Online Bible

LAASUNDE 5 - Bisã Bible 2005

Lɛ́kɛna Ludaa laasunlɛnaa sari

¹ Tó n gɛ Luda ɔnn, ǹgɔ̃ kú kũ laakariio. Ǹ nai ǹ a yã ma mana de yɔ̃nkɔnɔ sa'ona gwela, zaakũ ń yãdɔ̃nasari mɛ́ àdi tó ò yã vãni kɛ.

² N lɛ́ súngɔ̃ wãnaro, ǹsun wã ǹ yã o Ludanɛro. Lákũ à kú musu ń kú zĩtɛ nà, ǹsun yã o dasiro.

³ Lákũ yãbɔkɔtɛ dasi dì su kũ nana'onaao nà, lɛn yã dasi bɔtɛnaa dì su kũ yɔ̃nkɔyão lɛ.

⁴ Tó n lɛ́ kɛ̀ Ludaa, ǹsun a fĩnabona gɔrɔ gágaro. Ǹ a fĩna bo, zaakũ yɔ̃nkɔnɔ yã dì kánɛro.

⁵ Lɛ́kɛna Ludaa sari mana de n lɛ́ kɛ̀a papanaa sarila.

⁶ Ǹsun tó n lɛ́ n da yãnlo. Ǹsun o sa'oriinɛ n pì n sã lɛ́kɛna yãnlo. Ń ye Luda pɔ fɛ̃nyĩ n yã pì yãi à zĩ kũ ntɛn kɛ kakatɛn yá?

⁷ Nana dasi ona kũ yã dasi bɔtɛnaao dì su kũ yã pãomɛ. Abire yãi ǹgɔ̃ Luda vĩna vĩ.

Aruzɛkɛ pãmɛ

⁸ Tó n è òtɛn gbãna mɔ takasidenɔnɛ gukea, òtɛn gíńnɛ kũ yãzɛdeo òtɛn yã gɔ̃gɔ̃ńnɛ a zɛ́aro, ǹsun tó yã pì bo n sarɛro, zaakũ bùsuu pì gbãnadenɔ tɛn wɛ́ dɔkɔ̃i, akũ ń gbɛ̃ zɔ̃kɔ̃nɔ tɛn wɛ́ dɔńyĩ dɔ.

⁹ Ń pínki dì bùsuu pì baka blemɛ, zaakũ kína mɛ́ à buranɔ vĩ.

¹⁰ Gbɛ̃ kũ à ye ɔgɔɔi dì kĩaa, gbɛ̃ kũ à ye aruzɛkɛii àree dì mɔ́aro. Abirekũ pãmɛ dɔ.

¹¹ Tó aruzɛkɛ tɛn kara, a blèrinɔ dìgɔ̃ karamɛ. Bɔ́ àreen à vĩ a dikiriinɛɛ? À wɛ́ pitia baasiro.

¹² Zĩgbãnakɛrii dì i nna o à pɔ́ blè fítin yá ke dasin yá. Aruzɛkɛde sɔ̃ a pɔ́ dasi dì tó à i oro.

¹³ Ma nɛ̀sɛyakana yã pãsĩ è andunia gũn, gbɛ̃ke zɛ́ tàta a ɔgɔdalɛ à a zĩda karii bò,

¹⁴ akũ à bɔkɔtɛ vãni kɛ̀o, a aruzɛkɛ làka pínki. Kũ à nɛ́gɔ̃gbɛ̃ ì, à pɔ́ke vĩ kũ à tónɛro.

¹⁵ Bisãsiri dì bo a da gbɛrɛn pótompomɛ. Lákũ à sù nà lɛn àdi ɛra à tá lɛ dɔ, àdi a zĩ àre ke le à sɛ́ à na a ɔĩ à táoro.

¹⁶ Abirekũ bi nɛ̀sɛyakayã pãsĩmɛ dɔ. Lákũ gbɛ̃ sù nà lɛn àdi ɛra à tá lɛ dɔ. À ísimma wàra à pɛ̀ gukoria pã, bɔ́ mɛ́ à gɔ̃̀nɛɛ?

¹⁷ Abire gbɛra à a gɔrɔ dɛ̀ gusiran kũ nɛ̀sɛyakana zɔ̃kɔ̃ɔo kũ gyão kũ pɔfɛ̃o.

¹⁸ Akũ ma è à mana kũ bisãsirio à pɔ́ ble à í mi à zĩ kũ à kɛ̀ kũ wario andunia gũn sáabu kpá a wɛ̃̀ndi zaka kũ Luda a gbà lɛ́n, zaakũ a bakaan gwe.

¹⁹ Abire gbɛra tó Luda gbɛ̃ gbà ɔgɔda kũ aruzɛkɛo, akũ à a gbà zɛ́ à anfãni kɛo, à zɛ kũ a bakaao à a zĩ sáabu kpá. Luda mɛ́ à a gbà.

²⁰ Àdigɔ̃ laasun lɛ́ a wɛ̃̀ndi zakaaa dasi doro, zaakũ Luda mɛ́ à yã màa kũ pɔnnao.

« Předchozí

další »

Následuj nás:

Sponzorované odkazy

Reklamy