ́ kɛ̀a kũ Luda tɔ́omɛ.

³ Ǹsun wã ǹ go a arɛro, ǹsun zɛ yã kũ àdi kɛnɛ vãni kpɛro, zaakũ yã kũ à kɛ̀nɛ nnan àdi kɛ pínki.

⁴ Zaakũ kína yã mɛ́ à zɛ́ vĩ, dí mɛ́ ani fɔ̃ à pinɛ: Bɔ́n ntɛn kɛ gwee?

⁵ Gbɛ̃ kũ à mìi nàtɛnɛ ni gɛ̃ yãnlo, gbɛ̃ kũ à ɔ̃ndɔ̃ ni a gɔrɔ kũ a kɛnaao dɔ̃.

⁶ Yã sĩnda pínki a gɔrɔ kũ a kɛnaao vĩmɛ, bee tó yã'ũmmana tɛn tɔ̃ gbɛ̃a manamana.

⁷ Zaakũ gbɛ̃ke zia dɔ̃ro, dí mɛ́ ani fɔ̃ à yã kũ ani su onɛɛ?

⁸ Gbɛ̃ke a wɛ̃̀ndi kũna gbãna vĩro, lɛmɛ se gbɛ̃ke ni fɔ̃ à a gagɔrɔ sɔ̃sɔ̃ arɛro. Òdi le ò bò sozan zĩ̀i gũnlo, lɛmɛ dɔ yã vãni dì a kɛ̀rinɔ gbarɛro.

⁹ Kũ ma yã kũ òtɛn kɛ andunia gũn laasun lɛ̀ pínki, ma è bisãsiri dì gbãna bleḿma à wari kpáńyĩ.

¹⁰ Akũ ma yãvãnikɛri kũ òtɛni ń vĩnɔ è. Gbɛ̃nɔ bò Luda ɔnn ò sù ń tɔ́ nna sí wɛ́tɛ kũ ò ń yã vãni kɛ̀n gũn. Abirekũ pãmɛ dɔ.

¹¹ Tó odi wari dɔ dàkɛriia likalikaro, a yã dì tó gbɛ̃nɔ zɛo ń swɛ̃̀n ò a vãni kɛmɛ se.

¹² Bee tó durunnakɛrii dàa kɛ̀ gɛ̃̀n baaakɔ̃, akũ à gìi kɛ̀, má dɔ̃ kũ gbɛ̃ kũ ò Luda vĩna vĩ akũsɔ̃ òtɛn mì natɛnɛnɔ sã̀na deala.

¹³ Yã ni bo kũ gbɛ̃ vãninɔo nnaro, kũ ò Luda vĩna vĩro yãi, ń gɔrɔ ni gì kɛro lán uraa bàmɛ.

¹⁴ Yã pã pãnde kun àtɛn kɛ andunia gũn. Yã dì gbɛ̃ mana le lákũ yãvãnikɛriin a ũ bà, yã dì yãvãnikɛri le lákũ gbɛ̃ manan a ũ bà. Ma pì abirekũ pãmɛ dɔ.

¹⁵ Madì pɔnnakɛna sáabu kpá, zaakũ à mana kũ bisãsirio andunia gũn à pɔ́ ble à í mi à pɔnna kɛ, pɔnna pì ni donɛ arɛ a zĩkɛnaa gũn lákũ Luda a gbà a wɛ̃̀ndi lɛ́n nà andunia gũn.

¹⁶ Ma mɛ̀ɛ kpà ɔ̃ndɔ̃kũnaaa, akũ bɔkɔtɛ kũ òtɛn kɛ andunia gũn kũ i dì na ń wɛ́nlo fãnantɛ̃ kũ gwãanio, ma a laasun lɛ̀

¹⁷ ma è Luda tò gbɛ̃ke ni fɔ̃ à yã kũ àtɛn kɛ andunia gũn dɔ̃ro. Bee tó gbɛ̃ kpátɛ kɛ̀i manamana, ani a mì dɔ̃ro. Bee tó ɔ̃ndɔ̃rii pì á dɔ̃, ani fɔ̃ à boaro.