LAASUNDE 4 - Bisã Bible 2005

Kunna kũ kɔ̃o

¹ Akũ ma gbãna kũ òtɛn mɔ gbɛ̃nɔnɛ andunia gũn yã gwà dɔ pínki. Ma gbɛ̃ kũ òtɛn wɛ́ tãḿmanɔ wɛ́tɛ̃ è, ò laakarikpatɛri vĩro. Ò laakarikpatɛri vĩro, zaakũ ń wɛ́tãmmarii pìnɔ mɛ́ ò gbãna vĩ.

² Akũ ma pì, gbɛ̃ kũ ò gànɔn sáabu vĩ de gbɛ̃ kũ ò kunnɔla,

³ ama gbɛ̃ kũ odi i kɔ̀ro akũsɔ̃ adi wɛ́ kɛ pla kũ a vãni kũ òdi kɛ andunia gũnworo sã̀naḿma ń pínki.

⁴ Ma è kũ pɔ́ kũ à tò gbɛ̃ dì zĩ kɛ à mɛ̀ kpáa, de àgɔ̃ de a gbɛ̃dakela yãimɛ. Abirekũ pãmɛ dɔ, pɛna gukoriamɛ.

⁵ Yɔ̃nkɔ dì ɔ kpa a kùla ari à fɛ̃fɛ̃.

⁶ Kunna kũ pɔ́ okũ doo kũ laakarikpatɛnaao mana de kunna kũ pɔ́ okũ plao kũ ísimmawaranaao kũ pɛna gukoriaola.

⁷ Akũ ma ɛra ma yã pã pãnde è andunia gũn dɔ.

⁸ Gbɛ̃ke mɛ́ à kun à nɛ́ vĩro, à vĩ̀ni kesɔ̃ dakũna vĩro. A ísimma dì lákaro, bee kũ abireo a aruzɛkɛ dì mɔ́aro. Dí yãin àtɛn zĩ kɛɛ? Bɔ́yãi à nnamanaa tɛ̃̀ a zĩdanɛɛ? Abirekũ pãmɛ dɔ, yãbɔkɔtɛ pãsĩmɛ.

⁹ Pla de dola, zaakũ ń zĩkɛna àre nigɔ̃ mana.

¹⁰ Tó gbɛ̃ mɛ̀n do lɛ̀tɛ, a gbɛ̃ndo ni a sɛ́. Waiyoo gbɛ̃ mɛ̀n do! Tó à lɛ̀tɛ, anigɔ̃ sɛ̀ri vĩro.

¹¹ Tó gbɛ̃nɔn planɔn wutɛna gu dokɔ̃nɔn, oni kɔ̃ puusu ma. Deran gbɛ̃ mɛ̀n do ni kɛ nà à bo ĩann?

¹² Òdi gbãna mɔ gbɛ̃mɛndonɛ, gbɛ̃nɔn planɔ sɔ̃ òdi zɛ ò gímɛ. Bà nɛ́ mɛ̀n aakɔ̃ dì kɛ̃ likaro.

¹³ Kɛfɛnna ɔ̃ndɔ̃ri takaside mana de kína zĩkũna yɔ̃nkɔ kũ àdi lɛ́damma ma dorola,

¹⁴ bee tó kɛfɛnna pìi bò kpɛ́sira gũn, akũ à gɔ̃̀ kína ũ, ke tó ò a ì bùsuu pìn takaside ũ.

¹⁵ Ma è andunia tɛ̀ kína gɛ̃nɛ kũ à de kɛfɛnna ũ pìiimɛ.

¹⁶ Gɔrɔ birea à gbɛ̃nɔ dasi lɛ́ vĩro, à de ń don'arɛde ũ. Ama gbɛ̃ kũ ò sù zãnɔ dí a sáabu kpáro. Abirekũ pãmɛ dɔ, pɛna gukoriamɛ.