LAASUNDE 7 - Bisã Bible 2005

Ɔ̃ndɔ̃dannɛnaa

¹ Tɔ́ nna mana de nísi gbĩ nna bɛ̀ɛrɛdela, gagɔrɔ mana de igɔrɔla.

² Gɛ̃na ɔn kũ òtɛn gɛ̀ ɔ́ɔ dɔn mana de gɛ̃na ɔn kũ òtɛn dikpɛ kɛnla, zaakũ gbɛ̃ sĩnda pínki lakanaan gwe, à mana gbɛ̃ kũ ò kunnɔ yã pì da.

³ Wɛ̃ndakɛna mana de yáadɔnala, pɔsirakɛnaa gbɛra nɛ̀sɛɛ dì were.

⁴ Ɔ̃ndɔ̃ri laakarii dìgɔ̃ kú ɔn kũ òtɛn ɔ́ɔ dɔnwa, yɔ̃nkɔ laakarii dìgɔ̃ kú ɔn kũ òtɛn pɔnna kɛnwa.

⁵ À mana ǹ ɔ̃ndɔ̃ri kpãkɛ̃nyĩna da de ǹ sã kpá yɔ̃nkɔ n tɔ́kpanala,

⁶ zaakũ yɔ̃nkɔnɔ yáadɔna de lán sàkpa lí tɛ́pũtãna kĩnii gũn bàmɛ. Abirekũ pãmɛ dɔ.

⁷ Gbãna mɔna gbɛ̃nɔnɛɛ dì tó ɔ̃ndɔ̃ri yɔ̃nkɔ kũmɛ, gusarɛgba dì gbɛ̃ yakamɛ.

⁸ Yã mìdɛna mana de a naanala, mɛna mana de ń zĩda binala.

⁹ Ǹsun tó n pɔ fɛ̃ likalikaro, zaakũ yɔ̃nkɔ mɛ́ àdigɔ̃ pɔfɛ̃ vĩ.

¹⁰ Ǹsun pi, bɔ́yãin yãgɔrɔ mana de tera pɔ́laro, zaakũ yãlana dí taka bi ɔ̃ndɔ̃yãnlo.

¹¹ Ɔ̃ndɔ̃ bi pɔ́ manamɛ lán túbi bà, à àre vĩ gbɛ̃ kũ òtɛn ifãntɛ̃ enɔnɛ.

¹² Ɔ̃ndɔ̃ bi utɛkimɛ, lákũ ɔgɔ de utɛki ũ nà, ama dɔ̃na àreen dí: Ɔ̃ndɔ̃ dì gbɛ̃ kũ ò vĩnɔ sura ba.

¹³ Ǹ laasun lɛ́ Luda yãkɛnanɔa. Dí mɛ́ ani fɔ̃ à pɔ́ kũ à kɛ̀ kotinaa dɔdɔɔ?

¹⁴ Tó gɔrɔ nna sùmma, ǹ pɔnna kɛo. Tó gɔrɔ vãnimɛ sɔ̃, ǹ laasun lɛ́. Luda mɛ́ à a pínki kɛ̀, de gbɛ̃ke súngɔ̃ a zia dɔ̃ro yãi.

¹⁵ Ma wɛ̃̀ndi kori dí gũn ma yã díkĩnanɔ è pínki. Ma gbɛ̃ mana è, à gà a manakɛnaa gũn, ma gbɛ̃ vãni è, àtɛn gì kɛ a yãvãnikɛnaa gũn.

¹⁶ Ǹsun tó n manakɛna gɛ̃ ɔlaro, ǹsun tó n ɔ̃ndɔ̃ gɛ̃ ɔlaro. À kɛ̀ dera ĩni n zĩda kakatɛɛ?

¹⁷ N vãni sún gɛ̃ ɔlaro, ǹsungɔ̃ yɔ̃nkɔ ũro. À kɛ̀ dera ĩni ga n gɔrɔ ãa?

¹⁸ À mana ǹgɔ̃ yã mɛ̀n pla pìnɔ kũnamɛ, ǹsun ɔ gbarɛiro, zaakũ gbɛ̃ kũ à Luda vĩna vĩ dì a pla pìnɔ zɛ́ le pínkimɛ.

¹⁹ Ɔ̃ndɔ̃ dì tó ɔ̃ndɔ̃ri gbãna gɔ̃ de wɛ́tɛ gbãnade gbɛ̃nɔn kurinɔla.

²⁰ Gbɛ̃ mana kũ àdigɔ̃ yã mana kɛ kũ àdi durunna kɛro kú andunia gũnlo.

²¹ Ǹsun sã kpá yã kũ gbɛ̃nɔ tɛn oi pínkiro, de ǹsun ma n zĩkɛri tɛni n sɔ̃sɔ̃ro.

²² Zaakũ ń dɔ̃ n zĩdanɛ, kũ mɔkɔ̃n se n gbɛ̃nɔ sɔ̃̀sɔ̃ dasi.

²³ Ma yã birenɔ gwà kũ ɔ̃ndɔ̃o pínki, ma zɛo kũ mà ɔ̃ndɔ̃ kũ, akũ à zã̀ kũmao.

²⁴ Bee tó ɔ̃ndɔ̃ fɔ̃̀ àgɔ̃ dera, a kúki zã̀, a asiri zɔ̃kɔ̃ manamana, dí mɛ́ ani fɔ̃ à boaa?

²⁵ Ma ɔ̃ndɔ̃ kũ yã sĩnda pínkioo mìi tàasii kà, ma gwàgwa de mà le mà dɔ̃, de mà yãvãnikɛna dɔ̃ yɔ̃nkɔkɛ ũ, de mà yɔ̃nkɔkɛ dɔ̃ mìsarikɛ ũ.

²⁶ Nɔgbɛ̃ kũ à de tankutɛ ũ a swɛ̃̀ bi gbàgidiimɛ a ɔnɔ bi mɔ̀kakɔ̃anaamɛ, a yã dì ma pɔ yaka de gala. Gbɛ̃ kũ a yã kà Ludanɛɛ dì wotoa, ama nɔgbɛ̃ pìi dì durunnakɛri kũmɛ.

²⁷ Makũ laasunde ma pì, ǹ yã kũ ma boa gwa. Kũ matɛn yã gwa zɛ́azɛa de mà le mà a mì dɔ̃,

²⁸ gɔrɔ kũ matɛn wɛtɛ lenaa sari, ma gɔ̃gbɛ̃ mana lè mɛ̀n do gbɛ̃nɔn wàa sɔɔronɔ tɛ́, ama bee nɔgbɛ̃ mana mɛ̀n do mádi le ń tɛ́ro.

²⁹ Yã kũ ma boaan dí. Luda bisãsirinɔ kɛ̀ nɛ̀sɛpuradenɔ ũmɛ, akũ ò gɛ̃̀ manafiki zɛ́n.